እዝራ 3 FHB Father's Heart Bible™

3 ¹ኣብ ሻውዐይቲ ወርሒ፥ ደቂ እስራኤል ኣብ ከተማታቶም ተቐሚጦም እንተለዉ፥ እቶም ህዝቢ ከም ሓደ ሰብ ኮይኖም ኣብ ኢየሩሳሌም ተኣከቡ። ²ሽዑ ኢያሱ ወዲ ዮሳዳቅን ኣሕዋቱ ካህናትን፥ ዘሩባቤል ወዲ ሰላትያልን ብፆቱን፥ ከምቲ ኣብ ሕጊ ሙሴ፥ ሰብ ኣቦና፥ ዝተፅሓፈ፥ ኣብ ልዕሊኡ ዝቃፀል መስዋእቲ ምእንቲ ኸቕርቡ፥ መሰውኢ ኣቦና ክሃንፁ ተልዒሎም ሰርሑ። ³ነቲ መሰውኢ ኣብቲ መሰረት ኣቖምዎ፤ ነቶም ኣብ ዙርያኦም ዘለዉ ህዝብታት ፈሪሖም ድማ፥ ኣብ ልዕሊኡ ንኣቦና ናይ ንግሆን ናይ ምሸትን ዝቃፀል መስዋእቲ ኣቕረቡ። ⁴ከምቲ ዝተፅሓፈ ድማ በዓል ዳስ ኣብዓሉ፤ ነቲ ነብመዓልቲ ዝቃፀል መስዋእቲ ኸዓ ከከምቲ ነፍሲ ወከፍ መዓልቲ ዝግባእ ስሩዕ ቍፅሪ ኣቕረቡ። ⁵ድሕሪዙይ ድማ ነቲ ናይ ኵልሻዕ ዝቃፀል መስዋእትን ነቲ ናይ ወርሒ እትወፀላ በዓል መስዋእትን ነቶም ኵሎም ቅዱሳት በዓላት ኣቦናን፥ ንኣቦና ብፍቓዱ መስዋእቲ ዘቕረበ ዅሉ ሰብ ውህብቶን ኣቕረቡ። ⁶ካብ ቀዳመይቲ መዓልቲ ናይታ ሻውዐይቲ ወርሒ ጀሚሮም ንኣቦና ዝቃፀል መስዋእቲ ኸቕርቡ ጀመሩ፤ መሰረት ቤተ መቕደስ ኣቦና ግና ገና ኣይተመስረተን ነበረ። ⁷ነቶም ወቐርቲ እምንን ፀረብትን ገንዘብ ከፈሉ፤ ከምቲ ቂሮስ ንጉስ ፋርስ ዝፈቐደሎም ድማ፥ ካብ ሊባኖስ ናብ ኢዮጴ ብባሕሪ ኦም ፅሕዲ ምእንቲ ኸምፅኡ፥ ንሲዶናውያንን ንሰብ ጢሮስን መብልዕ መስተን ዘይትን ሃብዎም።

ቤት ኣቦና ክትህነፅ ትጅምር

⁸ናብ ቤት ኣቦና ኣብ ኢየሩሳሌም ምስ በፅሑ፥ በታ ኻልአይቲ ዓመት ኣብ ካልኣይ ወርሒ፥ ዘሩባቤል ወዲ ሰላትያልን ኢያሱ ወዲ ዮሳዳቅን፥ ምስ ዝተረፉ ህዝቦም፥ ካህናትን ሌዋውያንን ካብ ምርኮ ናብ ኢየሩሳሌም ዝተመለሱ ዅሎምን ኮይኖም፥ ነቲ ዕዮ ጀመርዎ። ኣብ ልዕሊ እቲ ዕዮ ቤት ኣቦና ድማ፥ ዕድመኦም ካብ ዕስራ ንላዕሊ ዝኾኑ ሌዋውያን ሸሙ። ⁹ሽዑ ኢያሱ፥ ደቁን ኣሕዋቱን፥ ቃድሚኤልን ደቁን፥ ደቂ ይሁዳ፥ ነቶም ኣብ ቤት ኣቦና ዝሰርሑ ኽከታተሉ ተሓባቢሮም ተላዓሉ፤ ምስኣቶም ድማ ደቂ ሔናዳድ፥ ደቆም ምስ ኣሕዋቶም፥ ሌዋውያን ነበሩ።

¹⁰እቶም ነደቕቲ መሰረት ቤተ መቕደስ ኣቦና ምስ ኣንበሩ፥ ከምቲ ዳዊት ንጉስ እስራኤል ዝኣዘዞ ንኣቦና ምእንቲ ኽውድሱ፥ ካህናት ክዳውንቲ ተኸዲኖም ምስ መለኸት፥ ሌዋውያን ድማ ደቂ ኣሳፍ ምስ ፀናፅል ደው በሉ። ¹¹ንኣቦና እናወደሱን እናኣመስገኑን ተመላሊሶም ዘመሩ፦ “ንሱ ሕያዋይ እዩ፤ ምሕረቱ ንእስራኤል ንዘለኣለም ይነብር።” እቲ መሰረት ቤት ኣቦና ስለ ዝተመስረተ ድማ፥ ኵሉ እቲ ህዝቢ ብምስጋና ዓብዪ ድምፂ ዓለሉ።

¹²ነታ ቐዳመይቲ ቤት ዝረኣዩ ብዙሓት ሽማግለታት ካህናትን ሌዋውያንን ኣሕሉቕ ዓሌት፥ መሰረት እዛ ቤት እዚኣ ኣብ ቅድሚ ዓይኖም ምስ ተመስረተ ዓው ኢሎም በኸዩ፤ ብዙሓት ካልኦት ግና ብሓጐስ ዓለሉ። ¹³እቲ ህዝቢ ኣዝዩ ዓው ኢሉ ስለ ዝዓለለ፥ ድምፂ ሓጐስ ካብ ድምፂ ብኽያት ዝፈሊ ሓደ እኳ ኣይነበረን፤ ድምፁ ድማ ናብ ርሑቕ ተሰምዐ።