Uba Ya Motsa Zuciyar Sarki
Bayan shekaru saba'in a zaman talala, ragowar jama'a sun komo domin su sake gina haikali. Littafin ya danganta kowane mataki ga dalili ɗaya: kyakkyawan hannun Ubansu a kansu.
1 1A shekara ta farko ta mulkin Sairus sarkin Farisa, domin a cika maganar Ubanmu ta bakin Irmiya, Ubanmu ya motsa ruhun Sairus sarkin Farisa, har ya yi shela a ko'ina a cikin dukan mulkinsa, ya kuma sa aka rubuta ta, cewa:
2Ga abin da Sairus sarkin Farisa ya ce, “Ubangiji, Allah na Sama, ya ba ni dukan mulkokin duniya, ya kuma naɗa ni in gina masa gida a Urushalima a ƙasar Yahuda. 3Duk wanda yake cikinku na dukan mutanensa—Allahnsa yă kasance tare da shi—bari yă haura zuwa Urushalima a ƙasar Yahuda, yă sāke gina gidan Ubangiji, Allah na Isra'ila; shi ne Allah da yake a Urushalima. 4Bari duk wanda ya tsira, a duk inda yake zama, mutanen wurinsa su taimake shi da azurfa, da zinariya, da kaya, da dabbobi, tare da baye-bayen yardar rai domin gidan Allah da yake a Urushalima.”
5Sai shugabannin iyalan Yahuda da Benyamin, da firistoci da Lawiyawa—duk wanda Ubanmu ya motsa ruhunsa—suka tashi domin su haura su sāke gina gidan Ubanmu a Urushalima. 6Dukan maƙwabtansu suka taimake su da kayayyakin azurfa da na zinariya, da kaya, da dabbobi, da kyautaye masu daraja, ban da dukan abin da aka bayar da yardar rai.
7Sarki Sairus kuma ya fitar da kayayyakin gidan Ubanmu da Nebukadnezzar ya ɗauko daga Urushalima ya sa a cikin gidan gumakansa. 8Sairus sarkin Farisa ya sa Mitredat ma'aji ya fitar da su, yana ƙidaya su ga Sheshbazzar shugaban Yahuda. 9Ga ƙidayarsu: tasoshin zinariya 30, tasoshin azurfa 1,000, farantan turaren ƙonawa 29, 10kwanonin zinariya 30, kwanonin azurfa iri dabam 410, da waɗansu kayayyaki 1,000. 11Jimlar kayayyakin zinariya da na azurfa 5,400 ne. Sheshbazzar ya kawo su duka sa'ad da waɗanda aka kai zaman bauta suka haura daga Babila zuwa Urushalima.