Pitri laga bedi aru ekbar khara hoise

Mandir eku khara hobole age, ulti aha manuh khan pora amar Pitri laga bedi ke tai laga purana bhetimul uporte ekbar bonaise — chari pase thaka manuh khan ke bhoi kori kene — aru hodai din laga boli khan aru shuru korise. Bhetimul rakha homoi te, poila ghor ke monot rakha burha manuh khan, dusra khan jor pora chilai thaka nisena, etiya jor pora kandise.

Adhyay 3.

Sat-ta mohina te, Israel manuh khan nijor sheher khan te bohi thaka homoi te, manuh khan Jerusalem te eke logot joma hoise. Tetiya Jozadak laga putro Jeshua aru tar sathi purohit khan, aru Shealtiel laga putro Zerubbabel aru tar sangi khan, kaam shuru kori kene amar Pitri laga bedi bonaise, eitu uporte jula boli dibole, amar Pitri laga manuh Moses laga Niyom te likha thaka nisena. Tarkhan bedi tu eitu laga bhetimul uporte khara korise, kilemane tarkhan ke gherikena thaka desh laga manuh khan ke bhoi korise, aru phojur aru saam te eitu uporte amar Pitri ke jula boli dise. Tarkhan likha thaka nisena Tombu laga Purbb manaise, aru hodai din laga jula boli khan, prottek din nimite lagi thaka ginti te dise. Eitu pichete, tarkhan hodai somoi laga jula boli khan, notun chand laga boli khan, amar Pitri laga sob pobitro purbb khan, aru kun manuh amar Pitri ke nijor itcha pora boli anise, tar laga uphar khan dise. Sat-ta mohina laga prothom din pora, tarkhan amar Pitri ke jula boli dibole shuru korise, kintu etiya tak amar Pitri laga mondir laga bhetimul bona nai. Tarkhan rajmistri aru barhoi khan ke taka dise, aru Sidon aru Tyre laga manuh khan ke kha-luwa, paani aru tel dise, Lebanon pora samundar laga rasta pora Joppa te devdaru laga kath khan anibole, Persia laga raja Cyrus pora tarkhan ke hukum diya nisena.

Pitri laga ghor khara hobole shuru hoise

Tarkhan Jerusalem te amar Pitri laga ghor te punchi juwa pichete, dusera bosor laga dusera mohina te, Shealtiel laga putro Zerubbabel aru Jozadak laga putro Jeshua pora kaam shuru korise, tarkhan laga baki manuh khan logot te—purohit khan, Levi khan, aru kun khan bondhi-ghor pora Jerusalem te wapas ahhise, taikhan sob logote. Tarkhan bis bosor aru tar uporte thaka Levi khan ke amar Pitri laga ghor laga kaam uporte rakhise. Tetiya Jeshua, tar laga putro khan aru bhai khan, aru Kadmiel tar putro khan logote, Judah laga putro khan, amar Pitri laga ghor te kaam kora khan ke sa-bole eke logot joma hoise—Henadad laga putro khan, tarkhan laga putro khan aru bhai khan, Levi khan, taikhan logote.

Jitia ghor-bona manuh khan pora amar Pitri laga mondir laga bhetimul banaise, tetiya purohit khan nijor kapra pindhi kene bigul loi kene khara hoise, aru Levi khan, Asaph laga putro khan, jhanjh loi kene, Israel laga raja David pora hukum diya nisena amar Pitri ke stuti koribole. Tarkhan ekjon-ekjon ke jawab di kene git gaise, amar Pitri ke stuti aru dhanyabad di kene: “Tai bhal ase; Israel nimite Tar laga biswasi morom hodai nimite thake.” Aru sob manuh pora dangor awaj pora stuti korise, kilemane amar Pitri laga ghor laga bhetimul bonai dise.

Bisi bura purohit khan, Levi khan, aru khandan laga mukhiya khan, kun khan prothom ghor tu dikhise, taikhan eitu ghor laga bhetimul tarkhan laga suku age te bonai diya homoi te dangor awaj pora kandise, kintu dusra bisi manuh khushi pora hala-golla korise. Kun bhi khushi laga hala-golla aru kanda laga awaj alag koribole para nai, kilemane manuh khan iman dangor awaj pora hala korise je eitu dur pora bhi huni paise.