Ng'atutyet ne ki mwee Jona
Komwei maotyot kuuretap Kwandanyo si koamda agobo puunyoogap Israel, kelugui ineendet njiryot ne oo, ak koneetkei—ama chame—kole oo rireenetap Kwandanyo kosiir nenyi miising'.
Ng'alaali Kwandanyo eng' mustari 2
1 1Ki nyoonji ng'olyootap Kwandanyo Jona weeriitap Amit, kole,
2“Ng'eet, iba Nineveh, nganaseet ne oo nooto, ak iwaach agaigai ineendet, amu kagong'eet yaityennywa eng' tainnyu.”
3Ago ki ng'eet Jona si komwee Tarsis, koistoegei eng' taitap Kwandanyo. Ki pa Joppa, ak konyoor melisyek ne pendi Tarsis, ak koyaak beiyaennyi, ak kolaany si koba kobooto icheek Tarsis, koistoegei eng' taitap Kwandanyo.
4Ki iwiirte anyun Kwandanyo usoonet ne oo nyanjet; ki piit kipchurchuryet ne koroom, ak ki uu melisyek ngomachei kotil. 5Ki toptobenso piigap moinget, ak kowaach chii age tugul kamuktaennyi. Ki wiir tuguuk che ki mi melisyek konyanjet si kowisisiit melisyek. Ago ki kawo Jona koon kwenutap melisyek, ole ki rue ko ki inuuchi miising'. 6Ki nyo kiptaiyatap melisyek ak koleenji, “Amu nee si irue? Ng'eet, iguur kamuktaeng'ung'! Abeere ibwaatech ineendet, si ma kelusyo.”
7Ki leenjigei piik, “Obwa, keseer parbareek si keng'en ng'oo ne itechei yaityoni eng' acheek.” Ki seer parbareek, ak ki ibutyi parbaryat Jona. 8Ki leenji ineendet, “Imwaiwech—inyee ne itechei yaityoni eng' acheek—iyaei nee? Ipunu ano? Nee emeng'ung'? Ipunu pororyet ne ne?”
9Ki wol kole, “Aa Hebranindet, ak aiywei Kwandanyo, Kwandap kipsengwet, ne ki yai nyanjet ak emet ne yaamaat.”
10Ki toptobenso pichooto miising' ak koleenji, “Nee ni ne kagoyai?” Amu ki ngen kole ki mwei eng' taitap Kwandanyo, amu ki komwachi icheek.
11Ki leenji ineendet, “Nee ne keyaun si kosiis nyanjet eng' acheek?”—amu ki tesak nyanjet koroom miising'.
12Ki leenji icheek, “Onama ak owiiro nyanjet, ak kosiis nyanjet eng' okweek. Angen ale kipchurchuryet ne oo ni kagonyoonok amu anee.”
13Ago ki poisye pichooto miising' si koit emet, ago ma muuchi, amu ki tesak nyanjet koroom agaigaige. 14Ki guur anyun pichooto Kwandanyo, koleenji, “Asaain, Kamuktaindet, matechamji kemoi amu saboondap chiichi, ak matinde eng' acheek korotiik che ma tinyei tengek, amu kaiyai inyee ko uu ye imache.” 15Ki nam pichooto Jona ak kowiirchi nyanjet, ak ki siis nyanjet ne ki koroom. 16Ki iywei anyun pichooto Kwandanyo miising', ak koeeny kagoochinet eng' Kwandanyo, ak koyai kaarortaosyek.
17Ki chobchi anyun Kwandanyo njiryot ne oo si kolugui Jona, ak ki mi Jona moetap njiryot peetuusyek somok ak kemousyek somok.