Yangkashebingna Avāwui Shim Ngakaisha
Yangkashebingna shim sākhavai ngachonmipai da hāngda mayāmi, chieina athumna ot chi masāleng khavai sāda: ot kasābingli ning suitā ngasak, otva̱bing phāsang, kala khamaphangāli Persiawui awungali Jerusalem hi rai kasā keinungna da lairik kapimi. Lairik yangkahai athishurda athumwui tui mashunga, kala ithumwui Avāwui shimwui ot chi kum kachungkha pangshap eina ngasāmhaowa.
4 1Judah eina Benjaminwui yangkashebingna, raithā kahaiwui eina latkhaungbingna ithumwui Avāli khorumshim sākāda lei kaji kashā tharan, 2athum Zerubbabel eina shimkhurwui kathānabingli rālaga hānga, "Nathumli ngasoda sākāsa; kaja nathum tākam eina ithumnala nathumwui Vareli phai, kala ithumli hili khuirā Assyriawui awunga Esarhaddonwui thotli lāngda ithumna ali pha̱phayāching."
3Kha Zerubbabel, Jeshua, kala Israelwui khangatei shimkhurwui kathānabingna athumli hānga, "Ithumwui Avāli shim kasā pongli nathumwui yar ithumli ngasoda maleimana. Persiawui awunga Cyrusna ithumli kakaso athishurda, ithumtongna ithumwui Avāwui vang sākāra."
4Chieina ngalei chiwui mibingna Judah mibingwui pāng ngazan ngasakta, sākā masāthuk khavai athumli ngacheenā ngasaka. 5Persiawui awunga Cyrusna munglakha eina Persiawui awunga Dariusna munglakha eina tangda, athumna athumli ngakaishida ot sākhavai kala athumwui khangarān nguithui ngasak khavai machinmebingli pheisā mi. 6Ahasueruswui khamung haokaphokli, athumna Judah eina Jerusalemli kapambingwuitungli kaphen kapi.
Avāwui Mibingwuitungli Chithi Akha
7Ar-ta-xerxesna munglakha, Bishlam, Mithredath, Tabe-el, kala athumwui ngasotnaobingna Persiawui awunga Ar-ta-xerxesli chithi kapi; chithi chi aram mayek eina kapida aram tui eina khalatshoka. 8Kathāna Rehum eina kapime Shimshaina awunga Ar-ta-xerxesli Jerusalemwuitungli chithi akha kapi: 9Kathāna Rehum, kapime Shimshai, kala athumwui khangatei ngasotnaobing, kaja Erechwui mi, Babylonnaobing, kala Susawui mi (chiya, Elamnaobing) wuitungli khamungabing bichar kasābing, wungnaobing, kala khayaiwobing, 10kala reikhameiya, khayākakā Osnapparna tukkhuilaga Samaria keinung kala Kong Makandawui ngalei khangateili chipam ngasak kahai khangatei yurbing, a a v10 Kong Makandawui ngalei chi Euphrates Kongwui zingtunshong khalei Persiawui leiretna, Syria kala Judah kuimareiwui ngaleibing khangashunhaina.
11Ali chihovā kahai chithi kakapi chi hithai: Nawui raobing, Kong Makandawui ngaleiwui mibingna awunga Ar-ta-xerxesli chiphuna. Kala ara, 12Awungana theiranu: nawui eina ithumli kharā Jehudibing Jerusalemli vāshunghaira. Athumna ngakaikashe, makhayā keinung chi sakāluida lei, phākho sākupra kala shimphunga chiphoda lei. 13Awungana theiki kajina: keinung hi sakāluida awui phākho kupakha, athumna shai, khāshinā, kala khangatatei mamimara, kala awungawui lanshimli kashimān phungra. 14Ithum konungwui eina ringphāda leiwui vang, kala awungali mautshit hai chi thei chi ithumwui vang makhangayimawui vang, awungali unghang khavai pao chihovāra, b b v14 "Konungwui saol zā" kaji tui hi awungawui otram khangatha̱da, ali ngashithaida kharona kharing khavai kakhalatna. 15chiwui vang navā ngarāwui kashān lairikli phai kajina. Kashān lairik chili nana keinung hi ngakaikashe, awungabing kala ngaleibing makaphā, kala achālakhawui eina rai sākhavai thānkashoka keinung akhana da samphangra. Chiwui vang eina keinung chi sakhaimihaira. 16Ithumna awungali unghāngra: keinung hi sakāluida awui phākho kupakha, Kong Makandawui ngaleili nawui yar maleiluimara.
17Awungana ngahānkai: kathāna Rehum, kapime Shimshai, kala Samariali apam eina Kong Makandawui ngalei khangateili khalei athumwui ngasotnaobingli: Shālam hāngli. Kala ara, 18Nathumna ithumli chihovā chithi chi ili pāchitheida hāngkahai mihaira. 19Ina phāyang khavai kasoi, kala keinung hi kasāngkha eina awungabingli thuingararda, ngakaikashi kala khangashao khangasaka kaji ina theihaowa. 20Kapangpanga awungabingna Jerusalemli kala Kong Makanda ngalei saikorali munglaga, shai, khāshinā, kala khangatatei shai khuisai. 21Ara mibing hili thahaolu da kasolu, chithākha ina kakaso mimahunglakha eina tangda keinung hi masākāluiranu. 22Mang hi mayansānghailu. Khisāda hi khangacha mataisangda awungabingwui vāngmāng sākashi sārakhala?
23Awunga Ar-ta-xerxeswui kakapi chithi chi Rehum, kapime Shimshai, kala athumwui ngasotnaobingli pālaga, athumna Jerusalemli khalei Jihudibingli thaklāk eina vāda, pangshap kala shapana athumli khāmhaowa. 24Chieina Jerusalemli ithumwui Avāwui shim kasā ot chi ngasāmhaowa; kala Persiawui awunga Dariusna mungda kakhane kum eina tangda ngasāmsangda pamsai.
