Isaiah 40

40 ¹Iwui mibingli ning lum ngasakmilu, ning lum ngasakmilu, da nathumwui Avāna hānga. ²Jerusalemli nimshimri eina ngaroklu, awui otram kasak kuphaira, awui khayonkhamāng pheomihaira, kala awui morei saikorawui vang ithumwui Avāwui pāng eina khani samphanghaira da ali vaosanglu.

³Akhon akhana ngavao: Lamhāngli, ithumwui Avāwui shongfa ngarānlu; siwukli ithumwui Avāwui vang chānrei ngatar akha sālu. ^a a v3 Gospel mati kachungkhana lamhāngli ngavaowui kahāng chiwui marān hi, Jishuwui shongfa ngarānme ra̱hikme Johnli tāzak eina hānga (Mark 1:3, Matthew 3:3, Luke 3:4, John 1:23). Awui shongfa ngarānme chi Jishuna, awuilungli ithumwui Avāna awui mibingli rai. ⁴Leiwuk kachiva̱ reingasakra, kala phungrei phungrā kachiva̱ nemngasakra; khamakhui ngalei chi ashāt sāngasakra, kala kokataropam chi tampāk ngasakra. ⁵Kala ithumwui Avāwui tekhamatei phongmira, kala mi saikorana china ngasoda theira, kaja ithumwui Avāwui khamorna hānghaira.

⁶Akhon akhana hānga, "Ngavaolu!" Kala ina hānga, "Ina khi ngavaora?" Mi saikora khawo kathāna, kala athumwui ning katong saikora tampākwui awon kathāna. ⁷Ithumwui Avāwui khaksuina chitungli phan tharan, khawo ngahuihaowa, awon pa̱tāhaora; mashungda, mibing chi khawona. ⁸Khawo ngahuihaowa, awon pa̱tāhaora, kha ithumwui Avāwui tui katang mavaila nganingchingra.

⁹Kaphung kajui akhali kālu, O Zion, pao kaphā vaosanglu; nawui akhon pang eina reingasaklu, O Jerusalem, pao kaphā vaosanglu. Reingasaklu, mangacheealu; Judah keinungbingli hānglu, "Yanglu, nathumwui Avā!" ¹⁰Yanglu, Avā Proho yāng eina rāra, kala awui pāngtheina amāngwui vang mungra; yanglu, sāman chi awuili lei, kala awui aman awui mangāshong vāra. ¹¹Yaokahoma thāda awui yaobing kahoma sāra; yaonaobing awui pāngli kazipra, kala awui wuklungshong nganim eina vamzatra; anao khalei yaobingli nimshimri eina thānzatra. ^b b v11 Ithumwui Avā chiya awui yaonaobing kazipta awui wuklungshong nganim eina vamkhume yaokahomana. Jishuna, "I kaphā yaokahomana" da hānga tharan (John 10:11), yaokahomawui khamayon akhamāng hi khuisai. ¹²Khipāna apāng khurli tara̱ tamkhuikhala, kala apāng aret eina kazingram ngareikhuikhala, okathui chifa akhum eina tamkazipta, kala kaphung chi khāntam, phungrā chi sheronli khān tamkhuikhala? ¹³Khipāna ithumwui Avāwui Manglā ngarānkhala, lah awui ngakuime thāda ali tamchitheikhala? ¹⁴Ana khipāli ngasan, kala khipāna ali theishingkhui ngasakkhala? Khipāna ali mashunwui shongfa tamchitheikhala, theikakhui tamchitheikhala, kala theishingkakhuiwui apong chitheikhala? ¹⁵Miyurbing chi tara̱ lukwui eina tā akha kathāna, kala khāntamtungwui chifa thāda shānkhui; ana yikuirambing chi chifa khateo thāda khāngmathota. ¹⁶Lebanon chi mei sākai khavai mashapmana, kala chiwui sāyurbing rikkatā kachigatwui vang mashapmana. ¹⁷Miyur saikora awui mangāli khikha maleila kathāna; athumli ana khikha maleilala eina teomei kala khamasai thāda khuisanga. ¹⁸Chithākha nathumna ithumwui Avāli khipāli pāndamra? Kala khi khangachā eina ali ngaheora? ¹⁹Meoma̱ chi them kasaana shungkhui, kala sina kasaana chili sinā eina rommithai, kala chiwui vang lupāsā apeng sāsanga. ²⁰Hithā pha̱khavaiwui vang kachāma khavai a china mashuitā kahai thing kapangkhui; ana mangatha̱ kahai meoma̱ nganing ngasak khavai them kasaa kashapali phākhui. ²¹Nathumna matheimarala? Nathumna manganāhairala? Haokaphokli nathumli mahānghaikhairala? Okathui shimphungawui eina nathumna bhap matāhairala? ²²Ana okathuiwui ngasun khavaipam atungshong pama, chiwui azingshong khalei mibing chi khaoh kathāna; ana kazingram chili mairār tāham thāda hārshoka, okthui khavai kachonshim thāda haihai. ²³Ana wungnaobingli nothā ngasak, kala okathui khamungabingli khikha makānkhanā thāda ngasak. ²⁴Athum saklak eina lingsang, saklak eina yaosang, athumwui akung saklak eina ngaleilungli angayung sa̱khui, ana athumtungli phan tharan athum ngahuihaowa, kala siphanna athumli lanji thāda phanthuihaowa.

²⁵"Chithākha I khipāli ngaraichāra da nathumna ili ngaheora?" da Katharana hānga.

²⁶Kazingramshong yangkālaga yanglu: hibing khipāna sākhuikhala? Ana athumwui ashangva̱ mashing eina khuithuikhame, athum saikorawui aming ana phokmi; kaja ana yāngla hakmahā kala pangshapli pangmei kahaiwui vang, akhala mashimānmana. ²⁷O Jacob, O Israel, khisāda nana, "Iwui shongfa ithumwui Avāwui eina ngathumhaira, kala iwui Avāna iwui athut mahengkasang," da hāngda mayāngaikhala? ²⁸Nathumna matheimarala? Nathumna manganāhairala? Ithumwui Avā chi katang makhavai Avā, okathui akatangbingwui Kasā Akhavāna. Ana mavānmara, machatphalungmara; awui theishingkakhui chi khipākha mafathuishapmana. ²⁹Ana kakhanangbingli pangshap sangmi, kala pangshap makhaleibingli yāng mataisangmi. ³⁰Yaronnaobinglila vānda chatphalungra, kala yarshoshova̱bing vānlaga kongluihaora; ³¹kha ithumwui Avāli khangaraibingna athumwui yāng semkaluishitra; athumna khalāngwui angachāng thāda yongkāra; athumna yongra, kha mathāhaimara; athumna zatra, kha mavānmara.