Yona kati na mozindo
Na kati ya mbisi Yona abondeli lokola moto oyo azali kozinda, ndunda ezingi motó na ye mpe epai ya mokili ekangami sima na ye, azali kopesa Tata na biso matondi mpo abimisi bomoi na ye na libulu. Alapi ndai ete akofutela oyo alakaki, mpe mbisi ebimisi ye na mabele ya kokauka.
2 1Bongo Yona abondelaki Tata na biso uta na kati ya mbisi : 2Na mpasi na ngai nabelelaki Tata na ngai, mpe Ye azongisaki ngai ; uta na libumu ya lilita nabelelaki mpo na lisalisi, mpe Yo oyokaki mongongo na ngai. 3Yo obwakaki ngai na mozindo, na motema ya mbu, mpe mayi oyo ezali kotambola ezingaki ngai ; mbonge na Yo nyonso mpe mayi na Yo ya makasi ekatisaki likolo na ngai. 4Bongo nalobaki : « Nabenganisami na miso na Yo ; kasi nakotala lisusu epai ya tempelo na Yo mosantu. » 5Mayi ezingaki ngai tii na liwa ; mozindo ezingaki ngai ; matiti ya mbu ezingamaki na moto na ngai. 6Nazindaki tii na misisa ya bangomba ; mokili ekangaki bikuke na yango sima na ngai libela. Kasi Yo obimisaki bomoi na ngai na libulu, Tata na ngai. 7Tango bomoi na ngai ezalaki kosila, nakanisaki Tata na ngai, mpe libondeli na ngai etombaki epai na Yo, na tempelo na Yo mosantu. 8Bato oyo bakangami na bikeko ya pamba bakei mosika na bolingo oyo ekokaki kozala na bango. 9Kasi ngai nakobonzela Yo na masanzoli ya botondi ; nakokokisa bilaka nyonso nalaki. Lobiko ezali ya Tata na biso !
10Bongo Tata na biso alobaki na mbisi, mpe ebimisaki Yona na libumu na yango mpe ebwakaki ye na mabele ya kokauka.
