Bouei Choba Maangpon Kingaitida
Langsenbü ka po lühsenyet phaia, joubü shuong sepeinyu ngaian Bou chem tongde dangngaila loukei. Ho Laishibaei kümsilei pendou ong che ka louda dogo lauda: haoeneibü Boueibü hau ik haoen thüka kibü.
1 1Persia Choba Kuruseibü shaangbü po ka, Jeremia danko seneibü Boueibü ngüh loushedla shanga, seneibü Bouei Persia Choba Kuruseibü soushou kingaitikei, kheijinei haoei haoeibü sangle pendoua ngüh ngetikei, hoba kho dobü thonkei:
2Persia Choba Kurusei hai lauda, “Bunyubou, khuthük Mühghaüei, kaodak sangle pendou ngo la kua, hoba Jihuda kabü Jerusalema hao shanga chem che dangla ngo pienkei. 3Haoeibü mütli pendou yoka, kan yoa aoyou ong, — haoeibü Mühghaü hao yoa kishima — hao Jihuda kabü Jerusalem to angshima, hoba Bunyubou, Israel Mühghaüeibü chem dangngaishima; hao kho Jerusalema kibü Mühghaü ki. 4Joubü müt pendou, hao kimangsühbüa ki, haoeibü kaokabü mütshuongei chandinam, hon, nyaksinam hoba samkeisamukei, hoba Jerusalema kibü Mühghaü chem shanga maangmai lembü yoan, hao to thuikaima.”
5Kheijinei Jihuda si Benjamin chempen khuleibü shuong, ungshedbou shuong hoba Levi shuong — aoyou soushou seneibü Bouei kingaitibü pendou — Jerusalem to angan, seneibü Bou chem dangngaila shanga meimeijung haukei. 6Maangmai luluei lembü pendou to limbo, haoeneibü lepbü shuong pendouei chandinam hoba honeibü peisilei, nyaksinam, samkeisamuk, hoba namsek peisileiei haoen to thuikei.
7Kurus Chobaei kei, Nebukadnezarei Jerusalem ka leian haoeibü mühghaü chema phobü seneibü Bou chem peisilei leijung longkei. 8Persia Choba Kurusei thanshang khangenbou Mithredat ikei kho leijung longtikei, hoba haoei kho Jihudabü yaangenbou Sheshbazar la weanchühkei. 9Khoeibü weanchühbü kho ho: honeibü phau 30, chandinamei phau 1,000, jen juokjin 29, 10honeibü buphau 30, lubü phang chandinamei buphau 410, hoba lubü peisilei 1,000. 11Hon hoba chandinamei peisilei pendou lühbak 5,400 kikei. Langsenbü shuong Babilon ka Jerusalem to angbü jihsiphaia, Sheshbazarei khübü pendou sungbakei.
