ሕዝቅኤል 38

38 ¹የአባታችን ቃል እንዲህ ሲል ወደ እኔ መጣ፦

²የሰው ልጅ ሆይ፣ በማጎግ ምድር ወደ ሚኖረው፣ የሞሳሕና የቶቤል ዋና አለቃ ወደ ሆነው ወደ ጎግ ፊትህን አዙር፤ በእርሱም ላይ ትንቢት ተናገር። ³እንዲህም በል፦ ጌታ አባታችን እንዲህ ይላል፤ “የሞሳሕና የቶቤል ዋና አለቃ ጎግ ሆይ፣ እኔ በአንተ ላይ ነኝ። ⁴አዙሬ እመልስሃለሁ፤ በመንጋጋህም መንጠቆ አግብቼ፣ አንተንና ሰራዊትህን ሁሉ አወጣሃለሁ፤ ፈረሶችንና ፈረሰኞችን፣ ሁሉም ጦር የለበሱ፣ ትልቅና ትንሽ ጋሻ የያዙ ብዙ ሰራዊት፣ እያንዳንዳቸውም ሰይፍ የጨበጡ ናቸው። ⁵ፋርስ፣ ኩሽና ፉጥ ከእነርሱ ጋር ናቸው፤ ሁሉም ጋሻና የራስ ቍር የታጠቁ ናቸው፤ ⁶ጎሜር ከነሰራዊቱ ሁሉ፣ ከሩቅ ሰሜንም ቤትቶጋርማ ከነሰራዊቱ ሁሉ ከአንተ ጋር ናቸው፤ ብዙ ሕዝቦችም ከአንተ ጋር ናቸው።

⁷ተዘጋጅ፤ አንተና በዙሪያህ የተሰበሰቡት ሰራዊት ሁሉ ተዘጋጁ፤ ለእነርሱም ጠባቂ ሁን። ⁸ከብዙ ቀናት በኋላ ትጠራለህ። በኋለኞቹ ዓመታት ከጦርነት ወደ ተመለሰች ምድር ትወርራለህ፤ ሕዝቧ ለረጅም ዘመን ባድማ ሆነው ወደ ነበሩት የእስራኤል ተራሮች ከብዙ አሕዛብ ተሰብስበዋል። ከአሕዛብም መካከል ወጥተው አሁን ሁሉም በደኅንነት ይኖራሉ። ⁹አንተም ትወጣለህ፤ እንደ ዐውሎ ነፋስ እየገሰገስህ ምድሪቱን እንደሚሸፍን ደመና ትሆናለህ፤ አንተና ሰራዊትህ ሁሉ፣ ከአንተም ጋር ብዙ ሕዝቦች ትሆናላችሁ።”

¹⁰ጌታ አባታችን እንዲህ ይላል፤ “በዚያ ቀን በልብህ ሐሳቦች ይመጣሉ፤ ክፉ ተንኰልም ታውጠነጥናለህ። ¹¹እንዲህም ትላለህ፤ ‘ቅጥር ወደ ሌላቸው መንደሮች ምድር እወጣለሁ፤ በደኅንነት በሚኖር ሰላማዊ ሕዝብ ላይ እዘምታለሁ፤ ሁሉም ቅጥር፣ መወርወሪያ ወይም በር የሌላቸው ናቸው፤’ ¹²ብዝበዛና ምርኮ ለመማረክ፣ እንደ ገና በተቋቋሙ ፍርስራሾች ላይና ከአሕዛብ በተሰበሰበው ሕዝብ ላይ ለመዝመት ነው፤ ይህ ሕዝብ ከብትና ንብረት አፍርቷል፤ በምድርም እምብርት ላይ ይኖራል። ¹³ሳባ፣ ድዳንና የተርሴስ ነጋዴዎች ከወጣት አንበሶቿ ሁሉ ጋር፣ ‘ምርኮ ለመማረክ መጣህን? ብርና ወርቅ ለመውሰድ፣ ከብትና ንብረት ለመማረክ፣ ታላቅ ብዝበዛም ለመዝረፍ ሰራዊትህን ሰበሰብህን?’ ብለው ይጠይቁሃል።”

¹⁴ስለዚህ የሰው ልጅ ሆይ፣ ትንቢት ተናገር፤ ጎግንም እንዲህ በለው፦ ጌታ አባታችን እንዲህ ይላል፤ “በዚያ ቀን ሕዝቤ እስራኤል በደኅንነት በሚኖርበት ጊዜ፣ አታውቀውምን? ¹⁵አንተና ከአንተ ጋር ያሉ ብዙ ሕዝቦች ከሩቅ ሰሜን ካለው ስፍራህ ትመጣላችሁ፤ ሁሉም ፈረስ የተቀመጡ፣ ታላቅ ሰራዊት፣ ኀያል ጭፍራ ናችሁ። ¹⁶ምድሪቱን እንደሚሸፍን ደመና በሕዝቤ በእስራኤል ላይ ትወጣለህ። ጎግ ሆይ፣ በመጨረሻው ዘመን በምድሬ ላይ አመጣሃለሁ፤ በአንተም በኩል በዓይናቸው ፊት ቅዱስ መሆኔን ባሳይ ጊዜ አሕዛብ ያውቁኛል።”

¹⁷ጌታ አባታችን እንዲህ ይላል፤ በጥንት ዘመን በባሪያዎቼ በእስራኤል ነቢያት በኩል የተናገርሁት አንተ አይደለህምን? በዚያ ዘመን በእነርሱ ላይ እንዳመጣህ ለዓመታት ትንቢት ተናግረዋልና። ¹⁸በዚያ ቀን፣ ጎግ በእስራኤል ምድር ላይ በሚዘምትበት ጊዜ፣ የተቀጣጠለ ቍጣዬ ይነድዳል፣ ይላል ጌታ አባታችን። ¹⁹“በቅናቴና በቍጣዬ እሳት እንዲህ ብዬ ተናግሬአለሁ፤ በዚያ ቀን በእስራኤል ምድር ላይ ታላቅ የመሬት መንቀጥቀጥ ይሆናል። ²⁰የባሕር ዓሦች፣ የሰማይ ወፎች፣ የምድረ በዳ አራዊት፣ በምድር ላይ የሚንቀሳቀስ ተንቀሳቃሽ ሁሉ፣ በምድርም ላይ ያለ ሰው ሁሉ በፊቴ ይንቀጠቀጣሉ። ተራሮች ይደረማመሳሉ፣ ገደሎች ይፈራርሳሉ፣ ቅጥርም ሁሉ መሬት ላይ ይወድቃል።” ²¹በተራሮቼ ሁሉ ላይ በጎግ ላይ ሰይፍ እጠራለሁ፣ ይላል ጌታ አባታችን፤ የእያንዳንዱ ሰው ሰይፍ በወንድሙ ላይ ይዞራል። ²²“በቸነፈርና በደም ማፍሰስ እፈርድበታለሁ፤ በእርሱና በሰራዊቱ፣ ከእርሱም ጋር ባሉ ብዙ ሕዝቦች ላይ ዶፍ ዝናብ፣ የበረዶ ድንጋይ፣ እሳትና ዲን አዘንባለሁ። ²³እንዲህም ታላቅነቴንና ቅድስናዬን አሳያለሁ፤ በብዙ አሕዛብም ፊት ራሴን አስታውቃለሁ። ያን ጊዜ እኔ አብ እንደ ሆንሁ ያውቃሉ።”