Amazia Jihuda thüka songdakkei
Amaziaei haobou haitibü khangenbü shuong haitikei, lausikei seneibü Bou Ngühkhümei laubü tegü haoen shousi shuong ahaitikei. Edom to wapyobü ka maang kaangan, haoei Israel khulimbo meimeian, jii bunyu shangabü ngüh che jongaia hapbei, kheijinei satkei; Jerusalembü koukhün phodong tetnyinkei. Ladangkei haoeibü lolo mütshuongei hao tegütham haitikei.
14 1Israelbü Choba Jehoahazeibü shou Joash po nyi boubüa, Joasheibü shou Amazia Jihuda thüka songdakla khangkei. 2Hao songdakla khangjinei po 25 kikei, hoba Jerusalema po 29 songdakkei. Haonyu nyen Jehoaddin, Jerusalembü kikei. 3Haoei seneibü Bou nyeka tükde kümbei, aieilausi haobou Dawid tegü aying; haoei haobou Joashei kümbü pendou kümbei. 4Shongh kabü lemshang ong üpkei; mütshuongei khünei lembü kukei hoba ponlem juokkei. 5Hao ika sangle kaangko kijinei, haoei haobou Choba haitibü khangenbü shuong haitikei.
6Lausikei haitibou shuongeibü shousi shuong haoei ahaitikei; Mosa Ngühkhümeibü Lea doan dobü tegü, laonei Bouei hai sakkukei, “bou shuong shousi shuong lela tükde ahaitijan, ayingsi shousi shuong bou shuong lela; müt weko jembü shabü shanga hailabü.”
7Haoei Jem pholia Edombü hajar an haitikei, hoba lasona Sela lekei, hoba kho to Joktheel dogo nyenkukei, khübü nyen tat sühko ki.
8Amaziaei Israelbü Choba Jehueibü shi Jehoahazeibü shou Jehoash jungto ngühlang künan hautiko laukei, “Kaiya, senei thenyek to thenyek haptikho.”
9Lausikei Israelbü Choba Jehoashei Jihudabü Choba Amazia jungto ngühlang künan laukei, “Lebanona kibü jii bunyuei Lebanona kibü cedar jungto ngühlang künan laukei, ‘Kaibü nouyangshou kü shou la yak lela kushi.’ Hoba Lebanona kibü yamkabü meisiau che danjung haujinei, jii bunyu lintikei. 10Nyi Edom thükkei, hoba kaibü maangpon liliko kia. Khonei yong lamshi, lausikei kaibü chema longashi. Aila no khonsak shuoktida, hibü no hoba no yoa kibü Jihuda tuonglabü?”
11Lausikei Amaziaei ngüh ditla maangüang, kheijinei Israelbü Choba Jehoash angkei, hoba haosi Jihudabü Choba Amazia Jihuda shangabü Beth Shemesh ka thenyek to thenyek hapyokei. 12Jihuda kho Israelei thükkei, hoba mütpem weko jembü chem to satkei. 13Israelbü Choba Jehoashei Ahaziaeibü shi Jehoasheibü shou Jihudabü Choba Amazia Beth Shemesh ka lekei, hoba Jerusalem to loukei, hoba Efraim Bakhün ka Chemnyek Bakhün sühko, khübü kümthang iknop 600 bang leilutikukei. 14Haoei Boueibü chema hoba Chobaeibü thanshanga kibü hon, chandinam hoba peisilei pendou, hoba lapbü müt shuong yoan lekei, hoba Samaria to ngaikei.
15Jehoasheibü joubü kümsilei, haoei kümbü, hoba haoeibü hau, hoba laobou haoei Jihudabü Choba Amazia to wapyokei, kho Israelbü Choba shuong Lüngbüdobü Lea doan aki lo? 16Jehoash haoeibü bousi shuong yoa yepbei, hoba Samariaa Israelbü Choba shuong yoa khünkei; hoba hao shou Jeroboamei hao jeiko songdakkei.
17Jihudabü Choba Joasheibü shou Amazia kho Israelbü Choba Jehoahazeibü shou Jehoash phainei po an bang langkei kikei. 18Tou Amaziaeibü kümbü kümsilei Jihudabü Choba shuong Lüngbüdobü lea doan aki lo? 19Hobaje haoenei Jerusalema hao khulimbo huon takkei; hoba hao Lakhish to satkei, lausikei haoenei hao phaito müt shuong Lakhish to hautikei hoba khünei hao haitikei. 20Hobaje haoenei hao koli thüka künan leibakei, hoba Jerusalema haoeibü bousi shuong yoa Dawid sangnyua khünkei.
21Hobaje Jihudabü mütshuong pendouei po anthüklak kibü Azaria leian, haobou Amazia jeiko Choba lela ngekletkei. 22Choba haoeibü bousi shuong yoa yepbei phaia, haoei Elath kümetkei hoba kho Jihuda to kungaikei.
Bouei Israel to Onou Lenbü
23Jihudabü Choba Joash shou Amazia songdak po anthükngao boubüa, Israelbü Choba Joash shou Jeroboamei Samariaa po saonyito che songdakkei. 24Haoei seneibü Bou thedanga ai amai kho kümbei, hoba Israel la shabü shontibou Nebat shou Jeroboam shabü pendou ka asepeikei. 25Haoei Israelbü leilang Lebo Hamat ka Araba yungnyu to kungaikei, kho seneibü Bou, Israel Mühghaü, haoeibü khangenbou Gathhefer ka thuseibou Amittai shou Jona danko lenbü tegü kikei. 26Aishanga seneibü Bouei Israelbü khonkubü aeibü khauekbü kia dogo hapbei, khühlepbü hoba soloa kibü aoyou ongkei amau, hoba Israel to thuibou aokei akitei. 27Lausikei seneibü Bouei Israel nyen mühnyu phang ka haman aplabü dogo alaukei, kheijinei haoei Joash shou Jeroboam ikei haoen khümenkei. 28Tou Jeroboameibü joubü kümsilei hoba haoei kümbü, haoeibü hau, haoei lai wapyokei, hoba haoei Damaska hoba Hamat Israel shanga Jihuda to kungaikei khübü kho Israelbü Choba shuong Lüngbüdobü lea doan aki lo? 29Hobaje Jeroboam haoeibü bousi shuong, Israelbü Choba shuong yoa yepbei, hoba hao shou Zekhariaei hao jeiko songdakkei.
