ሕዝቅኤል 39

39 ¹“አንተም፣ የሰው ልጅ ሆይ፣ በጎግ ላይ ትንቢት ተናገር፤ ጌታ አባት እንዲህ ይላል፤ የሞሳክና የቶቤል ዋና አለቃ ጎግ ሆይ፣ እነሆ፣ እኔ እቃወምሃለሁ። ²አዙሬ እነዳሃለሁ፤ ከሩቅ ሰሜንም አወጥቼ ወደ እስራኤል ተራሮች እወስድሃለሁ። ³ከዚያም ቀስትህን ከግራ እጅህ አንኳኩቼ አወድቃለሁ፤ ፍላጻዎችህንም ከቀኝ እጅህ አስጥላለሁ። ⁴አንተና ሰራዊትህ ሁሉ ከአንተም ጋራ ያሉት ሕዝቦች በእስራኤል ተራሮች ላይ ትወድቃላችሁ። ለአዳኝ ወፍ ሁሉና ለዱር አራዊት ምግብ አድርጌ እሰጥሃለሁ። ⁵በሜዳ ላይ ትወድቃለህ፤ እኔ ተናግሬአለሁና ይላል ጌታ አባት። ⁶በማጎግ ላይ፣ በባሕር ዳርቻዎችም በእርጋታ በሚኖሩት ላይ እሳት እሰዳለሁ፤ እኔም አብ እንደ ሆንሁ ያውቃሉ። ⁷ቅዱሱን ስሜን በሕዝቤ በእስራኤል መካከል አስታውቃለሁ፤ ከእንግዲህም ቅዱሱ ስሜ እንዲረክስ አልፈቅድም። አሕዛብም እኔ አብ፣ በእስራኤል ያለሁ ቅዱሱ እንደ ሆንሁ ያውቃሉ። ⁸እነሆ፣ ይመጣል፤ ይፈጸማልም ይላል ጌታ አባት። የተናገርሁበት ቀን ይህ ነው።’

⁹“ከዚያም በእስራኤል ከተሞች የሚኖሩ ይወጣሉ፤ የጦር መሣሪያዎችንም እያነደዱ ያቃጥላሉ፤ ትላልቅና ትንንሽ ጋሻዎችን፣ ቀስቶችንና ፍላጻዎችን፣ ዱላዎችንና ጦሮችን ለሰባት ዓመት እንደ ማገዶ ይጠቀሙባቸዋል። ¹⁰ከዱር ወይም ከሜዳ እንጨት አይለቅሙም፤ የጦር መሣሪያዎችን ያቃጥላሉና። የበዘበዟቸውን ይበዘብዛሉ፤ የዘረፏቸውንም ይዘርፋሉ ይላል ጌታ አባት።’

¹¹“በዚያም ቀን ለጎግ በእስራኤል ውስጥ የመቃብር ስፍራ እሰጠዋለሁ፤ ይኸውም ከባሕሩ በስተ ምሥራቅ ያለው የመንገደኞች ሸለቆ ነው። ጎግንና ሰራዊቱን ሁሉ በዚያ ስለሚቀብሩ መንገደኞችን ይዘጋል፤ ሸለቆውንም የሃሞን ጎግ ሸለቆ ብለው ይጠሩታል። ^a a v11 ሃሞን ጎግ ማለት “የጎግ ብዛት” ማለት ነው፤ ሸለቆው በዚያ ለተቀበረው ብዙ ጭፍራ ተብሎ ተሰይሟል። ¹²የእስራኤልም ቤት ምድሪቱን ለማንጻት ሰባት ወር ሲቀብሯቸው ይኖራሉ። ¹³በምድሪቱም ያሉ ሁሉ ይቀብሯቸዋል፤ ክብሬን በምገልጥበትም ቀን ዝና ያስገኝላቸዋል ይላል ጌታ አባት።’

¹⁴“በምድሪቱም ዘወትር የሚመላለሱ ሰዎችን ይሾማሉ፤ ምድሪቱን ለማንጻትም በምድር ፊት ላይ የቀሩትን ይቀብራሉ። ከሰባት ወር በኋላም ፍተሻ ያደርጋሉ። ¹⁵በምድሪቱም ሲመላለሱ የሰው ዐጥንት የሚያይ ሁሉ ቀባሪዎች በሃሞን ጎግ ሸለቆ እስኪቀብሩት ድረስ በአጠገቡ ምልክት ያቆማል። ¹⁶(በዚያም ሃሞና የምትባል ከተማ ትኖራለች።) እንዲህም ምድሪቱን ያነጻሉ።’

¹⁷“አንተም፣ የሰው ልጅ ሆይ፣ ጌታ አባት እንዲህ ይላል፤ ለአእዋፍ ሁሉና ለምድር አራዊት ሁሉ እንዲህ ብለህ ተናገር፤ ተሰብሰቡ፤ ኑም፤ ለእናንተ በማዘጋጀው መሥዋዕት ዙሪያውን ሁሉ ተሰብሰቡ፤ ይኸውም በእስራኤል ተራሮች ላይ ያለ ታላቅ መሥዋዕት ነው፤ ሥጋ ትበላላችሁ፤ ደምም ትጠጣላችሁ። ¹⁸የኀያላንን ሥጋ ትበላላችሁ፤ የምድርንም አለቆች ደም ትጠጣላችሁ፤ ይኸውም አውራ በጎች፣ ጠቦቶች፣ ፍየሎች፣ ኰርማዎች፣ የሰቡ የባሳን እንስሶች ሁሉ ናቸው። ¹⁹ለእናንተ ባዘጋጀሁት መሥዋዕት እስክትጠግቡ ድረስ ስብ ትበላላችሁ፤ እስክትሰክሩም ድረስ ደም ትጠጣላችሁ። ²⁰በማዕዴ ላይ ፈረሶችንና ሰረገለኞችን፣ ኀያላንንና የተለያዩ ተዋጊዎችን ሁሉ ትጠግባላችሁ ይላል ጌታ አባት።’

²¹“ክብሬን በአሕዛብ መካከል አኖራለሁ፤ አሕዛብም ሁሉ ያደረግሁትን ፍርድና በእነርሱ ላይ ያሳረፍሁትን እጄን ያያሉ። ²²ከዚያም ቀን ጀምሮ የእስራኤል ቤት እኔ አባታቸው እንደ ሆንሁ ያውቃሉ። ²³አሕዛብም የእስራኤል ቤት ስለ ኀጢአታቸው ወደ ምርኮ እንደ ሄዱ ያውቃሉ፤ ስለ ከዱኝ ነውና። ስለዚህ ፊቴን ሰወርሁ፤ ለጠላቶቻቸውም አሳልፌ ሰጠኋቸው፤ ሁሉም በሰይፍ ወደቁ። ²⁴እንደ ርኵሰታቸውና እንደ ኀጢአታቸው አደረግሁባቸው፤ ፊቴንም ከእነርሱ ሰወርሁ።’

²⁵“ስለዚህ ጌታ አባት እንዲህ ይላል፤ አሁን የያዕቆብን ምርኮ እመልሳለሁ፤ ለእስራኤልም ቤት ሁሉ እራራለሁ፤ ስለ ቅዱሱ ስሜም እቀናለሁ። ²⁶ማንም ሳያስፈራቸው በምድራቸው በእርጋታ በሚኖሩበት ጊዜ ውርደታቸውንና በእኔ ላይ ያደረጉትን ክህደት ሁሉ ይሸከማሉ። ²⁷ከሕዝቦች መካከል በመለስኋቸውና ከጠላቶቻቸው አገሮች በሰበሰብኋቸው ጊዜ፣ በብዙ አሕዛብ ፊት በእነርሱ አማካኝነት ቅዱስ መሆኔን እገልጣለሁ። ²⁸በአሕዛብ መካከል በምርኮ አግዤአቸው ከዚያም ወደ ገዛ ምድራቸው ሰብስቤ አንዳቸውንም ሳላስቀር ስለ መለስኋቸው፣ እኔ አባታቸው እንደ ሆንሁ ያውቃሉ። ²⁹ከእንግዲህም ፊቴን ከእነርሱ አልሰውርም፤ መንፈሴን በእስራኤል ቤት ላይ አፈስሳለሁና ይላል ጌታ አባት።”