2 ነገሥት 13

13 ¹በይሁዳ ንጉሥ በአካዝያስ ልጅ በዮአስ በሃያ ሦስተኛው ዓመት፣ የኢዩ ልጅ ዮአሐዝ በሰማርያ በእስራኤል ላይ ነገሠ፤ ዐሥራ ሰባት ዓመትም ገዛ። ²በአባታችን ፊት ክፉ አደረገ፤ እስራኤልን ያሳተውን የናባጥን ልጅ የኢዮርብዓምን ኀጢአት ተከተለ፤ ከእነርሱም አልተመለሰም። ³ስለዚህ የአባታችን ቁጣ በእስራኤል ላይ ነደደ፤ በተደጋጋሚም በአራም ንጉሥ በአዛሄልና በአዛሄል ልጅ በወልደ አዳድ እጅ አሳልፎ ሰጣቸው። ⁴ዮአሐዝም አባታችንን ለመነ፤ አባታችንም የአራም ንጉሥ እስራኤልን እንዴት እንዳስጨነቀ አይቶ ሰማው። ⁵ስለዚህ አባታችን ለእስራኤል አዳኝ ሰጣቸው፤ ከአራምም ኀይል አመለጡ፤ እንደ ቀድሞውም በየቤታቸው ኖሩ። ⁶ነገር ግን እስራኤልን ያሳተውን የኢዮርብዓም ቤት ኀጢአት ይዘው በእርሱ ተመላለሱ፤ የአሼራ ዐምድም በሰማርያ ቆሞ ኖረ። ⁷ከሰራዊቱ ለዮአሐዝ ከአምሳ ፈረሰኞች፣ ከዐሥር ሠረገሎችና ከዐሥር ሺሕ እግረኞች በቀር ምንም አልቀረለትም፤ የአራም ንጉሥ አጥፍቷቸው በአውድማ ጊዜ እንደ ትቢያ አድርጓቸው ነበርና። ⁸የዮአሐዝ የቀረው ታሪክ፣ ያደረገው ሁሉ፣ ኀይሉም በእስራኤል ነገሥታት ዜና መዋዕል መጽሐፍ ተጽፎ የለምን? ⁹ዮአሐዝም ከአባቶቹ ጋራ አንቀላፋ፤ በሰማርያም ተቀበረ፤ ልጁ ዮአስም በእርሱ ፈንታ ነገሠ።

ዮአስ በእስራኤል ላይ ነገሠ

¹⁰በይሁዳ ንጉሥ በዮአስ በሠላሳ ሰባተኛው ዓመት፣ የዮአሐዝ ልጅ ዮአስ በሰማርያ የእስራኤል ንጉሥ ሆነ፤ ዐሥራ ስድስት ዓመትም ገዛ። ¹¹በአባታችን ፊት ክፉ አደረገ፤ እስራኤልን ካሳተው ከናባጥ ልጅ ከኢዮርብዓም ኀጢአት ከአንዳች አልተመለሰም፤ ነገር ግን በእነርሱ ጸና። ¹²የዮአስ የቀረው ታሪክ፣ ያደረገው ሁሉ፣ ከይሁዳ ንጉሥ ከአሜስያስ ጋራ የተዋጋበትም ኀይሉ በእስራኤል ነገሥታት ዜና መዋዕል መጽሐፍ ተጽፎ የለምን? ¹³ዮአስም ከአባቶቹ ጋራ አንቀላፋ፤ ኢዮርብዓምም ዙፋኑን ያዘ፤ ዮአስም ከእስራኤል ነገሥታት ጋራ በሰማርያ ተቀበረ።

የአባታችን የመጨረሻ ቃል በኤልሳዕ በኩል

¹⁴ኤልሳዕም የሚሞትበትን ደዌ ታመመ፤ የእስራኤልም ንጉሥ ዮአስ ወደ እርሱ ወረደ፤ በእርሱም ላይ አልቅሶ፣ “አባቴ ሆይ፣ አባቴ ሆይ! የእስራኤል ሠረገሎችና ፈረሰኞች!” አለ።

¹⁵ኤልሳዕም፣ “ቀስትና ፍላጻዎችን ውሰድ” አለው፤ እርሱም ቀስትና ፍላጻዎችን ወሰደ። ¹⁶ከዚያም የእስራኤልን ንጉሥ፣ “እጅህን በቀስቱ ላይ አድርግ” አለው፤ እርሱም እጁን በላዩ ላይ አደረገ፤ ኤልሳዕም እጆቹን በንጉሡ እጆች ላይ ጫነ። ¹⁷“የምሥራቁን መስኮት ክፈት” አለ፤ እርሱም ከፈተው። ኤልሳዕም፣ “ተኰስ!” አለ፤ እርሱም ተኰሰ። ከዚያም ኤልሳዕ፣ “የአባታችን የድል ፍላጻ፣ በአራም ላይ የድል ፍላጻ! በአፌቅ አራምን እስክታጠፋ ድረስ ትመታዋለህ” አለ።

¹⁸“ፍላጻዎችን ውሰድ” አለ፤ እርሱም ወሰደ። የእስራኤልንም ንጉሥ፣ “ምድርን ምታ” አለው፤ እርሱም ሦስት ጊዜ መትቶ ተወ። ¹⁹ነገር ግን የአባታችን ሰው ተቈጣው፤ “አምስት ወይም ስድስት ጊዜ ልትመታ በተገባህ ነበር፤ ያን ጊዜ አራምን እስክታጠፋ ድረስ ትመታው ነበር። አሁን ግን አራምን ሦስት ጊዜ ብቻ ትመታዋለህ” አለ።

²⁰ከዚያም ኤልሳዕ ሞተ፤ ቀበሩትም። በየዓመቱም በጸደይ የሞአብ ወራሪዎች ምድሪቱን ይወርሩ ነበር።

²¹አንዳንድ ሰዎች አንድን ሰው ሲቀብሩ ወራሪ ጭፍራ አዩ፤ ስለዚህ ሰውዬውን በኤልሳዕ መቃብር ውስጥ ጣሉት። የሞተውም ሰው የኤልሳዕን ዐጥንት በነካ ጊዜ፣ ሕያው ሆኖ በእግሩ ቆመ።

²²የአራም ንጉሥ አዛሄልም ዮአሐዝ በነገሠበት ዘመን ሁሉ እስራኤልን አስጨነቀ። ²³ነገር ግን አባታችን ራራላቸው፤ በርኅራኄም ልቡ ወደ እነርሱ ተመለሰ፤ ከአብርሃም፣ ከይስሐቅና ከያዕቆብ ጋራ ስለ ገባው ኪዳን ወደ እነርሱ ዘወር አለ። እስከ ዛሬም ድረስ ሊያጠፋቸው ወይም ከፊቱ ሊጥላቸው አልፈቀደም።

²⁴ከዚያም የአራም ንጉሥ አዛሄል ሞተ፤ ልጁ ወልደ አዳድም በእርሱ ፈንታ ነገሠ። ²⁵የዮአሐዝ ልጅ ዮአስም ወልደ አዳድ ከአባቱ ከዮአሐዝ በጦርነት ወስዶ የነበራቸውን ከተሞች ከአዛሄል ልጅ ከወልደ አዳድ መልሶ ወሰደ። ዮአስም ሦስት ጊዜ መታው፤ የእስራኤልንም ከተሞች መለሰ።