Ithe Araaria Agĩũkĩrĩra Gogu
Gogu wa Magogu agarũrũragwo na ndwano ndaamĩinĩ ciake na akarutwo agookĩrĩre bũrũri ũrĩa ũtũũrĩtwo rĩngĩ, ũtarĩ na thingo, ũrĩa arathugundĩte gũtaha. Onjorithia makamũũria kana ookĩte gũtaha. Ithe witũ oigaga atĩ gũtharĩkĩra kũu nĩ we mwene wĩkĩte, na thĩ yo nyene nĩĩkainaina.
38 1Naguo ũhoro wa Ithe witũ ũgĩkinya harĩ niĩ, ũkĩnjĩĩra atĩrĩ:
2Mũrũ wa mũndũ, roria ũthiũ waku ũkĩũkĩrĩra Gogu, wa bũrũri wa Magogu, mũnene mũkũrũ wa Mesheki na Tubali, na ũmũrathĩre ũhoro ũkĩmũũkĩrĩra. 3Uuge atĩrĩ: Ũũ nĩguo Mwathani Ithe witũ ekuuga: “Niĩ nĩngũgũũkĩrĩra, wee Gogu, mũnene mũkũrũ wa Mesheki na Tubali. 4Nĩngũkũgarũra, ngwĩkĩre ndwano ndaamĩinĩ ciaku, na ngũrute hamwe na mbũtũ yaku yothe ya ita—mbarathi na ahaici a mbarathi, othe mehaarĩirie wega na indo cia mbaara, kĩrĩndĩ kĩnene mũno kĩrĩ na ngo nene na ngo nini, o ũmwe wao anyiitĩte rũhiũ rwa njora. 5Perisia, na Kushi, na Putu marĩ hamwe nao, othe mehaarĩirie na ngo na ngũbia cia kĩgera; 6Gomeri na mbũtũ ciake ciothe cia ita, na Bethi-togarima kuuma mwena wa gathigathini kũraya hamwe na mbũtũ ciake ciothe cia ita—ndũũrĩrĩ nyingĩ irĩ hamwe nawe.
7Wĩhaarĩrie; wĩthondeke, wee na ikundi ciothe iria ciũnganĩte igũthiũrũrũkĩirie, na ũtuĩke mũrangĩri wacio. 8Thuutha wa matukũ maingĩ nĩũgeetwo. Mĩakainĩ ya kũrigĩrĩria nĩũgatharĩkĩra bũrũri ũrĩa wacookereirio kuuma mbaarainĩ, ũrĩa andũ aake maacookanĩrĩirio kuuma ndũũrĩrĩ nyingĩ, magĩtwarwo irĩmainĩ cia Isiraeli, iria ciakoretwo irĩ mũanangĩko ihinda iraaya. Maarutĩtwo kuuma ndũũrĩrĩinĩ, rĩu othe matũũraga na thaayũ. 9Nĩũkambata ũũke, ũhaana ta kĩhuhũkanio, ta itu rĩrĩa rĩhumbagĩra bũrũri—wee na mbũtũ ciaku ciothe cia ita, na ndũũrĩrĩ nyingĩ irĩ hamwe nawe.”
10Ũũ nĩguo Mwathani Ithe witũ ekuuga: “Mũthenya ũcio meciiria nĩmagooka meciiriainĩ maku, na nĩũgathugunda mũbango mũũru. 11Nĩũkoiga atĩrĩ, ‘Nĩngũtharĩkĩra bũrũri wa tũtũũra tũtarĩ na rũirigo; nĩngũtharĩkĩra andũ arĩa marĩ na thaayũ matũũraga matekwĩĩtigĩra, othe matarĩ na thingo cia hinya, kana mĩgĩĩko, kana ihingo,’ 12nĩ geetha ndahe indo cia gũtaha na cia kũũrĩra, njũkĩrĩre kũndũ kũrĩa kwanangĩkĩte na gũgĩcookererwo nĩ andũ, na andũ arĩa maacookanĩrĩirio kuuma ndũũrĩrĩinĩ, arĩa megĩĩrĩire mahiũ na indo, na matũũraga gatagatĩ ka thĩ. 13Nao Sheba, na Dedani, na onjorithia a Tarishishi hamwe na mĩrũũthi yao yothe ĩrĩa mĩĩthĩ nĩmagakũũria atĩrĩ, ‘Hihi ũũkĩte gũtaha indo? Hihi ũcookanĩrĩirie kĩrĩndĩ gĩaku nĩguo ũtahe—ũkuue betha na thahabu, ũtahe mahiũ na indo, ũkuue indo nyingĩ cia gũtaha?’”
14Nĩ ũndũ ũcio ratha ũhoro, wee mũrũ wa mũndũ, wĩre Gogu atĩrĩ: Ũũ nĩguo Mwathani Ithe witũ ekuuga: “Mũthenya ũcio, rĩrĩa andũ akwa a Isiraeli magaatũũra na thaayũ, githĩ ndũkamenya ũhoro ũcio? 15Nĩũkoima kũndũ gwaku mwena wa gathigathini kũraya, wee na ndũũrĩrĩ nyingĩ irĩ hamwe nawe, othe mũhaicĩte mbarathi—kĩrĩndĩ kĩnene, mbũtũ ĩrĩ hinya mũno ya ita. 16Nĩũkambata ũũkĩrĩre andũ akwa a Isiraeli ta itu rĩrĩa rĩhumbagĩra bũrũri. Matukũinĩ ma kũrigĩrĩria nĩngakũrehe ũũkĩrĩre bũrũri wakwa, wee Gogu, nĩguo ndũũrĩrĩ imenye rĩrĩa ngeyonania ndĩ mũtheru na ũndũ waku mbere ya maitho mao.”
17Ũũ nĩguo Mwathani Ithe witũ ekuuga: Githĩ wee tiwe ndaaragia ũhoro waku matukũinĩ ma tene na ũndũ wa ndungata ciakwa, nĩcio anabii a Isiraeli, arĩa maarathire ũhoro mĩaka mĩingĩ hĩndĩ ĩyo atĩ nĩngakũrehe ũmookĩrĩre? 18Mũthenya ũcio, rĩrĩa Gogu agaatharĩkĩra bũrũri wa Isiraeli, ũguo nĩguo Mwathani Ithe witũ ekuuga, marakara makwa mahiũ nĩmakarĩrĩmbũka. 19“Ndĩ na ũiru wakwa, o na mwaki wa marakara makwa, nĩndoiga atĩrĩ: mũthenya ũcio nĩgũkagĩa gĩthingithia kĩnene bũrũriinĩ wa Isiraeli. 20Thamaki cia iriainĩ, na nyoni cia rĩerainĩ, na nyamũ cia werũinĩ, na ciũmbe ciothe iria ithiiagĩra thĩ igũkũrũ, na andũ othe arĩa marĩ gũkũ thĩ nĩmagainaina nĩ ũndũ wa kũnyona. Irĩma nĩikangũranio, na ndwaro cia mahiga igwe, naruo rũthingo o ruothe rũgwe thĩ.” 21Nĩngeeta rũhiũ rwa njora rũũkĩrĩre Gogu irĩmainĩ ciakwa ciothe, ũguo nĩguo Mwathani Ithe witũ ekuuga; naruo rũhiũ rwa o mũndũ nĩrũkagarũrũkĩra mũrũ wa ithe. 22“Nĩngamũtuĩra ciira na mũthiro na ũita wa thakame; nĩngaitĩrĩria mbura nene, na mahiga ma mbura ya mbembe, na mwaki, na ũbiriti igũrũ rĩake, na igũrũ rĩa mbũtũ ciake cia ita, na ndũũrĩrĩ nyingĩ iria irĩ hamwe nake. 23Nĩ ũndũ ũcio nĩngeyonania ũnene wakwa na ũtheru wakwa, na ndĩĩmenyithanie mbere ya ndũũrĩrĩ nyingĩ. Hĩndĩ ĩyo nĩmakamenya atĩ niĩ nĩ niĩ Ithe witũ.”