Aịzaya 40 FHB Father's Heart Bible™

40 ¹Kasịenụ obi, kasịenụ ndị m obi, ka Nna unu kwuru. ²Jirinụ obiọma gwa Jerụsalem okwu, ma kwusaara ya na ọrụ ike ya emechaala, na agbagharala ya ajọ omume ya, na o sitela nʼaka Nna anyị nata ihe okpukpu abụọ maka mmehie ya niile.

³Otu olu na-eti mkpu sị: Nʼime ọzara, dozienụ ụzọ Nna anyị; meenụ okporo ụzọ ziri ezi nʼime ọzara maka Nna anyị. ^a a v3 Oziọma anọ niile jiri amụma a banyere olu nke na-eti mkpu nʼọzara mee ihe banyere Jọn Omee Baptizim, onye na-edozi ụzọ maka Jisọs (Mak 1:3, Matiu 3:3, Luk 3:4, Jọn 1:23). Onye ahụ a na-edoziri ụzọ ya bụ Jisọs, onye Nna anyị si nʼime ya bịakwute ndị ya. ⁴A ga-ebuli ndagwurugwu ọbụla elu, meekwa ka ugwu ukwu na ugwu nta ọbụla dị ala; ala dị mgbagọ ga-aghọ ala dị larịị, ebe ndị dị nkọ ga-aghọkwa mbara ala. ⁵A ga-ekpughekwa ebube Nna anyị, mmadụ niile ga-ahụkọkwa ya ọnụ, nʼihi na ọnụ Nna anyị ekwuola.

⁶Otu olu na-asị, “Tie mkpu!” Asịkwara m, “Gịnị ka m ga-eti mkpu ya?” Mmadụ niile dị ka ahịhịa, ikwesị ntụkwasị obi ha niile dịkwa ka okoko osisi nke ọhịa. ⁷Ahịhịa na-akpọnwụ, okoko osisi na-achanwụ mgbe ume Nna anyị fekwasịrị ya; nʼezie, ndị mmadụ bụ ahịhịa. ⁸Ahịhịa na-akpọnwụ, okoko osisi na-achanwụ, ma okwu Nna anyị na-eguzosi ike ruo mgbe ebighị ebi.

⁹Rigoro nʼelu ugwu dị elu, gị Zayọn, onye na-ezisa ozi ọma; jiri ike welie olu gị elu, gị Jerụsalem, onye na-ezisa ozi ọma. Welie ya elu, atụla egwu; gwa obodo niile nke Juda sị, “Lee Nna unu!” ¹⁰Lee, Nna anyị, Onye kachasị ihe niile ji ike na-abịa, ogwe aka ya na-achịrị ya achị; lee, ụgwọ ọrụ ya dị ya nʼaka, ihe nkwụghachi ya na-agakwa ya nʼihu. ¹¹Ọ ga-azụ igwe atụrụ ya dị ka onye ọzụzụ atụrụ; ọ ga-eji ogwe aka ya chịkọta ụmụ atụrụ, kukuru ha nso nʼobi ya; ọ ga-ejikwa nwayọọ duo ndị na-enye ụmụ ha ara. ^b b v11 Nna anyị bụ onye ọzụzụ atụrụ ahụ na-achịkọta ụmụ atụrụ ya ma kukuru ha nso nʼobi ya. Jisọs weere otu nlekọta onye ọzụzụ atụrụ a mgbe ọ sịrị, “Abụ m ezi onye ọzụzụ atụrụ” (Jọn 10:11). ¹²Onye ji ọbọ aka ya tụọ mmiri niile, werekwa obosara aka ya tụọ mbara eluigwe, tinye aja ụwa nʼihe ọtụtụ, jirikwa ihe ọtụtụ tụọ ugwu ukwu na ugwu nta? ¹³Onye duziri Mmụọ nke Nna anyị, ka ọ bụ onye ndụmọdụ ya zịrị ya ihe? ¹⁴Onye ka ọ gakwuru maka ndụmọdụ, onye mekwara ka ọ ghọta ihe? Onye kụziiri ya ụzọ ikpe ziri ezi, ¹⁵Mba niile dị ka otu ùdù mmiri si nʼime bọket dapụta, a na-agụkwa ha dị ka aja dị nʼelu ihe ọtụtụ; ọ na-ebuli agwaetiti niile dị ka aja dị nro. ¹⁶Lebanọn ezughị maka ịkwanye ọkụ, anụmanụ ya ezughịkwa maka aja nsure ọkụ. ¹⁷Mba niile dị ka ihe efu nʼihu ya; ọ na-agụ ha dị ka ihe na-erughị ihe efu na ihe tọgbọrọ chakoo. ¹⁸Onye ka unu ga-eji Nna anyị tụnyere? Maọbụ oyiyi gịnị ka unu ga-eji tụnyere ya? ¹⁹Arụsị! Onye ọkwa nka na-akpụ ya, onye na-akpụ ọlaedo ejikwa ọlaedo machie ya, kpụkwara ya ụdọ ọlaọcha. ²⁰Onye ọbụla dara ogbenye nke na-apụghị iweta onyinye dị otú ahụ na-ahọrọ osisi nke na-agaghị ere ure; ọ na-achọ onye ọkwa nka nwere nkà ka o guzoro ya arụsị nke na-agaghị ada ada. ²¹Ị maghị? Ị nụghị? Ọ bụ na a gwaghị gị ya site na mmalite? Ị ghọtaghị ya kemgbe ntọala ụwa? ²²Ọ na-anọ nʼocheeze nʼelu mkpuke ụwa, ndị bi nʼime ya dị ka igurube; ọ na-agbasa mbara eluigwe dị ka ákwà mgbochi dị gịrịgịrị, na-ama ya dị ka ụlọ ikwu nke a ga-ebi nʼime ya. ²³Ọ na-eme ka ụmụ eze ghọọ ihe efu, meekwa ka ndị na-achị ụwa ghọọ ihe efu. ²⁴Ha ka bụ ihe a kụrụ ọhụrụ, ihe a ghakwara mkpụrụ ya ọhụrụ, ogwe ha etinyebeghị mgbọrọgwụ nʼala, mgbe ọ na-afekwasị ha ume, ha na-akpọnwụ, oke ifufe na-ebufukwa ha dị ka igbugbo ọka.

²⁵Onye Nsọ ahụ na-asị, “Onye ka unu ga-eji m tụnyere, ka m wee dị ka ya?”

²⁶Welienụ anya unu elu lee mbara eluigwe: onye kere ihe ndị a? Ọ bụ onye na-eduru igwe ha pụta nʼusoro ọnụọgụgụ, na-akpọ ha niile aha; nʼihi na o buru ibu nʼike, dịkwa ukwuu nʼike, ọ dịghị otu nʼime ha na-efu efu. ²⁷Gịnị mere i ji na-ekwu, gị Jekọb, na-atamukwa ntamu, gị Izrel, sị, “Ụzọ m zoro ezo nʼebe Nna anyị nọ, Nna m anaghịkwa elebara ikike m anya”? ²⁸Ị maghị? Ị nụbeghị? Nna anyị bụ Nna nke na-adị ruo mgbe ebighị ebi, Onye kere nsọtụ niile nke ụwa. Ike adịghị agwụ ya, ọ naghịkwa ada mba; ọ dịghị onye pụrụ ịghọta omimi nghọta ya. ²⁹Ọ na-enye ndị ike gwụrụ ike, na-emekwa ka ndị na-enweghị ike nwee ike karịa. ³⁰Ọbụladị ndị na-eto eto ga-ada mba ma gwụ ike, ụmụ okorobịa ga-adakwa nʼala nʼihi ike ọgwụgwụ; ³¹ma ndị na-echere Nna anyị ga-enwetagharị ike ọhụrụ; ha ga-eji nku felie elu dị ka ugo; ha ga-agba ọsọ ma ike agaghị agwụ ha; ha ga-aga ije ma ha agaghị ada mba.