Gog Phungreitungli Pitāra
Israelwui kaphungbingli Gog tāhaowa, awui raikhavai otbing kum shini peida thing sāda rikra, kala mingun chuikaphumbingna kachāng shini zangra, kala shimān kahai ara̱kui ngalemli chinkhavai sangra. Vānaobingli pha̱kaphayāwui kashi zātkhānli ngaranra. Ithumwui Avāna, raithāda kakhuivā hi ina mamaleikhami maningmana da hānga, kala awui Manglā sangshokmira.
39 1"Kala na, miwui naomayara, Gogli makhamayā tui marānmilu: Proho Avāna hānga: O Meshech kala Tubalwui akhava wungnao Gog, ina nali mamayāmana. 2Ina nali ngalanngasakta, nali muivāngasakta, atungshong katāva̱wui eina khuirāda, Israelwui kaphungtungli thānvāra. 3Chiwui thili nawui uishong eina nawui malā ina za̱tekmira, kala nawui yāpang eina nawui malāthing tāngasakmira. 4Na kala nawui raimi saikora kala nali ngasotabing miyurbing, Israelwui kaphungtungli pitāra. Ina nali sā kashai vānao hangkhāyur saikorali kala sāyurbingli kashakazā thāda mira. 5Na lamhāngli pitāra, kaja ina hānghaira, da Proho Avāna hānga. 6Ina Magogtungli kala shamadrupheili ningtāphup eina okthuibingtungli mei chihovāra, chieina I Avāna da athumna theira. 7Ina iwui mibing Israelwui alungli iwui katharaming chitheimira, kala iwui katharamingli khipānakha makhao masāngasakluimara. Chithāda I Avā, Israelli Kathara Akha china da yur saikorana theira. 8Yanglu, chi rāra kala shokra, da Proho Avāna hānga. Chi ina hāngkahai zimikshona.'
9"Chithāda Israelwui keinungbingli kapambing shokra; athumna chāngvei kala talla̱, malā kala malāthing, raiwui thinghun kala kazei, raisāri saikora eina mei sāda riktāra; zingkum shini eina tangda chi meiwui vang thing thāda riktāra. 10Athumna luiwui eina lah ngahongwui eina thing makazipkhuimara, kaja athumna raisāri meina riktāra. Athumli ngapon kahaibingli athumna ngaponra, kala athumli sākazam kahaibingli sākazamra, da Proho Avāna hānga.'
11"Chi atamli ina Gogli Israelli, yireiwui zingshoshong khalei Ramkazatabingwui tampākli, chikhur akha mira. Chi ramkazatabingwui shongfa kārmira, kaja apam chili athumna Gog kala awui shān saikorali chifara, kala chili Hamon-gog tampāk da hora. a a v11 Hamon-gog jida "Gogwui shān" da khamayāna—tampāk chi apam chili chifakahai shān kachungkhawui vang aming horkahaina. 12Ngalei tharngasak khavai, kachāng shini eina tangda Israelnaobingna athumli chifara. 13Ngaleili khalei mi saikorana athumli chifara, kala ina iwui tekhamatei chitheimi atamli chi athumwui vang anganam ngasāra, da Proho Avāna hānga.'
14"Ngalei katongali taikahaibing chifada, chi tharngasak khavai, athumna ngalei chi thangkachida ngaruivā khavai mibing phāsangra. Kachāng shini kākapei eina athumna phāra. 15Athumna ngalei chi ngaruivā tharan, khipānakha miwui ara̱ theiakha, chifakahaibingna chi Hamon-gog tampākli chifaranglakha eina tangda, chiwui ngalemli thari akha haira. 16(Apam chili Hamonah da hokahai keinung akhala leira.) Chithāda athumna ngalei tharngasakra.'
17"Nava, miwui naomayara, Proho Avāna hānga: Vānao hangkhāyur saikorali kala luili khalei sāyur saikorali hānglu: Rākazipserlu kala rālu; ina nathumwui vang Israelwui kaphungtungli ngarānmi pha̱kaphayā khareiya akhali kuimareida kazipserlu; nathumna asā shaira kala ashee mangra. 18Nathumna raikapingbingwui asā shaira, kala okathuiwui wungnaobingwui ashee mangra; athum yaovā, yaonao, me, mukvā, Bashanwui keimathao kahaibing saikora thai. 19Ina nathumwui vang ngarān kahai pha̱kaphayāli, nathumna athao shaida tumngasakra, kala ashee mangda marip ngasakra. 20Iwui tableli nathumna sigui kala siguigariwui, kapangabing kala shipaibing yur saikorawui asā zāda thochingra, da Proho Avāna hānga.'
21"Ina iwui tekhamatei yurbingwui ngachaili haira, kala yur saikorana ina khuikahai athut kala ina athumtungli haikahai ipāng theira. 22Kala chithang eina thuida Israelwui shimkhurna I athumwui Avāna da theira. 23Chieina yurbingna Israelwui shimkhur athumwui moreiwui vang raithā khuithuihaowa da theira, kaja athumna ili shitkasang maleilak eina sai. Chiwui vang eina ina imai ngathumhaida, athumli athumwui yangkashebingli horsangmida, athum saikora raighai eina thihaowa. 24Ina athumwui makathar kala moreiwui athishurda athumli sāman mi, kala athumwui eina imai ngathumhai.'
25"Chiwui vang eina Proho Avāna hithāda hānga: Ina Jacobwui shimlui ara hanmiluira, chieina Israelwui shimkhur saikorali lumashanmira, kala iwui kathara mingwui vang shivāmra. 26Athumli mangang khangasak khipālikha maleila, athumna athumwui ngaleili chingri eina okthui tharan, athumwui khayā khamalā kala ili sākahai khayonkhamāng saikora phungra. 27Ina athumli mibingwui eina khuishok tharan, kala athumwui yangkashebingwui ngaleiwui eina kazipkhui tharan, yur kachungkhawui mangāli athumwui alungli iwui tharkhamatheng chitheira. 28Chieina athumna I athumwui Avāna da theira, kaja ina athumli miyurbingwui ngachaili tukthuihaida, khipālikha mataimila athumli kazipkhuida athumwui ngaleili khuiungmi. 29Ina athumwui eina imai mangathumluimara, kaja ina Israelwui shimkhurtungli iwui Manglā heishokra, da Proho Avāna hānga."
