Esekiẹli 39

39 ¹“Ìwọ, ọmọ ènìyàn, sọ àsọtẹ́lẹ̀ lòdì sí Gogu pé: Èyí ni ohun tí Baba Olódùmarè wí: Èmi lòdì sí ọ, ìwọ Gogu, olórí ọmọ-aládé Meṣeki àti Tubali. ²Èmi yóò yí ọ padà, èmi yóò lé ọ kiri, èmi yóò mú ọ gòkè wá láti àríwá jíjìn, èmi yóò sì darí rẹ sí àwọn òkè Israẹli. ³Nígbà náà ni èmi yóò lu ọrun rẹ bọ́ kúrò ní ọwọ́ òsì rẹ, èmi yóò sì gbọ̀n àwọn ọfà rẹ dà kúrò ní ọwọ́ ọ̀tún rẹ. ⁴Ìwọ yóò ṣubú sórí àwọn òkè Israẹli, ìwọ àti gbogbo àwọn ọmọ ogun rẹ àti àwọn ènìyàn tí ó wà pẹ̀lú rẹ. Èmi yóò fi ọ́ fún onírúurú ẹyẹ tí ń jẹ ẹran àti fún àwọn ẹranko igbó gẹ́gẹ́ bí oúnjẹ. ⁵Ìwọ yóò ṣubú sí orí pápá gbangba, nítorí èmi ni ó ti sọ̀rọ̀, ni Baba Olódùmarè wí. ⁶Èmi yóò rán iná sí Magogu àti sí àwọn tí ń gbé ní àìléwu ní àwọn ilẹ̀ etí òkun, wọn yóò sì mọ̀ pé Èmi ni Baba. ⁷Èmi yóò fi orúkọ mímọ́ mi hàn láàrin àwọn ènìyàn mi Israẹli, èmi kì yóò sì jẹ́ kí a tún ba orúkọ mímọ́ mi jẹ́ mọ́. Nígbà náà ni àwọn orílẹ̀-èdè yóò mọ̀ pé Èmi ni Baba, Ẹni Mímọ́ ní Israẹli. ⁸Wò ó, ó ń bọ̀, yóò sì ṣẹ, ni Baba Olódùmarè wí. Èyí ni ọjọ́ náà tí mo sọ̀rọ̀ rẹ̀.’

⁹“Nígbà náà ni àwọn tí ń gbé ní àwọn ìlú Israẹli yóò jáde, wọn yóò fi àwọn ohun ìjà náà dáná, wọn yóò sì sun wọ́n—asà àti apata, ọrun àti ọfà, kùmọ̀ ogun àti ọ̀kọ̀—wọn yóò máa lò wọ́n gẹ́gẹ́ bí igi-ìdáná fún ọdún méje. ¹⁰Wọn kì yóò kó igi jọ láti inú pápá tàbí láti inú igbó, nítorí àwọn ohun ìjà náà ni wọn yóò fi dáná. Wọn yóò kó ọrọ̀ àwọn tí ó kó ọrọ̀ wọn, wọn yóò sì jà àwọn tí ó jà wọn lólè, ni Baba Olódùmarè wí.’

¹¹“Ní ọjọ́ náà, èmi yóò fún Gogu ní ibi ìsìnkú ní Israẹli, Àfonífojì Àwọn Arìnrìn-àjò, ní ìhà ìlà-oòrùn òkun. Ó sì ń dí àwọn arìnrìn-àjò lọ́nà, nítorí níbẹ̀ ni wọn yóò sin Gogu àti gbogbo ọ̀pọ̀ ènìyàn rẹ̀, wọn yóò sì pè é ní Àfonífojì Hamoni-gogu. ^a a v11 Hamoni-gogu túmọ̀ sí “ọ̀pọ̀ ènìyàn Gogu”—a sọ àfonífojì náà ní orúkọ nítorí ọ̀pọ̀ ìjọ àwọn ọmọ ogun tí a sin sí ibẹ̀. ¹²Fún oṣù méje ni ilé Israẹli yóò máa sin wọ́n, kí wọn lè sọ ilẹ̀ náà di mímọ́. ¹³Gbogbo ènìyàn ní ilẹ̀ náà ni yóò sin wọ́n, yóò sì mú òkìkí wá fún wọn ní ọjọ́ tí èmi yóò fi ògo mi hàn, ni Baba Olódùmarè wí.’

¹⁴“Wọn yóò yan àwọn ọkùnrin tí yóò máa gba ilẹ̀ náà kọjá nígbà gbogbo, láti máa sin àwọn tí ó ṣẹ́kù sórí ilẹ̀, kí wọn lè sọ ọ́ di mímọ́. Lẹ́yìn oṣù méje ni wọn yóò ṣe ìwádìí. ¹⁵Bí wọ́n ti ń gba ilẹ̀ náà kọjá, ẹnikẹ́ni tí ó bá rí egungun ènìyàn yóò gbé àmì kalẹ̀ sẹ́gbẹ̀ẹ́ rẹ̀, títí àwọn asìnkú yóò fi sin ín ní Àfonífojì Hamoni-gogu. ¹⁶(Ìlú kan tí à ń pè ní Hamona yóò sì wà níbẹ̀ pẹ̀lú.) Báyìí ni wọn yóò ṣe sọ ilẹ̀ náà di mímọ́.’

¹⁷“Ní ti ìwọ, ọmọ ènìyàn, èyí ni ohun tí Baba Olódùmarè wí: Sọ fún onírúurú ẹyẹ àti fún gbogbo àwọn ẹranko igbó pé: Ẹ kó ara yín jọ, kí ẹ sì wá, ẹ kórajọ láti ibi gbogbo wá sí ibi ẹbọ tí èmi ń pèsè sílẹ̀ fún yín, ẹbọ ńlá kan ní orí àwọn òkè Israẹli; ẹ ó jẹ ẹran, ẹ ó sì mu ẹ̀jẹ̀. ¹⁸Ẹ ó jẹ ẹran àwọn akọni, ẹ ó sì mu ẹ̀jẹ̀ àwọn ọmọ-aládé ayé—àgbò, ọ̀dọ́-àgùntàn, ewúrẹ́, akọ màlúù, gbogbo ẹran àbọ́pa ti Baṣani. ¹⁹Ẹ ó jẹ ọ̀rá títí tí ẹ ó fi yó, ẹ ó sì mu ẹ̀jẹ̀ títí tí ẹ ó fi para, ní ibi ẹbọ tí mo pèsè fún yín. ²⁰Ní orí tábìlì mi ni ẹ ó ti jẹ àjẹyó ti ẹṣin àti ti àwọn awakẹ̀kẹ́-ogun, ti àwọn alágbára àti onírúurú àwọn jagunjagun, ni Baba Olódùmarè wí.’

²¹“Èmi yóò gbé ògo mi kalẹ̀ láàrin àwọn orílẹ̀-èdè, gbogbo àwọn orílẹ̀-èdè yóò sì rí ìdájọ́ tí mo ṣe àti ọwọ́ tí mo gbé lé wọn lórí. ²²Láti ọjọ́ náà lọ, ilé Israẹli yóò mọ̀ pé Èmi ni Baba wọn. ²³Nígbà náà ni àwọn orílẹ̀-èdè yóò mọ̀ pé ilé Israẹli lọ sí ìgbèkùn nítorí ẹ̀ṣẹ̀ wọn, nítorí wọ́n jẹ́ aláìṣòótọ́ sí mi. Nítorí náà mo fi ojú mi pamọ́ fún wọn, mo fi wọ́n lé àwọn ọ̀tá wọn lọ́wọ́, gbogbo wọn sì ti ipa idà ṣubú. ²⁴Mo bá wọn lò gẹ́gẹ́ bí àìmọ́ àti ẹ̀ṣẹ̀ wọn, mo sì fi ojú mi pamọ́ fún wọn.’

²⁵“Nítorí náà báyìí ni Baba Olódùmarè wí: Nísinsìnyí èmi yóò dá ọrọ̀ Jakọbu padà, èmi yóò sì ṣàánú sí gbogbo ilé Israẹli, èmi yóò sì jowú fún orúkọ mímọ́ mi. ²⁶Wọn yóò ru ìtìjú wọn àti gbogbo àìṣòótọ́ tí wọ́n ṣe sí mi, nígbà tí wọ́n bá ń gbé ní àìléwu ní ilẹ̀ wọn láìsí ẹni tí yóò dẹ́rù bà wọ́n. ²⁷Nígbà tí mo bá mú wọn padà láti ọ̀dọ̀ àwọn ènìyàn, tí mo bá sì kó wọn jọ láti ilẹ̀ àwọn ọ̀tá wọn, èmi yóò fi ara mi hàn ní mímọ́ nípasẹ̀ wọn níwájú ọ̀pọ̀ àwọn orílẹ̀-èdè. ²⁸Nígbà náà ni wọn yóò mọ̀ pé Èmi ni Baba wọn, nítorí mo kó wọn lọ sí ìgbèkùn láàrin àwọn orílẹ̀-èdè, mo sì kó wọn jọ padà sí ilẹ̀ ara wọn, láìfi ẹnìkankan sílẹ̀. ²⁹Èmi kì yóò fi ojú mi pamọ́ fún wọn mọ́, nítorí èmi yóò tú Ẹ̀mí mi jáde sórí ilé Israẹli, ni Baba Olódùmarè wí.”