Avāwui Hanphut Luishit Sākā
Khorumshim masāranglakha, latkhaung kahai mibingna ithumwui Avāwui hanphut chi akhare hanphutli sakāmi — ngalei chiwui mibingli ngacheeda — kala ngathor ngazinwui kachigat saklui. Shimphunga sākup kahai tharan, khare shim chi theikahai ararnaobingna vaoda chapa, kala kateibingna khamathānwui vang panglāk eina vaoshoka.
3 1Kachāng kashineli, Israelnaobing athumwui keinungbingli sompamlakha, mibingna akha thada Jerusalemli rākazipa. 2Chiwui thili Jozadakwui naomayara Jeshua eina awui achinā ngarā pāngmonbing, kala Shealtielwui naomayara Zerubbabel eina awui ngasotnaobingna ngakarthuida, ithumwui Avāwui mi Moseswui ainli kapihaida lei athishurda, chiwuitungli rikkatā kachigat chigatkhavai ithumwui Avāwui hanphut sākā. 3Athumna hanphut chi awui shimphungabing tungli rungshinghaida, athumli kuimareida khalei mibingli ngacheehaida, chiwuitungli ithumwui Avāli ngathor kala ngazinshong rikkatā kachigat chigata. 4Athumna chumpha̱ phanit chi kapihaida lei athishurda mayona, kala thangkachida khangachā athishurda mashing eina rikkatā kachigat chigata. 5Chiwui thili, athumna machatlakla rikkatā kachigat, kachāng kadharwui kachigat, ithumwui Avāwui kathara langchinbing saikora, kala ithumwui Avāli lemmet kachigat khami mi saikorawui kachigat chigata. 6Kachāng kashinewui kharethang eina thuilaga, athumna ithumwui Avāli rikkatā kachigat chigatphoka, kha ithumwui Avāwui khorumshimwui shimphunga chitharan makhorkuprangsai. 7Athumna ngalung mistribing kala thing mistribingli pheisā mia, kala Persiawui awunga Cyrusna athumli kakaso mihai athishurda, Lebanonwui eina cedarthing shamadru lamli Joppali khuirā khavai, Sidonnaobing eina Tyrewui mibingli kashakazā, mangkazā, kala thao mia.
Avāwui Shim Sāphokta
8Athumna Jerusalemli ithumwui Avāwui shimli vākashung kum kakhanewui kachāng kakhaneli, Shealtielwui naomayara Zerubbabel eina Jozadakwui naomayara Jeshuana athumwui mi kateibing, kaja pāngmonbing, Levinaobing, kala tukthui eina Jerusalemli latunga kabing saikorali ngasoda ot chi sāphoka. Athumna zingkum maga̱wui eina thuilaga chiwui atung Levinaobingli ithumwui Avāwui shimwui ot yangmi khavai kapangsang. 9Chiwui thili Jeshua, awui naomayarabing eina achinā ngarā, kala Kadmi-el eina awui naomayarabing, Judahwui naomayarabing, kala Henadadwui naobing, athumwui naomayarabing eina achinā ngarā Levinaobing ngasoda, ithumwui Avāwui shimli ot sābingli yangmi khavai akha thada ngaruma.
10Shim kasābingna ithumwui Avāwui khorumshim shimphunga khorkuphao tharan, sāri ngavaikhuilaga pāngmonbingna talla̱ singriplaga nganinga, kala Levinaobing, Asaphwui naomayarabingna Israelwui awunga Davidna kakaso athishurda ithumwui Avāli masot chikat khavai kortar singda nganinga. 11Athumna akha eina akha ngahānkāda ithumwui Avāli masot kala ningkashi mida laa sanga: "Kaja a phālaka; awui Israelwui vang makhangachei leikashi katang mavaimana." Mi saikorana ithumwui Avāwui shim shimphunga khorkuphaowui vang panglāk eina masot khamathānkhon vaowa.
12Khare shim chi kathei pāngmon khararnaobing, Levinaobing kala shang-shangwui kathānabing kachungkhana, hi shimwui shimphunga athumwui mik mangāli khorkuphao tharan panglāk eina chapa; kha khangatei kachungkhana khamathānna vaowa. 13Mi khipānakha khamathānwui vaokhon eina kachapkhon khangatei matheirarthuwa, kaja mibingna panglāk eina vaoda, chiwui khon katāli eina tangda shāhaowa.
