Jona Yungnyu Haübüa
Ngau maang ka nei Jonaei thuibü müt che tegü welaukei, nyem haoeibü khua sholepan hoba kaodakeibü bakou haoeibü phainei khinan. Haoei seneibü Bou to, haoeibü langkei püngkhün ka nei yaüankei dogo nyensang kukei. Haoei, ngei kübü thekubü pendou jungeilabü dogo lenkei, hoba ngaoei hao kao ulangbüa inletkei.
2 1Hobaje Jonaei ngau maang ka nei Bou to welaukei, 2Ngo maangshata ngei kü Bou to ngakei, hoba haoei kü to jongaikei; Sheol maang ka nei ngei thuibü shanga ngekkei, hoba nyi kü ngüh ditkei. 3Nyi ngo haübü to, yungnyu jenyu to litikukei, hoba deishouei ngo kailepbei; kaibü deishou hoba yungsen pendou kü thüka danglepbei. 4Hobaje ngei laukei, ‘Ngo kaibü nyek thedang ka nei haujembeikua; lausikei ngei kaibü saopobü lembü chem aeto nyibou chühlabü.’ 5Yungnyuei ngo hailabü lele küplepbei; haübüei ngo kailepbei; yungnyu nyemei kü khu sholepbei. 6Ngo shongh yomang sühko nyema; kaodakei kü phainei haoeibü bakou ponpen khinkei. Lausikei nyi kü langkei püngkhün ka nei yaüankei, O kü Bou. 7Kü soushou semthetjinei, ngei kü Bou damenkei, hoba kü welaubü nyi jungto, kaibü saopobü lembü chem to loukei. 8Amlangbü heangsho to khapyoan kibü shuongei, haoen la yinglabü sanou kho phainei apyoda. 9Lausikei ngei nyensang kula ngüha nyi la lemlabü; ngei kübü thekubü pendou jungeilabü. Khümenbü kho seneibü Bou shangabü!
10Hobaje Bouei ngao to laukei, hoba ngaoei Jona kao ulangbüa inletkei.
