Ezra 1

1 ¹Persiawui awunga Cyrusna mungkhare kum, ithumwui Avāwui tui Jeremiahna hāngkahai chi ungshung ngasak khavai, ithumwui Avāna Persiawui awunga Cyruswui manglā mathuk ngasakta, chiwui vang ana awui wungram saikora vāpeida kachishāt sāda kakapila kapida hānga:

²Persiawui awunga Cyrusna hi eina hānga: "PROHO Vare, kazingram khalei Varena okathui saikorawui wungram ili mihaira, kala Judah ramwui Jerusalemli awui vang shim akha ili sakā khavai kasohaira. ³Nathumwui ngachaili awui mi kachiva̱ khalalei, awui Varena ali ngasomiranu; ana Judahli khalei Jerusalemli khaunglaga Israelwui Vare PROHO Varewui shim sākāluiranu; ana Jerusalemli khalei Vare china. ⁴Kala khangakan kachiva̱ ana leisai apam kachida, awui apamwui mibingna sinā, lupāsā, ot, kala sha̱kei eina ali ngachonmiranu; kala chili lāngda Jerusalemli khalei Varewui shimwui vang mikhangangai chigatranu."

⁵Chiwui thili Judah eina Benjaminwui shimkhurwui wungva̱bing, pāngmonbing eina Levinaobing, kala ithumwui Avāna athumwui manglā mathuk ngasak kahai saikorana Jerusalemli khaunglaga ithumwui Avāwui shim sakāluikhavai zatphoka. ⁶Athumwui khongnainao saikorana mikhangangai chigat saikora chili lāngda sinā eina lupāsāwui khorkhong, ot, sha̱kei, kala aman kasaka lemmet eina athumli ngachonmi.

⁷Awunga Cyrusna ithumwui Avāwui shimwui khorkhong, Nebuchadnezzarna Jerusalemwui eina khuivāda awui khalattawui varebingwui shimli tāhai kahai chila khuishokmi. ⁸Persiawui awunga Cyrusna chumsinga Mithredathwui pāng eina khorkhong chi khuishokta, Judahwui wungnao Shesh-bazzarli chungnāda sangmi. ⁹Hi athumwui mashingna: sinā khongsai thumrā, lupāsā khongsai thingkha, nganamkaphā rikkatā khavai khong maga̱da chiko, ¹⁰sinā koklui thumrā, khangatei yur lupāsā koklui shāmati tharā, kala khorkhong khangatei thingkha. ¹¹Sinā eina lupāsāwui khorkhong saikora ngarumlaga thing phangā shāmatina. Raithā kahaibing Babylonwui eina Jerusalemli latkhaung tharan, Shesh-bazzarna khorkhong saikora khuivāmi.