Jonah Kathukali
Ngāwui khazak ngāhaili Jonahna tuili thihai mi kaphungkhami eina kaphāo khahai, tuiyak awui kokli kavaikor, ram shongwui kachangkhong awui thānili kakhamhai, ithumwui Avāna awui kharing tuikhongli eina kaphungkhavai ngāchāmā da kaphāo khahai. Ama khanganaokhavai sāra da haihai, kala ngāna ama ramkharāli karāthāhai.
2 1Chieina Jonahna khai chiwui alung eina ithumwui Avāli seihā sāda hānga, 2Iwui kakhanang tharan iwui Avāli ina ngakaowa, kala ana ili ngahānkāmi; Kathewui ramwui wuk eina ngachonmi khavai ina ngakaowa, kala nana iwui akhon shāmi. 3Nana ili shamadrulungli kathukali horsanga, kala kongna ili kuimareiphinhaowa; nawui tara̱ khangaphao kala khamalaona ili tumhaira. 4Chieina ina hānga, "Nawui mikyan eina ina kashamshokhaowa; chithālala ina nawui kathara khorumshim chili yangluishitra." 5Tara̱na ili tumhaida kathi kāshunghaira; kathukna ili kuinama; shamadruwui thingnāna iwui kuili kuinama. 6Ina kaphungwui angayungli zangshunghaowa; ngaleina iwui khanukshong awui ngaveibing katang mavaila shunghaira. Kha iwui Avā, nana iwui mirin Chomwui eina khāngkāmihaira. 7Iwui manglā iwuklungli shimānra tharan, ina iwui Avāli phaningunga, kala iwui seihā kasā nawuili, nawui kathara khorumshim chili rāhaira. 8Khikha masā khavai meoma̱li kaphaningbingna, athumwui samphangra leikashi chi chihochaohaira. 9Kha ningshi masot eina ina nali pha̱kaphayā chigatra; ina khuikahai khangashit saikora mira. Huikhami hi ithumwui Avāwuili lei!
10Chieina ithumwui Avāna khai chili hānga, kala khai china Jonahli ngalei kathengli maloshokhaowa.
