Mweeke wa Keerĩ
Kiugo kĩa Ithe witũ gĩkĩmũkinyĩra riita rĩa keerĩ, naake Jona agĩthiĩ, agĩtoonya Nineve rũgendo rwa mũthenya ũmwe, akĩanĩrĩra atĩ gũtigaire mĩthenya mĩrongo ĩna rĩkang'aũrwo. Itũũra rĩu inene rĩothe rĩgĩĩtĩkia, mũthamaki akiuma gĩtĩinĩ gĩake kĩa ũthamaki, akĩĩhumba nguo ya makũnia na agĩikara mũhuinĩ, naake Ngai oona magarũrũkĩte, ndaamaniinire.
3 1Na rĩĩrĩ, kiugo kĩa Ithe witũ gĩgĩũka kũrĩ Jona riita rĩa keerĩ, atĩrĩ:
2“Ũkĩra, ũthiĩ Nineve, itũũra rĩu inene, ũhunjie ndũmĩrĩri ĩrĩa ngũkũhe.”
3Naake Jona agĩũkĩra agĩthiĩ Nineve, o ta ũrĩa Ithe witũ oigĩte. Na rĩrĩ, Nineve rĩarĩ itũũra inene mũno, rĩa rũgendo rwa mĩthenya ĩtatũ gũtuĩkanĩria. 4Naake Jona agĩtoonya thĩinĩ wa itũũra, agĩthiĩ rũgendo rwa mũthenya ũmwe, akĩanĩrĩra atĩrĩ, “Gũtigaire mĩthenya mĩrongo ĩna, na Nineve nĩrĩkangʼaũrwo!” a a v4 Kiugo kĩrĩa gĩtaũrĩtwo “kũngʼaũrwo” kĩrĩ na ũrĩa gĩtaũkaga kwa mĩena ĩĩrĩ: no gĩtaũke ta kwanangwo kana kũgarũrwo, na ũndũ ũcio nĩguo gĩcunjĩ kĩrĩa kĩngĩ gĩa mũrango ũyũ gĩkĩhingia.
5Nao andũ a Nineve magĩĩtĩkia Ngai. Magĩanĩrĩra kĩathĩ kĩa kwĩĩhinga irio, na makĩĩhumba nguo cia makũnia, kuuma ũrĩa mũnene nginya ũrĩa mũnini.
6Rĩrĩa ũhoro ũcio wakinyĩire mũthamaki wa Nineve, akĩuma gĩtĩinĩ gĩake kĩa ũthamaki, akĩruta nguo yake ya ũthamaki, akĩĩhumba nguo ya makũnia, agĩikara thĩinĩ wa mũhu. 7Agĩtũma ũhoro ũyũ wanĩrĩrwo kũu Nineve, na watho wa mũthamaki na anene ake, atĩrĩ: Mũndũ o na ũrĩkũ kana nyamũ, rũũru rwa ngʼombe kana rwa ngʼondu, itikanacame kĩndũ o nakĩ; itikarĩĩthio o na itikanyue maaĩ. 8No andũ na nyamũ nĩmahumbwo nguo cia makũnia, na mũndũ o wothe akaĩre Ngai na hinya wake wothe. O mũndũ nĩagarũrũke, atigane na mũthiĩre wake mũũru, na haaro ĩrĩa ĩrĩ mookoinĩ make. 9Nũ ũĩ? Hihi Ngai no agarũrũke, agarũrĩire itua rĩake, atigane na marakara make mahiũ, nĩ geetha tũtikaniinwo.
10Rĩrĩa Ngai oonire ciĩko ciao, atĩ nĩmagarũrũkĩte makaatigana na mũthiĩre wao mũũru, Ngai akĩgarũra itua rĩake igũrũ rĩa mũtino ũrĩa oigĩte nĩakamarehere, na ndaawĩkire.