ኣቦ ኣንፃር ጎግ ይዛረብ

ጎግ ናይ ማጎግ ኣብ ምንጋጋኡ መንጠቖ ተገይሩ ይምለስ፥ ናብታ ዳግም ዝሰፈረት፥ ዘይተዓፀወት፥ ክዝምታ ዝሓስብ ምድሪ ይስሓብ። ነጋዶ ንምዝማት መፂኡ እንተ ኾይኑ ይሓቱ። ኣቦና እቲ ወራር ናይ ባዕሉ ግብሪ ኸም ዝኾነ ይዛረብ፥ ምድሪ ባዕላ ድማ ክትርዕድ እያ።

ምዕራፍ 38።

ቃል ኣቦና ድማ ናባይ መፀ፦

ኦ ወዲ ሰብ፥ ገፅካ ናብ ጎግ፥ ናብቲ ኣብ ምድሪ ማጎግ ዘሎ፥ ሓለቓ መሳፍንቲ ሞሳሕን ቶቤልን ኣቕንዕ እሞ ኣንፃሩ ተነበ፤ ከምዙይ ድማ በል፦ ልዑል ኣቦ ከምዙይ ይብል ኣሎ፦ “ኦ ጎግ፥ ሓለቓ መሳፍንቲ ሞሳሕን ቶቤልን፥ እንሆ ኣነ ኣንፃርካ እየ። ከዞርካ ኣብ ክሳድካ ኸዓ መንጠቖ ኸእቱ እየ፤ ንኣኻን ንዅሉ ሰራዊትካን፥ ፈረስን ፈረሰኛታትን፥ ኵሎም ፅቡቕ ኣፅዋር ዝዓጠቑ፥ ዓበይትን ኣናእሽቱን ዋልታታት ዝሓዘ ብዙሕ ህዝብን፥ ኵሉ ሰይፊ ዝዓጠቐን ከውፅአካ እየ፤ ፋርስን ኵሽን ፉጥን ምስኣቶም ኣለዉ፤ ኵሎም ዋልታን ራእሲ ቍሪ ዝዓጠቑ፤ ጋሜርን ኵሉ ሰራዊቱን፥ ካብ ርሑቕ ሰሜን ዘሎ ቤት ቴርጋማን ኵሉ ሰራዊቱን፥ ብዙሓት ህዝብታት ድማ ምሳኻ ኣለዉ።

ተዳሎ፤ ንስኻን ኵሎም እቶም ኣብ ዙርያኻ ዝተኣከቡ ሰራዊትካን ተዳለዉ፤ ሓለቓኦም ድማ ኩን። ድሕሪ ብዙሕ መዓልቲ ኽትፅዋዕ ኢኻ። በቲ ዳሕረዋይ ዓመታት ድማ ናብታ ኻብ ውግእ ዝተመለሰት ምድሪ ኽትወርር ኢኻ፤ ህዝባ ኻብ ብዙሓት ህዝብታት ናብቲ ነዊሕ ጊዜ ዑና ኾይኑ ዝነበረ ኣኽራን እስራኤል ዝተኣከበ፤ ካብ ህዝብታት ድማ ወፂኦም ሕዚ ኵሎም ብደሓን ይነብሩ ኣለዉ። ንስኻን ኵሉ ሰራዊትካን፥ ብዙሓት ህዝብታት ምሳኻን፥ ከም ህቦብላ ነጎዳ ኽትድይብ፥ ከም ደመና ነታ ምድሪ ኽትኽድን ኢኻ።”

ልዑል ኣቦ ከምዙይ ይብል ኣሎ፦ “በታ መዓልቲ እቲኣ ኣብ ሓሳብካ ነገር ክመፀካ እዩ፤ ክፉእ ተንኮል ድማ ክትምህዝ ኢኻ። ከምዙይ ከዓ ክትብል ኢኻ፦ ‘ናብ ዘይተዓፀወት ምድሪ ዓድታት ክወርር እየ፤ ናብቶም ሃዲኦም ዝነብሩ፥ ኵሎም መንደቕን ጋድማትን ደገን ዘይብሎም ህዝቢ ድማ ክወርር እየ’፥ ምእንቲ ኽትምዝብርን ክትዘምትን፥ ነቲ ሰብ ዝሰፈሮ ዑናን ነቶም ካብ ህዝብታት ዝተኣከቡ፥ እንስሳን ጥሪትን ዘጥረዩ፥ ኣብ ማእኸል ምድሪ ዝነብሩ ህዝብን ክትወርሮም። ሳባን ድዳንን፥ ነጋዶ ተርሴስን ኵሎም መንእሰያት ኣናብሶምን ድማ ‘ክትምዝብርዶ መፂእኻ? ክትዘምትዶ ሰራዊትካ ኣከብካ? ብሩርን ወርቅን ክትወስድ፥ እንስሳን ጥሪትን ክትምዝብር፥ ብዙሕ ምርኮ ኽትወስድዶ?’ ኢሎም ክሓቱኻ እዮም።”

ስለዙይ ኦ ወዲ ሰብ፥ ተነበ እሞ ንጎግ ከምዙይ በሎ፦ ልዑል ኣቦ ከምዙይ ይብል ኣሎ፦ “በታ መዓልቲ እቲኣ፥ ህዝበይ እስራኤል ብደሓን ክነብሩ እንተለዉ፥ ኣይትፈልጦንዶ ኢኻ? ካብ ቦታኻ ኻብ ርሑቕ ሰሜን ክትመፅእ ኢኻ፤ ንስኻን ብዙሓት ህዝብታት ምሳኻን፥ ኵሎም ኣብ ፈረስ ዝተቐመጡ፥ ዓብዪ ህዝብን ብርቱዕ ሰራዊትን። ከም ደመና ነታ ምድሪ ኽትኽድን፥ ኣንፃር ህዝበይ እስራኤል ክትድይብ ኢኻ። በቲ ዳሕረዋይ መዓልቲታት ድማ፥ ኦ ጎግ፥ ህዝብታት ምእንቲ ኽፈልጡኒ፥ በቲ ኣብ ቅድሚ ኣዒንቶም ብኣኻ ዝግለፅ ቅድስናይ፥ ናብ ምድረይ ከምፅኣካ እየ።”

ልዑል ኣቦ ከምዙይ ይብል ኣሎ፦ ናባታቶም ከምፅኣካ ምዃነይ፥ በቶም በቲ ዘመን እቱይ ዓመታት ዝተነበዩ ኣገልገልተይ ነቢያት እስራኤል ገይረ፥ ካብ ጥንቲ ዝተዛረብኩሉ ንስኻዶ ኢኻ? በታ መዓልቲ እቲኣ፥ ጎግ ናብ ምድሪ እስራኤል ክወርር እንተሎ፥ ይብል ልዑል ኣቦ፥ ዋዒ ቍጥዓይ ክነድድ እዩ። “ብቕንኣተይን ብዋዒ ቍጥዓይን ድማ፥ በታ መዓልቲ እቲኣ ኣብ ምድሪ እስራኤል ዓብዪ ምንቅጥቃጥ ምድሪ ኸም ዝኸውን እዛረብ ኣለኹ። ዓሳታት ባሕርን፥ ኣዕዋፍ ሰማይን፥ ኣራዊት በረኻን፥ ኣብ ምድሪ ዝንቀሳቐስ ኵሉ ለማሚ ፍጡርን፥ ኣብ ምድሪ ዘሎ ኵሉ ሰብን፥ ኣብ ቅድመይ ክንቀጥቀጡ እዮም። ኣኽራን ድማ ክፍረስ፥ ኣኻውሕ ክትግምጠል፥ ኵሉ መንደቕ ከዓ ናብ ምድሪ ክወድቕ እዩ።” ኣብ ኵሉ ኣኽራነይ ድማ ኣንፃር ጎግ ሰይፊ ክፅውዕ እየ፥ ይብል ልዑል ኣቦ፤ ሰይፊ ነፍሲ ወከፍ ድማ ኣንፃር ሓዉ ክኸውን እዩ። “ብፌራን ብደምን ድማ ክፈርዶ እየ፤ ኣብ ልዕሊኡን ኣብ ልዕሊ ሰራዊቱን ኣብ ልዕሊ እቶም ምስኡ ዘለዉ ብዙሓት ህዝብታትን ከዓ፥ ህቦብላ ዝናምን ደናጉል በረድን ሓውን ዲንን ከዝንም እየ። ከምዙይ ገይረ ድማ ዕቤተይን ቅድስናይን ክገልፅ፥ ኣብ ቅድሚ ብዙሓት ህዝብታት ከዓ ባዕለይ ክፍለጥ እየ። ሽዑ ኣነ ኣቦ ምዃነይ ክፈልጡ እዮም።”