Jona eng' Rireet
Kisa Jona Kwandanyo kobun moetap kome ko uu chii ne kagoyiem peek, kirat susweek metinnyi ak koger emet kurgotikyik eng' letanyi, ak kokoiyo Kwandanyo agobo iching'u saboondanyi kobun keriinget. Kiyasyo kotun ne kagoyasyo, ak kiing'ung'da ineendet njiryot kobwa emet ne yaamaat.
2 1Ki sa Jona Kwandanyo eng' oriit njiryot, kole: 2Eng' ng'wanindo ne atinye ki aguur Kwandanyu, ak kowol anee; eng' moetap kome ki ariirchi kotoreta, ak ki igas kutinnyu. 3Ki iwiira eng' rireet, eng' muguleldap nyanjosyek, ak ki koyiem peek; maranosyeguk tugul ak mildaeguk ki landa parak. 4Ki ale, ‘Kageistoa eng' taing'ung'; ago ageer agaigai Hekalung'ung' ne tiliil.’ 5Ki tuch peek agoi koit kome; ki koyiem rireet; kigilaakyi susweegap nyanjet metinnyu. 6Ki arorokta agoi koit keelyegap tuloonook; ki koger emet kurgotikyik eng' letanyu koigeny. Ago ki ichuutwa saboondanyu eng' keriinget, Kwandanyu. 7Ye kingo tanui saboondanyu, ki aibwaat Kwandanyu, ak ki koba saaennyu agoi inyee, kot koit Hekalung'ung' ne tiliil. 8Che namegei kanamonik che po puch, kobagaakta chamyet ne imuuchi koek nenywa. 9Ago agoitunin tiseiywot eng' lasunet ak kongoi; ariibe kaarortaet age tugul ne ki ayai. Punjin Kwandanyo yetunet!
10Yeityo kong'alaalji Kwandanyo njiryot, ak ki ing'ung'da Jona kobwa emet ne yaamaat.