Ndị Iro Megide Ụlọ Nna anyị

Ndị agbata obi chọrọ inye aka n'iwu ụlọ ahụ, ma e kweghị ha. Ya mere ha malitere imebi ọrụ ahụ: ha mere ka ndị ọrụ daa mba, ha gotere ndị ọrụ ọchịchị, mesịa degara eze Peshia akwụkwọ na Jerusalem bụ obodo nnupụisi. Nchọcha e mere n'akwụkwọ ochie eze kwadoro ha. A kwụsịkwara ọrụ ụlọ Nna anyị n'ike ruo ọtụtụ afọ.

Isi 4.

Mgbe ndị iro Juda na Benjamin nụrụ na ndị a dọtara nʼagha lọtara na-ewuru Nna anyị ụlọnsọ, ha bịakwutere Zerubabel na ndịisi ezinụlọ sị, “Ka anyị soro unu wuo ya—anyị na-achọ Chineke unu dịka unu si eme, anyị na-achụkwara ya àjà kemgbe ụbọchị Esahadọn eze Asiria, onye kpọpụtara anyị nʼebe a.”

Ma Zerubabel, Jeshua, na ndịisi ezinụlọ Izrel ndị ọzọ sịrị ha, “Unu enweghị oke anyị na unu nwere nʼiwuru Nna anyị ụlọ. Ọ bụ naanị anyị ga-ewuru Nna anyị ya, dịka eze Saịrọs nke Peshia nyere anyị nʼiwu.”

Mgbe ahụ, ndị ala ahụ mere ka aka ndị Juda daa mba, na-emenye ha egwu ka ha ghara iwu ụlọ. Ha gọrọ ndị ndụmọdụ ego ka ha rụọ ọrụ megide ha ma mebie atụmatụ ha, nʼoge niile Saịrọs eze Peshia na-achị ruo mgbe Daịọs eze Peshia malitere ịchị. Nʼoge mmalite ọchịchị Zeksis, ha deere ebubo megide ndị bi na Juda na Jerusalem.

Akwụkwọ Ozi Megide Ndị Nna anyị

Nʼoge ọchịchị Atazeksis, Bishlam, Mitredat, Tabel, na ndị ha na ha na-arụkọ ọrụ deere Atazeksis eze Peshia akwụkwọ ozi; e ji mkpụrụ edemede Aram dee akwụkwọ ozi ahụ ma sụgharịa ya nʼasụsụ Aram. Rehum ọchịagha na Shimshaị ode akwụkwọ deere eze Atazeksis akwụkwọ ozi megide Jerusalem, sị: Rehum ọchịagha, Shimshaị ode akwụkwọ, na ndị ọzọ ha na ha na-arụkọ ọrụ—ndị ikpe, ndị ọrụ gọọmentị, na ndị na-achị ndị Erek, ndị Babilọn, na ndị Susa (ya bụ ndị Elam), na mba ndị ọzọ nke Osnapa ukwu ahụ, onye a na-asọpụrụ, dọtara ma mee ka ha biri nʼobodo Sameria na nʼebe ndị ọzọ nke mpaghara Ofe Osimiri Ahụ. ^a

Nke a bụ ndetụ akwụkwọ ozi ha zigaara ya: Nye eze Atazeksis, site nʼaka ndị ohu gị, ndị bi na mpaghara Ofe Osimiri Ahụ. Ugbu a, ka eze mara: ndị Juu ndị si nʼebe ị nọ bịakwute anyị eruola Jerusalem. Ha na-ewughachi obodo ahụ na-enupụ isi, obodo ọjọọ ahụ, na-arụcha mgbidi ya ma na-arụzigharị ntọala ya. Ka eze mara: ọ bụrụ na e wughachie obodo a ma rụchaa mgbidi ya, ha agaghị akwụ ụtụ, ego ụtụ isi, ma ọ bụ ụtụ ụzọ ọbụla, ụlọakụ eze ga-atakwa ahụhụ. Ebe anyị na-adabere nʼụlọeze maka ihe oriri anyị, o zighịkwa ezi ka anyị hụ ka a na-eleda eze anya, anyị na-ezipu ozi ka anyị mee ka eze mara, ^b ka e nwee ike nyochaa akwụkwọ ndekọ nna nna gị ha. Nʼime akwụkwọ ndekọ ndị ahụ, ị ga-achọta na obodo a bụ obodo na-enupụ isi, nke na-emerụ ndị eze na mpaghara dị iche iche ahụ, nke na-akpali nnupụisi site nʼoge ochie—nke e mere ka e bibie nʼihi ya. Anyị na-eme ka eze mara: ọ bụrụ na e wughachie obodo a ma rụchaa mgbidi ya, ị gaghị enwe oke ọbụla nʼOfe Osimiri Ahụ.

Eze zaghachiri: Nye Rehum ọchịagha, Shimshaị ode akwụkwọ, na ndị ha na ha na-arụkọ ọrụ bi na Sameria na nʼebe ndị ọzọ nke Ofe Osimiri Ahụ: Ekele. Ugbu a, A gụpụtaala akwụkwọ ozi unu zitere anyị nʼolu dara ụda ma sụgharịara m ya. Enyere m iwu ka e nyochaa ya, achọpụtara m na obodo a esitela nʼoge gara aga na-ebili megide ndị eze, na-akpali nnupụisi na ọgba aghara. Ndị eze dị ike chịrị Jerusalem, chịakwa ebe niile dị nʼOfe Osimiri Ahụ, ma na-anata ụtụ, ego ụtụ isi, na ụtụ ụzọ. Ugbu a, nyenụ ndị ikom a iwu ka ha kwụsị, ka a ghara iwughachi obodo a tutu ruo mgbe m ga-enye iwu. Elezinụ okwu a anya. Gịnị mere ihe egwu a ga-eji baa ụba ma merụọ ọdịmma ndị eze?

Ngwa ngwa a gụrụ ndetụ akwụkwọ ozi eze Atazeksis nye Rehum, Shimshaị ode akwụkwọ, na ndị ha na ha so, ha mere ọsọ ọsọ gakwuru ndị Juu nọ na Jerusalem ma jiri ike na ikike kwụsị ha. Ya mere, ọrụ nʼụlọ Nna anyị dị na Jerusalem kwụsịrị, nọgidekwa na-akwụsị, ruo nʼafọ nke abụọ nke ọchịchị Daịọs eze Peshia.