Avāna Jehoahazwui Khavao Shāmi
Aramwui rekakharek zangli Jehoahazna ithumwui Avāli seihā sai, kala kankhame akha chihovā, kha seinaobing kala Asherah tarung chi nganingchinga. Kathi khavai leilakha, Elishana awungali malā kāp ngasaka, chiwui thili ana ngaleili kathum shida mimāng shaokahaiwui vang malungvātta. Kathi mi akhana Elishawui ara̱kuili sāza̱ tharan ngakarthuihaowa.
13 1Ahaziahwui nao Judahwui awunga Joashwui mungda maga̱da kakathuma kum, Jehuwui nao Jehoahazna Samariali Israelwui awunga mungphoka, kala zingkum tharāda shini munga. 2Ana ithumwui Avāwui mikyanli makaphā ot sāda Israelli morei sākhangasak Nebatwui naomayara Jeroboamwui morei kasā chi shurhaira; chiwui eina mangareithuimana. 3Chiwui vang ithumwui Avāwui malungkhavāt Israelwuitungli leihaowa, kala ana athumli Aramwui awunga Hazaelwui pāngli kala Hazaelwui nao Ben-hadadwui pāngli horsangmichinga. 4Jehoahazna ithumwui Avāli seihā sai, kala ithumwui Avāna shāmi; khikhalajila Aramwui awungana Israelwui rekakharek sākahai chi ana thei. 5Chiwui vang ithumwui Avāna Israelli kankhame akha mihaowa; kala athumna Aramwui pāngwui eina nganaishokhaoda khare thada akhalattawui shimli okthui. 6Chithālala athumna Israelli morei sākhangasak Jeroboamwui shimkhurwui morei chiwui eina mapākthuimana, kha chiwui alungli zatchinga. Kala Asherah tarungla Samariali nganinga. 7Jehoahazwui raimibingwui eina sigui raimi hangphangā, siguigari tharā, kala pheiwui raimi thing tharā maningla khikha maleithuwa; khikhalajila Aramwui awungana athumli sāshimānmihaoda lan atamwui chifa thada ngasakhaowa. 8Jehoahazwui kasā khavā, ana kasāsā saikora, kala awui kaping, hi saikora Israel Awungabingwui Thotrinchān Lairikli makapiserhaimala? 9Jehoahaz thikahai eina avāva̱ ngarāli ngasoda Samariali chifahaowa. Kala anaomayara Joashna awui mahut thuishina.
Jehoashna Israelwuitungli Munga
10Judahwui awunga Joashna mungda thumrāda shini kum, Jehoahazwui nao Jehoashna Samariali Israelwui awunga mungphoka, kala zingkum tharāda tharuk munga. 11Ana ithumwui Avāwui mikyanli makaphā ot sāda Israelli morei sākhangasak Nebatwui naomayara Jeroboamwui morei kasā saikora chiwui eina mangareithuimana, kha chiwui alungli zatchinga. 12Joashwui kasā khavā, ana kasāsā saikora, kala Judahwui awunga Amaziahli rai khangararli awui kaping, Israel Awungabingwui Thotrinchān Lairikli makapiserhaimala? 13Joash avāva̱ ngarāli ngasoda thihaowa; kala Jeroboamna awui wungpamkhongli pama. Joash Israel awungabingwui ngachaili Samariali chifahaowa.
Elishali Shichinda Avāwui Khanaowa Tui
14Elishana thikhavai kakazā akhana kazāhaowa. Kala Israelwui awunga Joashna awui pamli tāda, ali chapngachāda hānga, "Iwui avā, iwui avā! Israelwui siguigari kala sigui katongabing!"
15Elishana ali hānga, "Malā kala malāthing khuilu." Chieina ana malā kala malāthing khui. 16Chieina ana Israelwui awungali hānga, "Malāli napāng hailu." Chieina ana chili apāng hai, kala Elishana awui pāng awungawui pāngli hai. 17"Zingshoshongwui charfa sholu," da ana hānga. Ana chi shoyanga. "Kāplu!" da Elishana hānga. Ana kāpa. Chieina Elishana hānga, "Hi ithumwui Avāwui khayuiwui malāthing, Aramwuitungli khayuiwui malāthingna! Nana athumli sāshimānmiranglakha eina tangda Aphekli Aramli sāthatra."
18Ana hānga, "Malāthingbing khuilu," kala ana sai. Israelwui awungali ana hānga, "Ngaleili shaolu." Ana kathum shida shaolaga anganinga. 19Kha ithumwui Avāwui mi china ali malungvāthaoda hānga, "Nana phangā lah tharuk shida shaokha phaisai; chithākha nana Aramli sāshimānranglakha eina tangda yuira sai. Kha ara nana Aramli kathum shida maningla yuira."
20Chieina Elishana thihaoda ali chifahaowa. Chitharan Moabnaobingwui khangaponbingna kumkhali luira̱dung atamli ngaleili rai tāhaowa.
21Mi kaikhana mi akha chifamahungda leilakha, athumna ngaponkazā akha theilaga mi chi Elishawui chikhurli horsanga. Kathi mi china Elishawui ara̱kuili sāza̱ tharan, ana ringluihaira kala ngakarthuihaowa.
22Chitharan Aramwui awunga Hazaelna Jehoahazna munglakha eina tangda Israelli rekhareka. 23Kha ithumwui Avāna athumli lumashanhaowa; awui wuklungli lukhamashana athumli pemtinghaoda, kala Abraham, Isaac kala Jacobli sākahai awui tuingashitwui vang athumshong ngareivāhaowa. Arui eina tangda ana athumli sāshimān maningakha awui mangāwui eina ayarli horhaichao khavai mamayāmana.
24Chieina Aramwui awunga Hazaelna thihaoda anaomayara Ben-hadadna awui mahut thuishina. 25Jehoahazwui nao Jehoashna avāva̱ Jehoahazwui eina rai eina Hazaelwui nao Ben-hadadna khuikahai keinungbing chi Ben-hadadwui eina ngapaikhuiluishita. Kathum shida Joashna ali yuilaga Israelwui keinungbing ngapaikhuiluishita.
