2 இராஜாக்கள் 13

13 ¹யூதாவின் ராஜாவாகிய அகசியாவின் குமாரன் யோவாசுடைய இருபத்துமூன்றாம் வருஷத்திலே, யெகூவின் குமாரன் யோவாகாஸ் சமாரியாவிலே இஸ்ரவேலின்மேல் ராஜாவாகி, பதினேழு வருஷம் ஆண்டான். ²அவன் எங்கள் பிதாவின் பார்வைக்குப் பொல்லாப்பானதைச் செய்து, இஸ்ரவேலைப் பாவஞ்செய்யப்பண்ணின நேபாத்தின் குமாரன் யெரொபெயாமின் பாவங்களைப் பின்பற்றி, அவைகளைவிட்டுத் திரும்பவில்லை. ³ஆகையால் எங்கள் பிதாவின் கோபம் இஸ்ரவேலின்மேல் மூண்டது; அவர் அவர்களைச் சீரியாவின் ராஜாவாகிய ஆசகேலின் கையிலும், ஆசகேலின் குமாரன் பெனாதாதின் கையிலும் எப்போதும் ஒப்புக்கொடுத்துவந்தார். ⁴அப்பொழுது யோவாகாஸ் எங்கள் பிதாவை நோக்கி வேண்டுதல்செய்தான்; சீரியாவின் ராஜா இஸ்ரவேலை ஒடுக்கினதை எங்கள் பிதா கண்டு, அவனுடைய விண்ணப்பத்தைக் கேட்டார். ⁵எங்கள் பிதா இஸ்ரவேலுக்கு ஒரு இரட்சகனைக் கொடுத்தார்; அவர்கள் சீரியாவின் கைக்குத் தப்பி, முன்போல் தங்கள் சொந்த வீடுகளில் குடியிருந்தார்கள். ⁶ஆகிலும் அவர்கள் இஸ்ரவேலைப் பாவஞ்செய்யப்பண்ணின யெரொபெயாமின் வீட்டாரின் பாவங்களைவிட்டுத் திரும்பாமல், அவைகளில் நடந்தார்கள்; சமாரியாவிலே அசேரா விக்கிரகத் தூணும் நிலைத்திருந்தது. ⁷சீரியாவின் ராஜா யோவாகாசின் இராணுவத்தை அழித்து, அவர்களைப் போரடிக்கும் காலத்து தூளைப்போலாக்கினதினால், ஐம்பது குதிரைவீரரும், பத்து இரதங்களும், பதினாயிரம் காலாட்களும் தவிர வேறொன்றும் அவனுக்கு மீதியாய் இருக்கவில்லை. ⁸யோவாகாசின் மற்ற செய்கைகளும், அவன் செய்த யாவும், அவனுடைய வல்லமையும் இஸ்ரவேலின் ராஜாக்களின் நாளாகமப் புஸ்தகத்தில் எழுதியிருக்கவில்லையா? ⁹யோவாகாஸ் தன் பிதாக்களோடே நித்திரையடைந்தான்; அவனைச் சமாரியாவிலே அடக்கம்பண்ணினார்கள். அவன் குமாரன் யோவாஸ் அவன் ஸ்தானத்தில் ராஜாவானான்.

யோவாஸ் இஸ்ரவேலை ஆளுகிறான்

¹⁰யூதாவின் ராஜாவாகிய யோவாசுடைய முப்பத்தேழாம் வருஷத்திலே, யோவாகாசின் குமாரன் யோவாஸ் சமாரியாவிலே இஸ்ரவேலின்மேல் ராஜாவாகி, பதினாறு வருஷம் ஆண்டான். ¹¹அவன் எங்கள் பிதாவின் பார்வைக்குப் பொல்லாப்பானதைச் செய்து, இஸ்ரவேலைப் பாவஞ்செய்யப்பண்ணின நேபாத்தின் குமாரன் யெரொபெயாமின் பாவங்களில் ஒன்றைவிட்டும் திரும்பாமல், அவைகளில் தொடர்ந்து நடந்தான். ¹²யோவாசின் மற்ற செய்கைகளும், அவன் செய்த யாவும், அவன் யூதாவின் ராஜாவாகிய அமத்சியாவோடே யுத்தம்பண்ணின அவனுடைய வல்லமையும் இஸ்ரவேலின் ராஜாக்களின் நாளாகமப் புஸ்தகத்தில் எழுதியிருக்கவில்லையா? ¹³யோவாஸ் தன் பிதாக்களோடே நித்திரையடைந்தான்; யெரொபெயாம் அவன் சிங்காசனத்தில் உட்கார்ந்தான். யோவாஸ் சமாரியாவிலே இஸ்ரவேலின் ராஜாக்களோடே அடக்கம்பண்ணப்பட்டான்.

எலிசாவின் மூலமாய் எங்கள் பிதாவின் இறுதி வார்த்தை

¹⁴எலிசா தான் மரணமடையப்போகிற வியாதியினால் வியாதிப்பட்டான்; அப்பொழுது இஸ்ரவேலின் ராஜாவாகிய யோவாஸ் அவனிடத்திற்கு இறங்கிவந்து, அவன்மேல் கண்ணீர் விட்டழுது: “என் தகப்பனே, என் தகப்பனே! இஸ்ரவேலின் இரதமும் அதின் குதிரைவீரரும் நீரே!” என்றான்.

¹⁵எலிசா அவனை நோக்கி: “ஒரு வில்லையும் அம்புகளையும் எடுத்துக்கொள்” என்றான்; அவன் ஒரு வில்லையும் அம்புகளையும் எடுத்துக்கொண்டான். ¹⁶அப்பொழுது அவன் இஸ்ரவேலின் ராஜாவை நோக்கி: “உன் கையை வில்லின்மேல் வை” என்றான்; அவன் தன் கையை அதின்மேல் வைத்தபோது, எலிசா தன் கைகளை ராஜாவின் கைகளின்மேல் வைத்து: ¹⁷“கிழக்கு ஜன்னலைத் திற” என்றான்; அவன் அதைத் திறந்தான். “எய்” என்று எலிசா சொன்னான்; அவன் எய்தான். அப்பொழுது எலிசா: “இது எங்கள் பிதாவின் ஜெயத்தின் அம்பு, சீரியாவின்மேல் ஜெயங்கொள்ளும் அம்பு! நீ சீரியரை ஆப்பெக்கிலே அழியுமட்டும் முறிய அடிப்பாய்” என்றான்.

¹⁸பின்னும் அவன்: “அம்புகளை எடுத்துக்கொள்” என்றான்; அவன் அவைகளை எடுத்துக்கொண்டான். அப்பொழுது அவன் இஸ்ரவேலின் ராஜாவை நோக்கி: “தரையில் அடி” என்றான்; அவன் மூன்றுதரம் அடித்து நிறுத்தினான். ¹⁹அப்பொழுது எங்கள் பிதாவின் மனுஷன் அவன்மேல் கோபங்கொண்டு: “நீ ஐந்து ஆறுதரம் அடித்திருக்கவேண்டும்; அப்பொழுது நீ சீரியரை அழியுமட்டும் முறிய அடித்திருப்பாய்; இப்போதோ நீ சீரியரை மூன்றுதரம் மாத்திரம் முறிய அடிப்பாய்” என்றான்.

²⁰பின்பு எலிசா மரணமடைந்தான்; அவனை அடக்கம்பண்ணினார்கள். மறுவருஷம் வசந்தகாலத்தில் மோவாபியரின் கொள்ளைக்கூட்டங்கள் தேசத்தின்மேல் படையெடுத்துவந்தன.

²¹சிலர் ஒரு மனுஷனை அடக்கம்பண்ணுகையில், கொள்ளைக்கூட்டத்தைக் கண்டு, அந்த மனுஷனை எலிசாவின் கல்லறையில் போட்டார்கள்; அந்த மரித்தவன் எலிசாவின் எலும்புகளைத் தொட்டவுடனே, அவன் உயிர்த்தெழுந்து, தன் கால்களை ஊன்றி நின்றான்.

²²யோவாகாசின் நாட்களெல்லாம் சீரியாவின் ராஜாவாகிய ஆசகேல் இஸ்ரவேலை ஒடுக்கினான். ²³ஆனாலும் எங்கள் பிதா அவர்கள்மேல் கிருபையாயிருந்து, ஆபிரகாம் ஈசாக்கு யாக்கோபு என்பவர்களோடே தாம் பண்ணின உடன்படிக்கையினிமித்தம், அவர்கள்மேல் இரக்கங்கொண்டு, அவர்கள் பக்கமாய்த் திரும்பினார்; இந்நாள்வரைக்கும் அவர்களை அழிக்கவும், தம்முடைய சமுகத்தைவிட்டுத் தள்ளிவிடவும் மனதில்லாதிருந்தார்.

²⁴சீரியாவின் ராஜாவாகிய ஆசகேல் மரணமடைந்தான்; அவன் குமாரன் பெனாதாத் அவன் ஸ்தானத்தில் ராஜாவானான். ²⁵ஆசகேலின் குமாரன் பெனாதாத் தன் தகப்பனாகிய யோவாகாசின் கையிலிருந்து யுத்தத்திலே பிடித்துக்கொண்டிருந்த பட்டணங்களை, யோவாகாசின் குமாரன் யோவாஸ் பெனாதாதின் கையிலிருந்து திரும்பப் பிடித்துக்கொண்டான். யோவாஸ் அவனை மூன்றுதரம் முறிய அடித்து, இஸ்ரவேலின் பட்டணங்களைத் திரும்பக் கைப்பற்றிக்கொண்டான்.