Ezra 1

1 ¹Sa unang tuig ni Ciro nga hari sa Persia, aron matuman ang pulong sa atong Amahan pinaagi kang Jeremias, gipukaw sa atong Amahan ang espiritu ni Ciro nga hari sa Persia, mao nga nagpadala siyag pahibalo sa tibuok niyang gingharian ug gipasulat kini:

²Mao kini ang giingon ni Ciro nga hari sa Persia: “Ang Ginoo, ang Dios sa langit, naghatag kanako sa tanang gingharian sa yuta, ug nagtudlo kanako sa pagtukod alang kaniya ug balay sa Jerusalem sa Juda. ³Si bisan kinsa kaninyo sa tanan niyang katawhan—hinaut nga ang iyang Dios mag-uban kaniya—patungasa siya sa Jerusalem sa Juda ug tukora pag-usab ang balay sa Ginoo, ang Dios sa Israel; siya mao ang Dios nga anaa sa Jerusalem. ⁴Ang matag nahibilin, bisan asa siya magpuyo, tabangan sa mga tawo sa iyang dapit ug plata, bulawan, mga kabtangan, ug kahayopan, inubanan sa kinabubut-ong mga halad alang sa balay sa Dios sa Jerusalem.”

⁵Unya ang mga pangulo sa mga panimalay sa Juda ug Benjamin, ang mga pari ug mga Levita—ang matag usa nga ang espiritu gipukaw sa atong Amahan—nangandam sa pagtungas aron tukoron pag-usab ang balay sa atong Amahan sa Jerusalem. ⁶Ang tanan nilang mga silingan mitabang kanila ug mga butang nga plata ug bulawan, mga kabtangan, kahayopan, ug bililhong mga gasa, gawas pa sa tanang kinabubut-ong gihalad.

⁷Gipagawas usab ni Haring Ciro ang mga butang sa balay sa atong Amahan nga gikuha ni Nabucodonosor gikan sa Jerusalem ug gibutang sa balay sa iyang kaugalingong mga dios. ⁸Gipagawas kini ni Ciro nga hari sa Persia pinaagi kang Mitredat nga tresorero, nga nag-ihap niini ngadto kang Sesbazar nga prinsipe sa Juda. ⁹Mao kini ang ilang gidaghanon: 30 ka bulawang panaksan, 1,000 ka platang panaksan, 29 ka sunoganan sa insenso, ¹⁰30 ka bulawang yahong, 410 ka platang yahong nga lahing matang, ug 1,000 ka ubang mga butang. ¹¹Ang mga butang nga bulawan ug plata mikabat ug 5,400. Gidala kining tanan ni Sesbazar sa dihang mitungas ang mga binihag gikan sa Babilonia ngadto sa Jerusalem.