Ezekiel 40

40 ¹Ithumli raithā kahai maga̱da kaphangā zingkum, zingkum haokaphokli, kachāng chiwui katharāthang, keinung chi sāthata thili zingkum tharāda mati kākapei eina, chithang ngalāngda ithumwui Avāwui pāng chi iwuitungli rāpara kala ana ili apam chili khuivai. ²Ithumwui Avāwui mahākhamili ana ili Israel ngaleili khuivai, kaphung kajuiva̱ akhali ili pamngasaka, kala chiwui azingshong keinung sākahai kathā akha ina thei. ³Ana ili apam chili thānvai; kala azak pithrai thai mipā akha, awui pāngli khamanaka khara̱ kala tamkhavai thing singkasā, ngavei zangkhavaili nganinga. ^a a v3 Old Testament katonga eina, FHB na samphangda katuia Vare mipā chi ithumwui Avā da phokmi. Pithrai thai mipā hi khangateina—hi chi khorumshim tamkhavai kala mahākhami chi hāngchitheimi khavai chihovā kahai kazingramwui rao akhana, ithumwui Avā apāng maningla. ⁴Mipā china ili hānga, "Miwui naomayara, namik eina yanglu, nakhanā eina nganālu, kala ina nali chithei saikorali nganātitkhuilu, khikhalajila nali chithei khavaiwui vang eina na apam chili khuirāhaira. Na kathei saikora Israelwui shimkhurli hānglu."

Zingshoshong Ngavei Tamkahai

⁵Kala yanglu, khorumshim kuimareida ayarshong phākho akha lei. Mipā china tamkhavai thing asān khuining tharuk chi singa. Ana phākho chi tama; chiwui kashā khuining tharuk, kala chiwui jui khuining tharukna.

⁶Chiwui thili ana zingshoshong ngareivai ngaveili vai kala chiwui chonchak chi kai. Ana ngaveiwui zangkhavai tama; chi thukkhala khuining tharukna; kala zangkhavai khangatei chila thukkhala khuining tharukna. ⁷Khamayon kā kachiva̱ chi asān khuining tharuk, aret khuining tharukna; kala athumwui ngachaili khuining phangā lei. Yāngkhup ngalemli khalei ngaveiwui zangkhavai, alungshong ngareikashang chi khuining tharukna. ⁸Chiwui thili ana ngaveiwui yāngkhup, alungshong ngareikashang chi tama; chi khuining tharukna. ⁹Ana ngaveiwui yāngkhup tama; chi khuining chishatna, kala chiwui khāmongphei khuining khanina; yāngkhup chi alungshong ngareisai.

¹⁰Zingshoshong ngaveili, uishong yāshong khamayon kā kathumthum lei, athum kathum asān-aret ngaraichāserra; kala uishong yāshongwui khāmongphei chila ngaraichāserra. ¹¹Chiwui thili ana ngavei zangkhavai tama: aret khuining tharā, kala ngavei asān khuining tharāda kathumna. ¹²Khamayon kā mangāli akom chi uishong yāshong khuining akhana; khamayon kā kachiva̱ chi uishong yāshong khuining tharukna. ¹³Chiwui thili ana ngavei chi khamayon kā akhawui shimtung eina khangatei kā shimtung eina tangda tama, aret khuining maga̱da phangā, khāmong eina khāmongli ngareisai. ¹⁴Ana khāmongphei tama; chi khuining hangtharukna; kala ngavei kuimareida kayāng chi khāmongpheili tangda lei. ¹⁵Ngavei zangkhavai mangā eina chiwui alungshong yāngkhup mangā eina tangda khuining hangphangāna. ¹⁶Khamayon kā kala chibingwui khāmongphei chila ngavei alungshong kuimareida khamasha̱ charfa lei, kala yāngkhupbing chila chithāda lei; charfabing chi kuimareida alungshong ngareida lei, kala khāmongpheibingli khaneirong yeksangsera.

Ayar Kayāng

¹⁷Chiwui thili ana ili ayar kayāngli khuivai; kala chili kā kachungkha kala kuimareida ngalung kaham sākahai lei, kala ngalung kaham ngareikashang kā thumrā lei. ¹⁸Ngalung kaham chi ngaveibingli ngalengda lei, athumwui asān eina ngaraichai; hi khamaze ngalung kahamna. ¹⁹Ana khamaze ngaveiwui mangā eina alung kayāngwui ayar mangāshong vāshungda tamyanga; zingshoshong kala atungshong chi khuining shākhana.

Atungshong Ngavei Tamkahai

²⁰Ayar kayāngwui atungshong khalei ngavei chi, ana chiwui asān kala aret tamyanga. ²¹Chiwui khamayona kābing, lākhala lākhala kathum, kala chiwui pakra̱, shimpho chi khare ngaveiwui tākam eina ngaraichai: asān khuining hangphangā, aret khuining maga̱da phangā jira. ²²Chiwui charfa, shimpho, kala khaneirong chi zingshoshong ngareikashanga ngaveiwui asān-aret eina ngaraichai. Thāk shini eina chili kāki, kala chiwui shimpho china mangāshong lei. ²³Alung kayāngwui ngavei akha atungshong ngaveili yangkhangasung, zingshoshong ngarithida; ana ngavei eina ngavei vāshungda tamyanga; chi khuining shākhana.

Azingshong Ngavei Tamkahai

²⁴Chiwui thili ana ili azingshong thānvai, kala azingshong ngareishanga ngavei akha lei; ana chiwui pakra̱ kala yāngkhup tamyangda, kateibing tākamhaipapama. ²⁵Chili kala chiwui yāngkhupli kuimareida charfa lei, charfa kateibing thāda; asān khuining hangphangā, aret khuining maga̱da phangāna. ²⁶Thāk shini eina chili kāki, chiwui yāngkhup china mangāshong lei, kala khaneirong chi chiwui pakra̱li lākhala lākhala akha yeksanga. ²⁷Alung kayāngwui vang azingshong ngareishanga ngavei akha lei; ana azingshong ngavei eina ngavei vāshungda tamyanga; chi khuining shākhana.

Alung Kayāngwui Ngaveibing

²⁸Chiwui thili ana ili azingshong ngaveivāk eina alung kayāngli thānzanga, kala chi tamyangda, kateibing tākamhaipapama. ²⁹Chiwui khamayona kābing, pakra̱, kala shimpho chi asān-aret ngaraichai, chili kala chiwui shimpholi kuimareida charfa lei; asān khuining hangphangā, aret khuining maga̱da phangāna. ³⁰Kuimareida yāngkhup lei, asān khuining maga̱da phangā, aret khuining phangā jira. ³¹Chiwui yāngkhup china ayar kayāngshong ngareishanga, kala khaneirong chi chiwui pakra̱li yeksanga; thāk chishat eina kāki.

³²Chiwui thili ana ili zingshoshongvāk eina alung kayāngli thānzanga, kala ngavei chi kateibing tākamhaipapama tamyanga. ³³Chiwui khamayona kābing, pakra̱, kala shimpho chi tākamhaipapama tamyanga, chili kala chiwui shimpholi kuimareida charfa lei; asān khuining hangphangā, aret khuining maga̱da phangāna. ³⁴Chiwui yāngkhup china ayar kayāngshong ngareishanga, kala khaneirong chi chiwui pakra̱li lākhala lākhala akha yeksanga; thāk chishat eina chili kāki.

³⁵Chiwui thili ana ili atungshongwui ngaveili thānvai, kala chi kateibing tākam eina tama. ³⁶Awui khamayona kābing, khāmongthingbing, kala shimpho tākamhaipapama, kuimareida charfa lei; asān khuining hangphangā, aret khuining maga̱da phangā jiya. ³⁷Awui khāmongthing chi ayar kayāngli ngareiya, kala chiwuitungli khaneirong ruksangsera, lākhala lākhala akha; kala chili kārakhala chon chishat lei.

³⁸Ngaveibingwui khāmongthingli khāmong khalei kā akha lei; chi rikkatā kachigat pheokhavaina. ³⁹Ngaveiwui shimpholi rikkatā kachigat, suihamchigat, kala khayonchigat taithat khavai, lākhala lākhala table khani nganinga. ⁴⁰Ayarshong, atungshong ngavei zangkhavaili kāvai apongli, table khani nganinga; kala ngaveiwui shimpho lākhashong table khangatei khani lei. ⁴¹Ngaveili ngasoda lākhala lākhala table mati nganinga; table saikora chishatna; chiwuitungli pha̱kaphayā taithata. ⁴²Rikkatā kachigatwui vang ngalung eina sākā table mati, asān khuining akha tangkhai, aret khuining akha tangkhai, kala kajui khuining akha, chiwuitungli rikkatā kachigat kala pha̱kaphayā taithat khavai akapbing haihai. ⁴³Kakā khani khalei marik, asān pāngmayā akha jiya, alungshong kuimareida masa̱khuiserra; kala tabletungli pha̱kaphayāwui asā haihai.

Otram Ngatha̱kasābingwui Kābing

⁴⁴Alung ngaveiwui ayarshong, alung kayāngli laa kasābingwui kābing lei: akha atungshong ngaveili khalei chi azingshong ngareishanga, kala akha zingshoshong ngaveili khalei chi atungshong ngareishanga. ⁴⁵Ana ili hānga, "Azingshong ngareida khalei kā hi khorumshim khamayonapā pāngmonbingwui vangna. ⁴⁶Atungshong ngareida khalei kā hi hanphut khamayonapā pāngmonbingwui vangna. Hibing Zadokwui naomayarabingna, Leviwui naomayarabingwui ngachaili ithumwui Avāli khokharuma ali otram ngatha̱kasābingna."

Alung Kayāng kala Khorumshim Shimpho

⁴⁷Chiwui thili ana kayāng chi tama: asān khuining shākha, aret khuining shākha, asān-aret ngaraichā achikun kākashunga; kala hanphut chi khorumshimwui mangāli nganinga.

⁴⁸Chiwui thili ana ili khorumshimwui shimpholi thānvai, kala awui khāmongthing tamyanga; lākhala lākhala chi khuining phangāna; kala ngaveiwui aret lākhala lākhala khuining kathumna. ⁴⁹Shimpho chi asān khuining maga̱, aret khuining tharāda akha, chon eina kārakhala; kala khāmongthingli ngasoda pakra̱ nganinga, lākhala lākhala akha.