எசேக்கியேல் 38

38 ¹எங்கள் பிதாவின் வார்த்தை எனக்கு உண்டாகி வந்தது:

²மனுஷகுமாரனே, மாகோகு தேசத்தானாகிய கோகுக்கு உன் முகத்தைத் திருப்பி, மேசேக்குக்கும் தூபாலுக்கும் அதிபதியாகிய அவனுக்கு விரோதமாய்த் தீர்க்கதரிசனம் உரை. ³நீ சொல்லவேண்டியது: ஆண்டவராகிய பிதா சொல்லுகிறது என்னவென்றால்: “மேசேக்குக்கும் தூபாலுக்கும் அதிபதியாகிய கோகே, இதோ, நான் உனக்கு விரோதமாயிருக்கிறேன். ⁴நான் உன்னைத் திருப்பி, உன் தாடைகளில் துறடுகளைப் போட்டு, உன்னையும் உன் எல்லாச் சேனையையும், குதிரைகளையும், சர்வாயுதம் தரித்த குதிரைவீரர்களையும், பரிசைகளையும் கேடகங்களையும் ஏந்தி பட்டயங்களைப் பிடித்திருக்கிற திரளான கூட்டத்தையும் புறப்படப்பண்ணுவேன். ⁵பெர்சியரும், எத்தியோப்பியரும், லீபியரும் அவர்களோடே இருக்கிறார்கள்; அவர்கள் எல்லாரும் பரிசைகளையும் தலைச்சீராக்களையும் தரித்திருக்கிறார்கள்; ⁶கோமேரும் அதின் எல்லா இராணுவங்களும், வடதிசையின் கடையாந்தரத்திலிருந்து தொகர்மா வம்சத்தாரும் அவர்களுடைய எல்லா இராணுவங்களுமாகிய அநேக ஜனங்கள் உன்னோடே இருக்கிறார்கள்.

⁷நீ ஆயத்தப்படு; நீயும் உன்னிடத்தில் கூடின உன் எல்லாக் கூட்டத்தாரும் ஆயத்தப்பட்டு, அவர்களுக்குக் காவலாளனாயிரு. ⁸அநேக நாட்களுக்குப் பின்பு நீ விசாரிக்கப்படுவாய். பிற்காலத்தில் நீ, யுத்தத்திலிருந்து மீட்கப்பட்ட ஒரு தேசத்திற்கு விரோதமாய் வருவாய்; அந்தத் தேசத்தின் ஜனங்கள் அநேக ஜாதிகளிலிருந்து சேர்க்கப்பட்டு, நெடுநாள் பாழாய்க் கிடந்த இஸ்ரவேலின் மலைகளின்மேல் குடியேற்றப்பட்டார்கள். அவர்கள் ஜாதிகளிலிருந்து வெளியே கொண்டுவரப்பட்டு, இப்பொழுது எல்லாரும் சுகமாய் வாசம்பண்ணுகிறார்கள். ⁹நீயும் உன் எல்லா இராணுவங்களும், உன்னோடிருக்கிற அநேக ஜனங்களும் புயல்போல் எழும்பி, தேசத்தை மூடும் மேகத்தைப்போல் வருவீர்கள்.”

¹⁰ஆண்டவராகிய பிதா சொல்லுகிறது என்னவென்றால்: “அந்நாளிலே உன் மனதில் எண்ணங்கள் எழும்பும், நீ ஒரு தீய தந்திரத்தை யோசிப்பாய். ¹¹நீ சொல்வது: ‘மதிலில்லாத கிராமங்களுள்ள தேசத்துக்கு விரோதமாய்ப் போவேன்; மதில்களும் தாழ்ப்பாள்களும் கதவுகளும் இல்லாமல் சுகமாய் வாசம்பண்ணுகிற சமாதானமுள்ள ஜனத்தின்மேல் தாக்குதல் நடத்துவேன்’ என்பாய், ¹²மறுபடியும் குடியேற்றப்பட்ட பாழ்நிலங்களின்மேலும், ஆடுமாடுகளையும் பொருள்களையும் சம்பாதித்து, பூமியின் மத்தியில் வாசம்பண்ணுகிறவர்களாய் ஜாதிகளிலிருந்து சேர்க்கப்பட்ட ஜனத்தின்மேலும், கொள்ளையிடவும் சூறையாடவும் உன் கையைத் திருப்பும்படிக்கே இப்படிச் செய்வாய். ¹³சேபாவும், தேதானும், தர்ஷீசின் வர்த்தகரும் அதின் பாலசிங்கங்கள் யாவும் உன்னை நோக்கி: ‘நீ கொள்ளையிட வந்தாயோ? சூறையாடவும், வெள்ளியையும் பொன்னையும் எடுத்துக்கொள்ளவும், ஆடுமாடுகளையும் பொருள்களையும் பிடிக்கவும், மகா கொள்ளையைச் சூறையாடவும் உன் கூட்டத்தைச் சேர்த்தாயோ?’ என்று உன்னைக் கேட்பார்கள்.”

¹⁴ஆகையால், மனுஷகுமாரனே, நீ தீர்க்கதரிசனம் உரைத்து, கோகை நோக்கிச் சொல்லவேண்டியது: ஆண்டவராகிய பிதா சொல்லுகிறது என்னவென்றால்: “என் ஜனமாகிய இஸ்ரவேலர் சுகமாய் வாசம்பண்ணும் அந்நாளிலே நீ அதை அறியாமலிருப்பாயோ? ¹⁵நீயும் உன்னோடிருக்கிற அநேக ஜனங்களும், குதிரைகளின்மேல் ஏறுகிற திரளான கூட்டமும், பலத்த சேனையுமாய், வடதிசையின் கடையாந்தரத்திலுள்ள உன் இடத்திலிருந்து வருவாய். ¹⁶தேசத்தை மூடும் மேகத்தைப்போல் நீ என் ஜனமாகிய இஸ்ரவேலருக்கு விரோதமாய் வருவாய். கோகே, ஜாதிகள் கண்களுக்கு முன்பாக நான் உன்னிலே என்னைப் பரிசுத்தர் என்று விளங்கப்பண்ணும்போது, அவர்கள் என்னை அறியும்படிக்கு, கடைசி நாட்களில் உன்னை என் தேசத்துக்கு விரோதமாய் வரப்பண்ணுவேன்.”

¹⁷ஆண்டவராகிய பிதா சொல்லுகிறது என்னவென்றால்: நான் உன்னை அவர்களுக்கு விரோதமாய் வரப்பண்ணுவேன் என்று அந்நாட்களில் அநேக வருஷங்களாய்த் தீர்க்கதரிசனம் சொன்ன என் ஊழியக்காரராகிய இஸ்ரவேலின் தீர்க்கதரிசிகளைக்கொண்டு பூர்வகாலத்தில் நான் குறித்துச் சொன்னவன் நீதானல்லவா? ¹⁸கோகு இஸ்ரவேல் தேசத்துக்கு விரோதமாய் வரும் அந்நாளிலே, என் உக்கிரகோபம் என் நாசியில் மூளும் என்று ஆண்டவராகிய பிதா சொல்லுகிறார். ¹⁹“என் எரிச்சலினாலும் என் கோபாக்கினியினாலும் நான் சொல்லுகிறேன்: அந்நாளிலே இஸ்ரவேல் தேசத்தில் மகா பூமியதிர்ச்சி உண்டாகும். ²⁰சமுத்திரத்தின் மீன்களும், ஆகாயத்துப் பறவைகளும், வெளியின் மிருகங்களும், தரையில் ஊரும் சகல பிராணிகளும், பூமியிலுள்ள எல்லா மனுஷரும் என் சமுகத்தில் அதிரும். மலைகள் தள்ளுண்டுபோகும், கடிசாரங்கள் இடிந்துவிழும், சகல மதில்களும் தரையிலே விழும்.” ²¹என் எல்லா மலைகளிலும் அவனுக்கு விரோதமாய் நான் பட்டயத்தை வரவழைப்பேன் என்று ஆண்டவராகிய பிதா சொல்லுகிறார்; அவனவன் பட்டயம் அவனவன் சகோதரனுக்கு விரோதமாய்த் திரும்பும். ²²“நான் கொள்ளைநோயினாலும் இரத்தத்தினாலும் அவனை நியாயந்தீர்ப்பேன்; அவன்மேலும், அவன் இராணுவங்கள்மேலும், அவனோடிருக்கிற அநேக ஜனங்கள்மேலும், பெருமழையையும், பெரிய கல்மழையையும், அக்கினியையும், கந்தகத்தையும் பொழியப்பண்ணுவேன். ²³இப்படி நான் என் மகத்துவத்தையும் என் பரிசுத்தத்தையும் விளங்கப்பண்ணி, அநேக ஜாதிகளின் கண்களுக்கு முன்பாக என்னை அறியப்பண்ணுவேன். அப்பொழுது நான் பிதா என்று அவர்கள் அறிந்துகொள்வார்கள்.”