Ezra 2

2 ¹Hi leikhaiwui mibing raithā kahaiwui eina ungabing chi hina; athum Babylonwui awunga Nebuchadnezzarna Babylonli tukvā kahaibingna. Athumna Jerusalem eina Judahli, mi kachiva̱ kachichā keinungli hanunga. ²Athumna Zerubbabel, Jeshua, Nehemiah, Seraiah, Reelaiah, Mordecai, Bilshan, Mispar, Bigvai, Rehum, kala Baanahli ngasounga. Israel mibingwui mashing:

³Paroshwui naomayarabing, thingkhani shākha hangshinida khani; ⁴Shephatiahwui naomayarabing, shākathum hangshinida khani; ⁵Arahwui naomayarabing, shāshini hangshinida phangā; ⁶Pahath-moabwui naomayarabing, kaja Jeshua eina Joabwui naomayarabing, thingkhani shāchishat tharāda khani; ⁷Elamwui naomayarabing, thingkha shākhani hangphangāda mati; ⁸Zattuwui naomayarabing, shāchiko hangmatida phangā; ⁹Zaccaiwui naomayarabing, shāshini hangtharuk; ¹⁰Baniwui naomayarabing, shātharuk hangmatida khani; ¹¹Bebaiwui naomayarabing, shātharuk maga̱da kathum; ¹²Azgadwui naomayarabing, thingkha shākhani maga̱da khani; ¹³Adonikamwui naomayarabing, shātharuk hangtharukta tharuk; ¹⁴Bigvaiwui naomayarabing, thingkhani hangphangāda tharuk; ¹⁵Adinwui naomayarabing, shāmati hangphangāda mati; ¹⁶Aterwui naomayarabing, kaja Hezekiahshi, hangchikoda chishat; ¹⁷Bezaiwui naomayarabing, shākathum maga̱da kathum; ¹⁸Jorahwui naomayarabing, shākha tharāda khani. ¹⁹Hashumwui naomayarabing, shākhani maga̱da kathum. ²⁰Gibbarwui naomayarabing, hangchikoda phangā. ²¹Bethlehemwui mibing, shākha maga̱da kathum. ²²Netophahwui mibing, hangphangāda tharuk. ²³Anathotwui mibing, shākha maga̱da chishat. ²⁴Azmavethwui mibing, hangmatida khani. ²⁵Kiriath-arim, Chephirah, kala Be-erothwui mibing, shāshini hangmatida kathum. ²⁶Ramah eina Gebawui mibing, shātharuk maga̱da akha. ²⁷Michmaswui mibing, shākha maga̱da khani. ²⁸Bethel eina Aiwui mibing, shākhani maga̱da kathum. ²⁹Nebowui mibing, hangphangāda khani. ³⁰Magbishwui mibing, shākha hangphangāda tharuk. ³¹Khangatei Elamwui naomayarabing, thingkha shākhani hangphangāda mati. ³²Harimwui naomayarabing, shākathum maga̱. ³³Lod, Hadid, kala Onowui mibing, shāshini maga̱da phangā. ³⁴Jerichowui mibing, shākathum hangmatida phangā. ³⁵Senaahwui mibing, thingkathum shātharuk thumrā.

³⁶Pāngmonbing: Jeshuawui shimkhur Jedaiahwui naomayarabing, shāchiko hangshinida kathum; ³⁷Immerwui naomayarabing, thingkha hangphangāda khani; ³⁸Pashhurwui naomayarabing, thingkha shākhani hangmatida chishat; ³⁹Harimwui naomayarabing, thingkha tharāda shini.

⁴⁰Levishi: Hodaviahwui naomayarabingwui ngachaili Jeshua eina Kadmi-elwui naomayarabing, hangshinida mati. ⁴¹Laa kasābing: Asaphwui naomayarabing, shākha maga̱da chishat. ⁴²Ngavei khamayonabing: Shallum, Ater, Talmon, Akkub, Hatita, kala Shobaiwui naomayarabing, athum saikora shākha thumrāda chiko.

⁴³Khorum khavai shimwui otram raobing: Ziha, Hasupha, kala Tabbaothwui naomayarabing, ⁴⁴Keroswui naomayarabing, Siahawui naomayarabing, Padonwui naomayarabing, ⁴⁵Lebanahwui naomayarabing, Hagabahwui naomayarabing, Akkubwui naomayarabing, ⁴⁶Hagabwui naomayarabing, Shamlaiwui naomayarabing, Hananwui naomayarabing, ⁴⁷Giddelwui naomayarabing, Gaharwui naomayarabing, Re-aiahwui naomayarabing, ⁴⁸Rezinwui naomayarabing, Necodawui naomayarabing, Gazzamwui naomayarabing, ⁴⁹Uzzawui naomayarabing, Paseahwui naomayarabing, Besaiwui naomayarabing, ⁵⁰Asnahwui naomayarabing, Me-unimwui naomayarabing, Nephisimwui naomayarabing, ⁵¹Bakbukwui naomayarabing, Hakuphawui naomayarabing, Harhurwui naomayarabing, ⁵²Bazluthwui naomayarabing, Mehidawui naomayarabing, Harshawui naomayarabing, ⁵³Barkoswui naomayarabing, Siserawui naomayarabing, Temahwui naomayarabing, ⁵⁴Neziahwui naomayarabing, kala Hatiphawui naomayarabing.

⁵⁵Solomonwui raobingwui naomayarabing: Sotaiwui naomayarabing, Hassopherethwui naomayarabing, Perudawui naomayarabing, ⁵⁶Jaalahwui naomayarabing, Darkonwui naomayarabing, Giddelwui naomayarabing, ⁵⁷Shephatiahwui naomayarabing, Hattilwui naomayarabing, Pochereth-hazzebaimwui naomayarabing, kala Amiwui naomayarabing. ⁵⁸Khorum khavai shimwui otram raobing katonga eina Solomonwui raobingwui naomayarabing chi ngarumlaga shākathum hangchikoda khanina.

⁵⁹Mi hibingna Tel-melah, Tel-harsha, Cherub, Addan, kala Immer khamungli eina khaunga; kha athumna athum eina athumwui shimkhur Israel mibing manina china theikhui khavai mamirarthuwa: ⁶⁰Delaiahwui naomayarabing, Tobiahwui naomayarabing, Necodawui naomayarabing, shātharuk hangphangāda khanina. ⁶¹Pāngmonwui naomayarabing eina: Habaiah, Hakkoz, kala Barzillaiwui naomayarabing. Barzillai hina Gilead mi Barzillaiwui naongalā akha ngakumhaoda, chi shimkhurwui ming khuikahaina. ⁶²Hibingna athumwui ming chi naotun lairiklungli ngashira, kha masamphangthuwa; chiwui vang athumli makatharana da pāngmonrinli eina khuishoka. ⁶³Rammungana athumli hānga, Urim eina Thummim eina ngasoda pāngmon akha mananinganglakha thāri, tharmeikap kaji kashakazā chili athumna mashaipaimara. ^a a v63 Urim eina Thummim hi pāngmon khareina haichingkahai kathara otbing china, kala khamayonwui vang kasā atamli Vareli khangasan khavai singkahaina.

⁶⁴Kakazip katonga chi ngasoda mi thing hangmatida khani shākathum hangtharukna, ⁶⁵Chi lāngda, athumwui sha̱nao kala mayarnao raobing chi thingshini shākathum thumrāda shinina; laa kasā sha̱nao mayarnao chi apeichaoda shākhanina. ⁶⁶Athumwui siguibing shāshini thumrāda tharukna, gadhā shākhani hangmatida phangā, ⁶⁷Athumwui utbing chi shāmati thumrāda phangāna, kala athumwui gadhābing chi thingtharuk shāshini maga̱na.

⁶⁸Athumna Jerusalemli khalei ithumwui Avāwui shim chili khavā tharan, avāva̱ ngarā shimkhurwui wungva̱ kaikhana chi awui apamli sakāluishit khavai ithumwui Avāwui shim chiwui vang lemmet kachigat mi. ⁶⁹Athumna athumwui sakashap athishurda, ot chiwui vang lanshimli sinā pheisā thinghangtharukta thingkha, lupāsā pound thingtharuk shākhani hangphangā sha̱kha, kala pāngmonbingwui kachon shākha mi.

⁷⁰Pāngmonbing, Levinaobing, mi khangatatei kaikha, laa kasābing, ngavei khamayonbing, kala khorum khavai shimli otram khangatha̱bing china kachichāshiwui keinungli pama; kala Israel saikora athumwui keinungli pamhaowa.