Jona arĩ Kũrĩa Kũriku
Arĩ thĩinĩ wa thamaki, Jona akĩhooya ta mũndũ ũrakua maaĩinĩ, nyeki ya iria ĩmũthiororokeirie mũtwe na ihingo cia thĩ ikamũhingĩrĩra thuutha wake, agĩcookeria Ithe witũ ngaatho tondũ nĩarutĩte muoyo wake irimainĩ. Naake akĩĩhĩta kũhingia ũrĩa eeranĩire, nayo thamaki ĩkĩmũtahĩka thĩ nyũmũ.
2 1Naake Jona akĩhooya Ithe witũ arĩ thĩinĩ wa thamaki atĩrĩ: 2Rĩrĩa ndaarĩ thĩĩnainĩ, ndakaĩire Ithe wakwa, nake akĩnjĩtĩka; ndĩ nda ya mbĩrĩra ngĩkaya njũrĩire ũteithio, nawe ũkĩigua mũgambo wakwa. 3Wee waanjikĩirie kũrĩa kũriku, gatagatĩ ka maria, nayo mĩkũmbĩ ĩkĩĩndigicĩria; ndiihũ ciaku ciothe na makũmbĩ maku makĩhĩtũka igũrũ wakwa. 4Naake ngĩcooka ngiuga atĩrĩ, “Nĩndingatĩtwo njeherio mbere yaku; no nĩngacooka kwerekeria maitho kũrĩ hekarũ yaku theru.” 5Maaĩ makĩĩhumbĩra o nginya ngĩrĩ hakuhĩ gũkua; kũrĩa kũriku gũkĩĩndigicĩria; nyeki ya iria-inĩ ĩgĩĩthiororokeria mũtwe wakwa. 6Ngĩrikĩra thĩ nginya mĩri-inĩ ya irĩma; thĩ ĩkĩĩhingĩra ihingo ciayo thuutha wakwa nginya tene. No wee nĩwaarutire muoyo wakwa kuuma irima-inĩ, Wee Ithe wakwa. 7Rĩrĩa muoyo wakwa waathiraga, ndaaririkanire Ithe wakwa, namo mahooya makwa magĩkinya kũrĩ wee, kũrĩ hekarũ yaku theru. 8Arĩa menyiitagĩrĩra mĩhianano ya tũhũ nĩmatiganagĩria wendo ũrĩa ũngĩatuĩka wao. 9No niĩ nĩngakũrutĩra igongona ngĩgũcookagĩria ngaatho; nĩngahingia mĩĩhĩtwa yakwa yothe ĩrĩa ndĩĩhĩtĩte. Ũhonokio nĩ wa Ithe witũ!
10Naake Ithe witũ akĩĩra thamaki, nayo ĩgĩtahĩka Jona ĩkĩmũita thĩ nyũmũ.