Faɗuwar Gog a kan Duwatsu

Gog ya faɗi a kan duwatsun Isra'ila, ana ƙona makamansa a matsayin itacen wuta har shekara bakwai, yayin da masu binne gawawwaki suke aiki wata bakwai, ana kuma kafa alamu kusa da ƙasusuwan da aka samu warwatse. An kira tsuntsaye zuwa liyafa mai ban tsoro. Ubanmu ya ce zaman bauta ba rashin kasancewarsa ba ne ko kaɗan, ya kuma zubo Ruhunsa.

Babi na 39.

“Kai kuwa, ɗan mutum, ka yi annabci game da Gog, ka ce, Ga abin da Ubanmu Maɗaukaki yake cewa, Ina gāba da kai, Gog, babban sarkin Meshek da Tubal. Zan juya ka, in kore ka, in fito da kai daga can arewa mai nisa, in kuma kawo ka a kan duwatsun Isra'ila. Sa'an nan zan buge bakanka daga hannunka na hagu, in kakkaɓe kibanka daga hannunka na dama. Za ka fāɗi a kan duwatsun Isra'ila, kai da dukan sojojinka da mutanen da suke tare da kai. Zan ba da kai abinci ga kowane irin tsuntsu mai cin nama da kuma namun jeji. Za ka fāɗi a fili, gama na faɗa, in ji Ubanmu Maɗaukaki. Zan aiko da wuta a kan Magog da kuma a kan waɗanda suke zama lafiya a bakin teku, za su kuwa san ni ne Uba. Zan sanar da sunana mai tsarki a cikin mutanena Isra'ila, ba kuwa zan ƙara barin a ƙazantar da sunana mai tsarki ba. Sa'an nan al'ummai za su san ni ne Uba, Mai Tsarki a cikin Isra'ila. Ga shi, yana zuwa kuma zai faru, in ji Ubanmu Maɗaukaki. Wannan ita ce ranar da na yi magana a kai.”

“Sa'an nan waɗanda suke zama a biranen Isra'ila za su fito, su kunna wuta da makamai su ƙone su—garkuwoyi da manyan garkuwoyi, bakuna da kibau, kulake da māsu—suna amfani da su kamar itacen wuta har shekara bakwai. Ba za su tattara itace daga jeji ko kurmi ba, gama za su ƙone makamai. Za su washe waɗanda suka washe su, su kuma kwashe ganimar waɗanda suka kwashe musu ganima, in ji Ubanmu Maɗaukaki.”

“A wannan rana zan ba Gog wurin binnewa a Isra'ila, Kwarin Matafiya, gabas da teku. Yana tare wa matafiya hanya, gama a can za su binne Gog da dukan taronsa, za su kuma kira shi Kwarin Hamon-gog. ^a Har wata bakwai gidan Isra'ila za su yi ta binne su, domin su tsarkake ƙasar. Dukan mutanen ƙasar za su binne su, wannan kuwa zai sa su yi suna a ranar da zan bayyana ɗaukakata, in ji Ubanmu Maɗaukaki.”

“Za su naɗa mutane su riƙa ratsa ƙasar kullum, suna binne waɗanda suka ragu a bisa ƙasa, domin su tsarkake ta. Bayan wata bakwai za su yi bincike. Yayinda suke ratsa ƙasar, duk wanda ya ga ƙashin mutum, sai ya kafa alama kusa da shi, har sai masu binnewa su binne shi a Kwarin Hamon-gog. (Za a kuma kasance da wani birni mai suna Hamona a can.) Ta haka za su tsarkake ƙasar.”

“Kai kuwa, ɗan mutum, ga abin da Ubanmu Maɗaukaki yake cewa, Ka ce wa tsuntsaye na kowane iri da dukan namun jeji, Ku taru ku zo, ku taru daga kowane gefe zuwa hadayar da nake shiryawa dominku, babbar hadaya a kan duwatsun Isra'ila; za ku ci nama ku kuma sha jini. Za ku ci naman jarumawa ku kuma sha jinin sarakunan duniya—raguna, 'yan raguna, awaki, bijimai, da dukan dabbobi masu ƙiba na Bashan. Za ku ci kitse har ku ƙoshi, ku kuma sha jini har ku bugu, a hadayar da nake shirya muku. A kan teburina za ku ci dawakai da mahayan karusai har ku ƙoshi, da ƙarfafan mutane da sojoji na kowane iri, in ji Ubanmu Maɗaukaki.’

“Zan kafa ɗaukakata a cikin al'ummai, dukan al'ummai kuwa za su ga hukuncin da na yi da kuma hannun da na sa a kansu. Daga wannan rana zuwa gaba gidan Isra'ila za su san ni ne Ubansu. Sa'an nan al'ummai za su san cewa gidan Isra'ila sun tafi zaman bauta saboda zunubinsu, domin sun yi mini rashin aminci. Saboda haka na ɓoye fuskata, na ba da su ga maƙiyansu, dukansu kuwa suka fāɗi da takobi. Na yi musu gwargwadon ƙazantarsu da zunubansu, na kuma ɓoye fuskata daga gare su.”

“Saboda haka ga abin da Ubanmu Maɗaukaki yake cewa, Yanzu zan maido da arzikin Yaƙubu, in kuma ji tausayin dukan gidan Isra'ila, zan kuwa yi kishin sunana mai tsarki. Za su ɗauki kunyarsu da dukan cin amanar da suka yi mini, sa'ad da suke zama lafiya a ƙasarsu babu wanda zai firgita su. Sa'ad da na dawo da su daga cikin mutane, na kuma tattara su daga ƙasashen maƙiyansu, zan nuna tsarkina ta wurinsu a gaban al'ummai masu yawa. Sa'an nan za su san ni ne Ubansu, domin na kai su zaman bauta a cikin al'ummai, sa'an nan na tattara su zuwa ƙasarsu, ban bar ko ɗaya a baya ba. Ba kuwa zan ƙara ɓoye fuskata daga gare su ba, gama zan zuba Ruhuna a kan gidan Isra'ila, in ji Ubanmu Maɗaukaki.”