Esra 1

1 ¹Ní ọdún kìíní ìjọba Kirusi ọba Persia, kí ọ̀rọ̀ Baba wa tí ó ti ẹnu Jeremiah wá lè ṣẹ, Baba wa rú ẹ̀mí Kirusi ọba Persia sókè, tó bẹ́ẹ̀ tí ó fi ránṣẹ́ ìkéde jákèjádò gbogbo ìjọba rẹ̀, ó sì kọ ọ́ sínú ìwé pé:

²Èyí ni ohun tí Kirusi ọba Persia wí: “Olúwa, Ọlọ́run ọ̀run, ti fi gbogbo ìjọba ayé fún mi, ó sì ti yàn mí láti kọ́ ilé kan fún un ní Jerusalẹmu ní Juda. ³Ẹnikẹ́ni nínú yín, nínú gbogbo ènìyàn rẹ̀—kí Ọlọ́run rẹ̀ wà pẹ̀lú rẹ̀—kí ó gòkè lọ sí Jerusalẹmu ní Juda, kí ó sì tún ilé Olúwa, Ọlọ́run Israẹli, kọ́; Òun ni Ọlọ́run tí ń bẹ ní Jerusalẹmu. ⁴Kí àwọn ènìyàn agbègbè rẹ̀ ran olúkúlùkù ẹni tí ó ṣẹ́kù lọ́wọ́, níbikíbi tí ó bá ń gbé, pẹ̀lú fàdákà, wúrà, ẹrù, àti ẹran ọ̀sìn, pẹ̀lú àwọn ọrẹ àtinúwá fún ilé Ọlọ́run tí ń bẹ ní Jerusalẹmu.”

⁵Nígbà náà ni àwọn olórí ìdílé Juda àti Benjamini, àwọn àlùfáà àti àwọn ọmọ Lefi—gbogbo ẹni tí Baba wa ti rú ẹ̀mí rẹ̀ sókè—dìde láti gòkè lọ kí wọ́n sì tún ilé Baba wa kọ́ ní Jerusalẹmu. ⁶Gbogbo àwọn aládùúgbò wọn ṣètìlẹ́yìn fún wọn pẹ̀lú ohun èlò fàdákà àti wúrà, ẹrù, ẹran ọ̀sìn, àti àwọn ẹ̀bùn olówó iyebíye, yàtọ̀ sí gbogbo ohun tí a fi àtinúwá tọrẹ.

⁷Ọba Kirusi tún mú àwọn ohun èlò ilé Baba wa jáde, èyí tí Nebukadnẹssari ti kó láti Jerusalẹmu wá, tí ó sì fi sí inú ilé àwọn òrìṣà rẹ̀. ⁸Kirusi ọba Persia mú kí Mitredati olùtọ́jú ìṣúra mú wọn jáde, ó sì kà wọ́n fún Ṣeṣbassari ọmọ-aládé Juda. ⁹Èyí ni iye wọn: abọ́ wúrà 30, abọ́ fàdákà 1,000, àwo tùràrí 29, ¹⁰ago wúrà 30, ago fàdákà oríṣi mìíràn 410, àti ohun èlò mìíràn 1,000. ¹¹Àpapọ̀ ohun èlò wúrà àti fàdákà jẹ́ 5,400. Ṣeṣbassari mú gbogbo wọn gòkè wá nígbà tí àwọn ìgbèkùn gòkè wá láti Babeli sí Jerusalẹmu.