Mwai Waciwiri
Fala la Baba wathu lidza kaciwiri ndipo Yona aenda, mbafamba ntsiku imbodzi kupita mu Ninive toera kupangiza kuti padasala ntsiku makumi manai mbuto ninga yapidigulwa. Nzinda onsene ukhulupira, mambo asiya mpando wace waumambo mbabvala masaka na kukhala m'mapulusa, ndipo pidaona Mulungu kuti iwo asanduka, iye nee aapfudza.
3 1Na tenepo fala ya Baba wathu yabwera kuna Yona kaciwiri, mbilonga tenepa:
2“Lamuka, ndoko ku Ninive, nzinda ukulu ule, mbumwaza mphangwa zinakupanga Ine.”
3Na tenepo Yona alamuka mbaenda ku Ninive, ninga mudalongera Baba wathu. Ninive ukhali nzinda ukulu kakamwe—wa ntsiku zitatu toera kuuwambuka. 4Yona afamba ntsiku ibodzi mukupita n'nzinda, mbakhuwa tenepa: “Ntsiku makumanai pontho, buluka penepo Ninive inagomolwa!” a a v4 Fala "kugomolwa" iri na mabvekero mawiri mwakusankhula—inakwanisa kubveka kufudzwa peno kutendeuka, kudzumatirisa kunakwanirisika m'khundu inatsalira ya kapitulu iyi.
5Anthu a ku Ninive akhulupira Mulungu. Acemera kudjidjima, mbabvala nguwo za masaka, kutomera kwa akulu mpaka kwa ang'ono.
6Mphangwa pizafika kuna mambo wa Ninive, iye alamuka pa mpando wace waumambo, abvula nguwo yace, mbalibvungira na nguwo za masaka, mbakhala pa dota. 7Iye acitisa kumwazwa mphangwa iyi mu Ninive, mwa ntemo wa mambo na akulu ace, kuti: Nkhabe munthu peno cirombo, ng'ombe peno mabira, cinafunika kulawa cinthu; iwo nkhabe kudya uswa nee kumwa madzi. 8Anthu na pinyama mbabvungirwe na nguwo za masaka, munthu onsene akhuwe kuna Mulungu na mphambvu zace zonsene. Munthu m'bodzi na m'bodzi mbatcunyuke njira yace yakuipa na uphanga uli m'manja mwace. 9Mbani anadziwa? Panango Mulungu anatcunyuka mbacinja manyerezero ace, mbabuluka mu ukali wace waukulu, toera ife tikhonde kufudzwa.
10Mulungu pidaona Iye macitiro awo, kuti iwo abuluka mu njira yawo yakuipa, Mulungu acinja manyerezero ace thangwi ya nyatwa ikhafuna kuabweresera, mbakhonda kuicita.
