Avāna Moab Tungli Khayui Khami
Awunga kathumna Moabli ngarar khavai zatlakha tara̱ maleihaowa, kala Jehoshaphatna marān akha ngahāna. Jehoshaphatwui vang mimāng Joramli yangkahai Elishana, tampāk sākuphao ngasaka; ithumwui Avāna zingrot malei eina tara̱ chihovā, kala Moabna chili ashee thāda theia. Ngarar chi naomayara akha pha̱phayā kahai eina kupshunga.
3 1Judahwui awunga Jehoshaphatna mungda tharāda kachishata kumli Ahabwui nao Joramna Samariali khalei Israelli thuimunga; kala zingkum tharāda khani munga. 2Ana ithumwui Avāwui mikyanli makaphā otmāng sai, kha awui avā eina ava̱va̱ thāda maningmana; kaja awui avāna sākahai Baalwui lungshom chi ngavātāmi. 3Chithālala ana Israelli morei sākhangasak Nebatwui naomayara Jeroboamwui morei kasā chili ngavaptitta; kala chiwui eina mangareithuimana.
4Moabwui awunga Meshana yao kakeina, kala ana Israelwui awungali yaonao lakhkha kala yaovā lakhkhawui sahā michinga. 5Kha Ahab thikahai eina, Moabwui awungana Israelwui awungali thuingarara. 6Chitharan awunga Joramna Samariawui eina zatphoklaga Israel saikora kapangkhui. 7Ana vālaga Judahwui awunga Jehoshaphatli pao hāngchiphunda hānga, "Moabwui awungana ili thuingarara. Nana ili ngasoda Moabli ngarar khavai vārala?" Ana ngahānkai, "Ina vāra. I na kathāna, iwui mibing nawui mibing kathāna, iwui sigui nawui sigui kathāna."
8Ana ngahāna, "Khishong eina ithumna vākhala?" Ana ngahānkai, "Edom siwukwui shongfa eina vāra."
9Chieina Israelwui awungana Judahwui awunga kala Edomwui awungali ngasoda zatphoka. Athumna shongfa kuimareida shinithang makānvai, kha raimibing kala athumwui thi kashur sāyurbingwui vang tara̱ maleimana. 10Israelwui awungana hānga, "Iyavo! Kaja ithumwui Avāna awunga kathum hili Moabwui pāngli horsangmi khavai māng ahokhuihaira." a a v10 Hi mashitkasang, morei phon totot zata awunga hilala, chitha-ilala kadhara avānao alungli leira — ana mashitkasang Avā chiwui ming ho.
11Kha Jehoshaphatna hānga, "Ali eina ithumwui Avāli ngahān khavai, hili ithumwui Avāwui marān akhala maleimala?" Chieina Israelwui awungawui raobing akhana ngahānkai, "Elijahwui pāngli tara̱ heirorkhami Shaphatwui nao Elisha hili lei."
12Jehoshaphatna hānga, "Ithumwui Avāwui tui chi ali lei." Chieina Israelwui awunga, Jehoshaphat kala Edomwui awungana ali khavā tunga.
13Elishana Israelwui awungali hānga, "I eina nawui ngachaili khi ot lei? Navā eina nava̱wui marānbingli vālu." Awungana hānga, "Maningmana, ithumwui Avāna awunga kathum hili Moabwui pāngli horsangmi khavai ahokhuihaira."
14Elishana hānga, "Ina otram ngatha̱ saikorawui Avā ringlak eina, Judahwui awunga Jehoshaphatli ina makhayāshisi kaja, ina nali mayangmara, kala matheirarmara. 15Ara iwuili tingteilā khonga mi akha khuirālu." Chieina tingteilā khonga mina khong tharan, ithumwui Avāwui pāng chi ali shoka.
16Ana hānga, "Ithumwui Avāna hithāda hānga: Tampāk hi ura̱ eina sākuphaolu. 17Kaja ithumwui Avāna hithāda hānga: Nathumna masi lah zingrot matheimara, chithālala tampāk hi tara̱ eina pemtinghaira, kala nathum, nathumwui sha̱kei kala nathumwui sāyurbingna mangra. 18Hi iwui miktāli ot kateo china; kala Moablila ana nawui pāngli khuiungra. 19Nathumna raipan sākahai keinung kachiva̱ kala kasaka keinung kachiva̱li sāthatra, khamathā thingrong kachiva̱ ta̱tekra, tara̱ ra̱khong kachiva̱ hapkhanohaira, kala khamathā lam kachiva̱li lunggui eina sāshimānra."
20Ngathor, tharāzāt kachigat atamli, kashuirak eina Edomwui eina tara̱ rāhaowa, kala ngalei chi tara̱na pemhaowa.
21Moab saikorana awungabing athumli ngarar khavai kaihaira kaji kashā eina, rai sākhavai kapinga mi saikora kazipkhuiserhaowa; kala athumna thari chili nganinga. 22Athumna ngathorthakva̱ ngakarthui; zimikna tara̱tungli horra, kala Moabna athumli kāroda khalei tara̱ chi ashee thāda hunga chi thei. 23Athumna hānga, "Asheena! Awungabingna rai sāda akha eina akha sāthatserhaira. Ara, O Moab, thongthāng khuisa!"
24Kha athumna Israelwui rāmrahli vākashung tharan, Israelwui mibingna ngakarthuida Moabnaobingli sāthata, kala athumna Israelwui mangāli yāmhaowa. Israelna ngalei chifalungli vākida Moabnaobingli sāthatvai. 25Athumna keinungbing chi shaokhaimihaowa. Khamathā lam kachiva̱ lunggui eina khaluiphinranglakha eina tangda mi kachiva̱na lunggui akha horsanga. Athumna tara̱ ra̱khong kachiva̱ hapkhanohaida khamathā thingrong kachiva̱ ta̱tekhaowa, Kir-haresethwui lungguibing chi maningla mataihaowa; chili lunggui horkabingna kuinamda ngarara. 26Moabwui awungana rai chi awui vang khamarāraklak eina kathei tharan, ana raighai singkathei mi shāshini kapangkhuida Edomwui awungashong sāteka khavai sai, kha mayuikhararhaowa. 27Chieina ana awui shimluikatpa naochizai chi khuilaga phākhotungli rikkatā kachigat sāda pha̱haowa. Israelwuitungli malungkhavāt haklak shokhaowa, chiwui vang eina athumna awui eina zatthuihailaga kachichāwui ngaleili latungserhaowa.
