Aru Ekbar Moka
Amar Pitri laga kotha dusra bar ahise aru Jona jaise, Nineveh bhitor te ek din khuj kori kene chalis din pichete etu ulta-pulta hoi jabo koi kene hikar korise. Pura sheher pora biswas korise, raja tai laga singhason chari kene bora kapra pindhi chai te bohise, aru tarkhan ghuri aha dekhi kene, Isor pora tarkhan ke nash kora nai.
3 1Tetiya amar Pitri laga kotha dusera bar Jonah ke ahhise:
2“Uthibi, Nineveh, hei dangor sheher te jabi, aru Moi tumi ke diya kotha prachar koribi.”
3Titia Jonah uthi kene amar Pitri koisena nisina Nineveh te jaise. Nineveh tu bisi dangor sheher asele—paar koribole tin din lagise. 4Jonah sheher bhitor te ek din berai kene jor pora hala korise, “Aru chalis din, aru Nineveh ulta hoi jabo!” a a v4 “Ulta hoi jabo” kowa kotha tu duita ortho loi ase—nosto hoi jabo, nahole mon ghurai dibo; eneka ulta kotha hei adhyay laga baki bhag te pura hoise.
5Nineveh laga manuh khan Isor ke biswas korise. Tarkhan upwas ghoshona korise aru dangor pora chutu tak sob chatai kapor pindhise.
6Jitia eitu khobor Nineveh laga raja tak punchise, tai singhason pora uthise, tai laga raja-kapor ulai dise, chatai kapor pindhi loise, aru chai te bohise. 7Raja aru tai laga moha-manuh khan laga hukum pora, tai Nineveh te eneka ghoshona korai dise: Kun manuh nohoile janwar, goru laga jhak nohoile mer laga jhak, eku jinis nachakhibi; tarkhan ghas nakhabi aru pani bhi napibi. 8Manuh aru janwar sob chatai kapor pindhi lobi, aru sob manuh pura takot pora Isor ke jor pora matibi. Sob manuh nijor biya rasta pora aru nijor hath laga hinsa pora ghuri jabi. 9Kun jane? Isor ghuri kene Tar mon bodlibo pare, aru Tar teja khong pora ghuri jabo pare, titia amikhan nosto nahobo.
10Jitia Isor tarkhan laga kaam khan dikhise—tarkhan nijor biya rasta pora ghuri jaise koi kene—titia Isor tarkhan uporte anibole kowa dukh-digdar laga bare te Tar mon bodli dise, aru eitu kaam kora nai.