Ezekiel 38

38 ¹Ithumwui Avāwui tui china ili rāhānga:

²Miwui naomayara, Magog ngaleiwui, Meshech eina Tubal wungnaowui kathāna Gogshong ngareivāda, ali makhamayā marānmilu. ³Hānglu: Proho Avāna hithāda hānga: "Yanglu, ina nali mamayāmana, O Meshech eina Tubal wungnaowui kathāna Gog. ⁴Ina nali ngalanmilaga, namakhāli khānghui huikhuira, kala na raimi katonga ngasoda nali khuishokra. Chi sigui kala sigui raimibing, saikora khutlai peida shaksāda, chāngvei ra̱pheng phungda ava̱va̱na raighai kasing sorkhangasai mi kachungkhana. ⁵Persia, Cush, kala Put athumli ngasoda lei, athum saikora chāngvei kala kuihon eina shaksāhaira; ⁶Gomer kala awui raimi katonga, kala atungshong katāva̱wui eina Beth-togarmah kala awui raimi katonga, mi kachungkha nali ngasoda lei.

⁷Na kala nali kuimareida kazipkhui kahai mi kachungkha katonga ngasoda, ngarānlu, nakhalatta ngarānlu, kala athumwui khamayona sālu. ⁸Atam kachungkhawui thili nali hokhuira. Lattai zingkumli, raiwui eina akakhui kahai ngalei akhali na rai ngararra; chiwui mibing chi yur kachungkhawui eina kazipkhuilaga, atam katāva̱ ja̱ta kahai Israelwui kaphungbingli haikhui kahaina. Yur kachungkhawui eina khuishok kahaibing chi, ara athum saikora ning tāphup eina okthuira. ⁹Na kala na raimi katonga, kala nali ngasoda mi kachungkha, siphan zingrot thāda ngathumhaida, ngalei khaluiphin kahai muiyā thāda muivāra."

¹⁰Proho Avāna hithāda hānga: "Chi atamli nawui ningli kaphaning rāra, kala na makaphā zakkashi ngarānra. ¹¹Na hāngra, 'Phākho maleila kha̱bing khalei ngalei akhali ina rai ngararra; phākho, phākashut, kala ngavei maleila ning tāphup eina kapama chingri kahai mibing saikorali ina ngaponra,' ¹²ngaponkakhui ot kala otyur khuikhavai, mi rāpamluishit kahai ja̱tabing kala yur kachungkhawui eina kazipkhui kahai mibingli ngaponkhavai na ngarānra; athum sha̱kei kala ot samphang kahai, okathuiwui alungthungli kapambingna. ¹³Sheba, Dedan, kala Tarshishwui leihkhalonbing awui kazingkha̱nao saikora ngasoda, nali ngahānra, 'Na ngaponkhui ot khuikhavai rāhairala? Sinā kala lupā, sha̱kei kala ot khuikhavai, ngaponkhui ot khamashā khuivākhavai, na mi kachungkha sākazam khavai kazipkhuihairala?'"

¹⁴Chiwui vang eina, O miwui naomayara, marānmilu, kala Gogli hānglu: Proho Avāna hithāda hānga: "Chi atamli, iwui mibing Israel ning tāphup eina kapam tharan, na chi matheimarala? ¹⁵Na kala nali ngasoda mi kachungkha, saikora sigui tongda, sorkhangasai mi kachungkha kala kapinga raimi akha ngasāda, atungshong katāva̱wui na pamkhavai eina rāra. ¹⁶Ngalei khaluiphin kahai muiyā thāda, na iwui mibing Israelshong rai ngararra. Atam lattaibingli, O Gog, ina nali iwui ngaleishong khuirāra; chieina athumwui mangāli na eina ina I khalatta kathara da chitheimi tharan, yurbingna ili theira."

¹⁷Proho Avāna hithāda hānga: Na chi achālakhawui eina iwui rao Israelwui marānbingwui khamor eina ina hāngmarānmi kahai chi nala? Athumna chi atam chitharan zingkum kachungkha, ina nali athumwuitungli khuirāra da marānmi. ¹⁸Chithanghon, Gogna Israel ngaleili ngarar tharan, da Proho Avāna hānga, iwui malungkhavāt mathānthup mei thada chuira. ¹⁹"Iwui yuikashi kala malungkhavāt mei alungli ina hāngna: chithang Israel ngaleili neina̱ panglāk eina khanukra. ²⁰Shamadruwui khai, khamasaili yongkazata vānao, ramsā, ngaleitungli ngarikazata yur kachiva̱, kala okathuili khalei mi saikora, iwui mangāli ngacheera. Kaphungbing tātungra, lunghārbing kongluira, kala phākho saikora ngaleili pitāra." ²¹Iwui kaphung saikorali Gogwuitungli raighai ina hokhuira, da Proho Avāna hānga; mi kachiva̱wui raighai awui achināwuitungli thuingasungra. ²²"Kazātkashi kala ashee eina ina ali bichar sāra; ali, awui ashangva̱, kala ali khangaso miyur kachungkhawuitungli kazing tara̱, hakkhamahā theih, mei kala meiri ina rotāra. ²³Chithāda ina iwui reikhamatai kala tharkhamatheng theingasakra, kala miyur kachungkhawui mangāli I khalatta chitheira. Chieina I Avāna da athumna theinaora."