ጎግ ኣብ ኣኽራን ይወድቕ

ጎግ ኣብ ኣኽራን እስራኤል ይወድቕ፥ ኣፅዋሩ ኸዓ ንሸውዓተ ዓመት ከም ዕንፀይቲ ይቃፀል፥ ቀበርቲ ድማ ንሸውዓተ ወርሒ ይሰርሑ፥ ኣብ ጥቓ ዝተበተኑ ኣዕፅምቲ ምልክት ይግበር። ኣዕዋፍ ናብ ዘስካሕክሕ ድራር ይፅውዑ። ኣቦና እቲ ምርኮ ከቶ ካብኦም ምርሓቑ ከም ዘይነበረ ይዛረብ፥ መንፈሱ ድማ የፍስስ።

ምዕራፍ 39።

ኣታ ወዲ ሰብ፥ ንስኻ ኸዓ ኣንፃር ጎግ ከምዙይ ኢልካ ተነበ፦ እቲ ልዑል ኣቦ ከምዙይ ይብል ኣሎ፦ ኣታ ጎግ፥ ናይ ሞሳሕን ቶቤልን ሓለቓ መስፍን፥ እንሆ፥ ኣነ ኣንፃርካ እየ። ክመልሰካ፥ ክደፍኣካ፥ ካብ ጫፍ ሰሜን ከዓ ከደይበካ፥ ናብ ኣኽራን እስራኤልውን ክመርሓካ እየ። ሽዑ ቀስትኻ ካብ ፀጋም ኢድካ ክሃርም፥ ፍላፃታትካ ድማ ካብ የማነይቲ ኢድካ ከውድቕ እየ። ኣብ ኣኽራን እስራኤል ክትወድቕ ኢኻ፥ ንስኻን ኵሉ ሰራዊትካን እቶም ምሳኻ ዘለዉ ህዝብታትን። ንዅሉ ዓይነት ኣዕዋፍ ሃዳንን ንኣራዊት መሮርን መግቢ ክኾኑ ኣሕሊፈ ክህበካ እየ። ኣነ ተዛሪበ ኣለኹ እሞ፥ ኣብ ሜዳ ክትወድቕ ኢኻ፥ ይብል ልዑል ኣቦ። ናብ ማጎግን ናብቶም ኣብ ደሴታት ብህድኣት ዝነብሩን ሓዊ ክሰድድ እየ፤ ኣነ ኣቦ ምዃነይ ድማ ክፈልጡ እዮም። ቅዱስ ስመይ ኣብ ማእኸል ህዝበይ እስራኤል ከፍልጥ እየ፤ ደጊምውን ቅዱስ ስመይ ከይርከስ ኣይሓድግን እየ። ሽዑ እቶም ኣህዛብ ኣነ ኣቦ፥ እቲ ኣብ እስራኤል ዘሎ ቅዱስ ምዃነይ ክፈልጡ እዮም። እንሆ፥ ይመፅእ ኣሎ፤ ክኸውንውን እዩ፥ ይብል ልዑል ኣቦ። እታ ኣነ እተዛረብኩላ መዓልቲ እዚኣ እያ።

ሽዑ እቶም ኣብ ከተማታት እስራኤል ዝነብሩ ወፂኦም፥ በቲ ኣፅዋር ሓዊ ኣንዲዶም ከንድድዎ እዮም፤ ዋልታታትን ኣናእሽቱ ዋልታን፥ ቀስትን ፍላፃታትን፥ ኣብትርቲ ውግእን ኲናትን ከዓ ንሸውዓተ ዓመት ከም ዕንፀይቲ ክጥቀሙሉ እዮም። ነቲ ኣፅዋር ከንድድዎ እዮም እሞ፥ ካብ መሮር ኮነ ካብ ዱር ዕንፀይቲ ኣይእክቡን እዮም። ነቶም ዝዘመትዎም ክዘምትዎም፥ ነቶም ዝማረኽዎምውን ክማርኽዎም እዮም፥ ይብል ልዑል ኣቦ።

በታ መዓልቲ እቲኣ ድማ፥ ኣብ እስራኤል ንጎግ መቓብር ክህቦ እየ፥ እቲ ብምብራቕ ባሕሪ ዘሎ ለሰ ሓለፍቲ መንገዲ። ንሓለፍቲ መንገዲ ድማ ይዓፅዎም፤ ኣብኡ ንጎግን ንዅሉ ሰራዊቱን ክቐብሩ እዮም እሞ፥ ለሰ ሃሞን ጎግ ኢሎም ክሰምይዎ እዮም። ^a ነታ ምድሪ ምእንቲ ኸንፅሁ ድማ፥ ቤት እስራኤል ንሸውዓተ ወርሒ ክቐብርዎም እዮም። ኵሎም እቶም ኣብታ ምድሪ ዘለዉ ክቐብርዎም እዮም፤ በታ ክብረይ ዝገልፀላ መዓልቲ ኸዓ፥ እዙይ ዝና ክኾኖም እዩ፥ ይብል ልዑል ኣቦ።

ነታ ምድሪ ምእንቲ ኸንፅሁ፥ ኣብ ልዕሊ ምድሪ ዝተረፉ እናቐበሩ፥ ብተኸታታሊ ኣብታ ምድሪ ዝሓልፉ ሰባት ክሸሙ እዮም። ድሕሪ ሸውዓተ ወርሒ ድማ ክምርምሩ እዮም። በታ ምድሪ ኺዶም ክሓልፉ እንተለዉ፥ ዓፅሚ ሰብ ዝረኣየ ዅሉ፥ እቶም ቀበርቲ ኣብ ለሰ ሃሞን ጎግ ክሳዕ ዝቐብርዎ፥ ኣብ ጥቓኡ ምልክት ይተኽል። (ኣብኡ ሃሞና እትብሃል ከተማ ድማ ክትከውን እያ።) ከምዙይ ጌሮም ነታ ምድሪ ከንፅሁዋ እዮም።

ኣታ ወዲ ሰብ፥ ንስኻ ኸዓ፥ እቲ ልዑል ኣቦ ከምዙይ ይብል ኣሎ፦ ንዅሉ ዓይነት ኣዕዋፍን ንዅሉ ኣራዊት መሮርን ከምዙይ በሎም፦ ተኣኪብኩም ንዑ፤ ኣብቲ ኣነ ዘዳልወልኩም ዘለኹ መስዋእቲ፥ ኣብ ኣኽራን እስራኤል ዘሎ ዓብዪ መስዋእቲ፥ ካብ ኵሉ ዙርያ ተኣከቡ፤ ስጋ ክትበልዑ፥ ደም ከዓ ክትሰትዩ ኢኹም። ስጋ ጀጋኑ ክትበልዑ፥ ደም መሳፍንቲ ምድሪ ኸዓ ክትሰትዩ ኢኹም፤ ድዑል፥ ገናሽል፥ ኣጣል፥ ኣብዑር፥ ኵሎም ስቡሓት ባሳን እዮም። ኣብቲ ኣነ ዘዳልወልኩም መስዋእቲ፥ ክሳዕ እትፀግቡ ስብሒ ክትበልዑ፥ ክሳዕ እትሰኽሩ ድማ ደም ክትሰትዩ ኢኹም። ኣብ ማእደይ ድማ ኣፍራስን ሰብ ሰረገላን፥ ሓያላትን ኵሉ ዓይነት ተዋጋእቲ ሰባትን ክሳዕ እትፀግቡ ክትበልዑ ኢኹም፥ ይብል ልዑል ኣቦ።

ክብረይ ኣብ ማእኸል ኣህዛብ ከቐምጥ እየ፤ ኵሎም እቶም ኣህዛብ ድማ ነቲ ዝፈፀምክዎ ፍርድን ነታ ዘውደቕኩሎም ኢድን ክርእዩ እዮም። ካብታ መዓልቲ እቲኣ ጀሚሮም ድማ፥ ቤት እስራኤል ኣነ ኣቦኦም ምዃነይ ክፈልጡ እዮም። ሽዑ እቶም ኣህዛብ፥ ቤት እስራኤል ስለ ዝበደሉኒ፥ ብሰሪ ሓጢኣቶም ናብ ምርኮ ኸም ዝኸዱ ክፈልጡ እዮም። ስለዙይ ገፀይ ሓባእኹሎም፤ ኣብ ኢድ ፀላእቶም ኣሕሊፈ ሃብክዎም፤ ኵሎም ድማ ብሰይፊ ወደቑ። ከም ርኽሰቶምን ከም ሓጢኣቶምን ገይረ ፈደይክዎም፤ ገፀይ ድማ ካባታቶም ሓባእኹ።

ስለዙይ እቲ ልዑል ኣቦ ከምዙይ ይብል ኣሎ፦ ሕዚ ንምርኮ ያእቆብ ክመልሶ፥ ንዅሉ ቤት እስራኤል ድማ ክርህርሀሎም፥ ምእንቲ ቅዱስ ስመይ ከዓ ክቐንእ እየ። ኣብ ምድሮም ብህድኣት እናተቐመጡ፥ ዘፍርሖም ዘይብሎም ከለዉ፥ ንሕፍረቶምን ነቲ ዝበደሉኒ ዅሉ ክሕደቶምን ክስከሙ እዮም። ካብ ህዝብታት ምስ መለስክዎም፥ ካብ ምድሪ ፀላእቶም ከዓ ምስ ኣከብክዎም፥ ኣብ ቅድሚ ብዙሓት ኣህዛብ ብእኣቶም ቅዱስ ምዃነይ ከርኢ እየ። ኣብ ማእኸል ኣህዛብ ኣግዒዘዮም፥ ድሕሪኡ ኸዓ ሓደ እኳ ኸይተረፈ ናብ ምድሮም ስለ ዝኣከብክዎም፥ ኣነ ኣቦኦም ምዃነይ ክፈልጡ እዮም። መንፈሰይ ኣብ ልዕሊ ቤት እስራኤል ከፍስስ እየ እሞ፥ ደጊም ገፀይ ካባታቶም ኣይሓብእን እየ፥ ይብል ልዑል ኣቦ።