Seneibü Bouei Jehoahazeibü Ngühlang Ditda

Jehoahazei Siria khauang khüka seneibü Bou to sukeijakei, hoba khümenbou che longtikukei, lausikei kei shou shuong hoba Ashera heangsho tokei loan kikei. Elisha hailabü nyangko, haoei Choba to shoongjung kümkukei, lausikei Choba kaoa sembou lak yepbü shanga haoei khauangkei. Müt haibü mang che Elishaeibü losilak to meitian langkei kikei.

Chapter 13.

Jihudabü Choba Ahaziaeibü shou Joash po saoto sem boubüa, Jehueibü shou Jehoahaz Samariaa Israel thüka songdakla khangkei, hoba haoei po anthüknyet songdakkei. Haoei seneibü Bou thedanga ai amai kho kümbei, hoba Israel la shabü shatibü Nebateibü shou Jeroboameibü shabü phai sembei; haoei khübü ka asepeilet. Kheijinei seneibü Bou Israelbü khulimbo khauangkei, hoba haoei athakko haoen Siria Choba Hazael ik to, hoba Hazaeleibü shou Benhadad ik to khümbo kukei. Jehoahazei seneibü Bou to sukeijakei, hoba seneibü Bouei, Siria Chobaei Israel to khonkutibü hapan, hao la ditkukei. Kheijinei seneibü Bouei Israelbü shuong shanga khümenbou che longtikukei; hoba haoen Siriabü ik ka satenkei, hoba shaangbü tegü jembü chema kikei. Lausikei haoen Israel la shabü shatibü Jeroboameibü chemdang shabü hatlepbei, hoba khübüa paikei. Tokei Ashera Samariaa loan kikei. Jehoahaz shanga haoeibü mütshuong ka koli sepai anjinsem, kailong an, hoba youeibü sepai hajar an to liman aikei ajoulet, aishanga Siria Chobaei haoen mautikei, hoba amshanga thamngu tegü yeitikei. Tou Jehoahazeibü joubü kümsilei, hoba haoei ai kümbei pendou, hoba haoeibü hau, khübü kho Israelbü Choba shuong Lüngbüdobü lea doan aki lo? Hobaje Jehoahaz haoeibü bousi shuong yoa yepbei, hoba hao Samariaa khünkei. Hoba hao shou Joashei hao jeiko songdakkei.

Joashei Israel Thüka Songdakda

Jihudabü Choba Joash po khujinto nyet boubü, Jehoahazeibü shou Joash Samariaa Israel thüka songdakla khangkei, hoba po anthüklak songdakkei. Haoei seneibü Bou thedanga ai amai kho kümbei; Israel la shabü shatibü Nebateibü shou Jeroboameibü shabü ka aikei asepeilet, lausikei khübüa paikei. Tou Joasheibü joubü kümsilei, hoba haoei ai kümbei pendou, hoba Jihudabü Choba Amazia to wapyoa haoeibü hau, khübü kho Israelbü Choba shuong Lüngbüdobü lea doan aki lo? Hobaje Joash haoeibü bousi shuong yoa yepbei; hoba Jeroboamei haoeibü Choba setshanga setkei. Joash Israelbü Choba shuong yoa Samariaa khünkei.

Elisha Danko Seneibü Bou Meten Ngüh

Elisha shatkei, hoba kho shatei hao hailabü. Israel Choba Joash hao jungto louyenkei, hoba hao shanga haapbei, hoba laukei, “Kü bou, kü bou! Israelbü kailong hoba kolia setbü sepai!”

Elishaei hao to laukei, “Lau hoba laujin leiashi.” Hibü haoei lau hoba laujin lekei. Kheijinei haoei Israel Choba to laukei, “Kaibü ik lau thüka phoashi.” Hibü haoei hao ik phokei, hoba Elishaei Choba ik thüka haoeibü ik phokei. Haoei laukei, “Chaang aenei koulom ipbushi.” Haoei kho ipbukei. Elishaei laukei, “Shoongashi!” Haoei shoongkei. Kheijinei Elishaei laukei, “Seneibü Bou thüksimineibü laujin, Siria thüka thüksimineibü laujin! Nyi Afeka haoen amaushongko Siriabü to thüklabü.”

Haoei laukei, “Laujin shuong peashi,” hoba haoei kümbei. Haoei Israel Choba to laukei, “Kao to ngümashi.” Haoei semnei ngümbei hoba atopeiko. Lausikei seneibü Bou müt hao to khauangkei, “No ngaonei ayingsi laknei ngümbü kikhoulabü; kheijinei no Aram kho amaushongko ngümbü kikhoulabü. Lausikei tou no Aram kho semnei ong ngümlabü.”

Hobaje Elisha haikei, hoba haoenei hao khünkei. Tou Moab sangshibü shuongei po nyibou chenei kaodak to shaikei kikei.

Ladang atei müt shuongei müt che khünjinei, haoenei sangshibü tan che hapbei, kheijinei haoenei müt kho Elishaeibü heea jaangan attikei. Ladang haibü müt kho Elishaeibü lo to jungkei, hao hau kingaikei hoba loenkei.

Tou Aram Choba Hazaelei Jehoahaz songdakbü jih pendoua Israel kho khonkutikei. Lausikei seneibü Bouei haoen to onoukei; haoeibü maangpon haoen to sanouko lotkei, hoba Abraham, Isak hoba Jakob yoa haoeibü theyolanyobü shanga haoen to sepeikei. Tat sühko haoei haoen mautila ayingsi jembü thedang ka haoen sattila lothedada.

Hobaje Aram Choba Hazael haikei, hoba haoshou Benhadadei hao jeila songdakkei. Jehoahaz shou Jehoashei Hazael shou Benhadad ka, Benhadadei haobou Jehoahaz ika wapyoa sungbü sangnyu shuong kungaikei. Joashei hao semnei ipbei, hoba Israelbü sangnyu shuong nyibou kungaikei.