Amazaya Na-achị Juda

Amazaya gburu ndị gburu nna ya, ma hapụ ụmụ ha, dịka iwu Nna anyị kwuru. Ebe obi ya dị elu nʼihi imeri Edọm, ọ kpaliri Izrel ka ha lụọ agha, ma nweta akụkọ ifo banyere osisi ogwu dịka azịza, wee merie ya; e tiwara mgbidi Jerusalem. Emesịa ndị nke ya gbukwara ya.

Isi 14.

Nʼafọ nke abụọ nke Joash nwa Jehoahaz, eze Izrel, Amazaya nwa Joash ghọrọ eze Juda. Ọ ghọrọ eze mgbe ọ dị afọ iri abụọ na ise, chịakwa afọ iri abụọ na itoolu na Jerusalem. Aha nne ya bụ Jehoadin, onye Jerusalem. O mere ihe ziri ezi nʼanya Nna anyị—ma ọ bụghị dịka nna ya Devid; o mere ihe niile nna ya Joash mere. Naanị ebe dị elu ka e wezugaghị; ndị mmadụ ka na-achụ àjà ma na-esure ihe na-esi ísì ụtọ nʼebe ahụ. Mgbe alaeze ahụ guzosiri ike nʼaka ya, o gburu ndị ohu ahụ gburu eze, bụ nna ya.

Ma o gbughị ụmụ ndị ogbu mmadụ ahụ, dịka e dere nʼakwụkwọ Iwu Mosis, ebe Nna anyị nyere iwu sị, “Ndị bụ nna agaghị anwụ nʼihi ụmụ ha, ụmụ agaghịkwa anwụ nʼihi nna ha; onye ọbụla ga-anwụ nʼihi mmehie nke ya.”

O gburu puku mmadụ iri nʼime ndị Edọm na Ndagwurugwu Nnu, were agha dọta Sela, gụọ ya Joktel, nke bụ aha ya ruo taa.

Amazaya zigaara Jehoash nwa Jehoahaz, nwa Jehu, eze Izrel, ndị ozi sị, “Bịa, ka anyị chee onwe anyị ihu na ihu.”

Ma Jehoash eze Izrel zaghachiri Amazaya eze Juda okwu sị, “Ogwu dị na Lebanọn zigaara osisi sida dị na Lebanọn ozi sị, ‘Nye nwa m nwoke nwa gị nwanyị ka ọ bụrụ nwunye ya.’ Ma otu anụ ọhịa dị na Lebanọn gafere zọtọọ ogwu ahụ. Ị tigburu Edọm, obi gị ejupụtakwala na mpako. Ṅụrịa ọṅụ nʼihe ahụ, ma nọrọ nʼụlọ gị. Gịnị mere ị ga-eji kpasuo nsogbu, nke ga-eme ka ị daa, gị na Juda so gị?”

Ma Amazaya jụrụ ige ntị, ya mere Jehoash eze Izrel biliri gawa, ya na Amazaya eze Juda chere onwe ha ihu na ihu na Bet-shemesh nke dị na Juda. Izrel meriri Juda, onye ọbụla gbalagara nʼụlọ nke ya. Jehoash eze Izrel jidere Amazaya eze Juda, nwa Jehoash nwa Ahazaya, na Bet-shemesh, bịa na Jerusalem, kwatuo ihe ruru narị ụkwụ isii nke mgbidi ya, site nʼỌnụ Ụzọ Ámá Ifrem ruo nʼỌnụ Ụzọ Ámá Nkuku. O weere ọlaedo niile, ọlaọcha niile, na ngwongwo niile dị nʼụlọ Nna anyị na nʼụlọ akụ nke eze, tinyere ndị a dọọrọ nʼagha, laghachi na Sameria.

Ọ bụ na e deghị ihe ndị ọzọ niile Jehoash mere, na ihe o mere, na ike ya, na otú o si lụso Amazaya eze Juda ọgụ, nʼakwụkwọ Akụkọ Ihe Mere Nʼoge Ndị Eze Izrel? Jehoash soro nna nna ya ha dinaa nʼọnwụ, e lie ya na Sameria nʼebe ndị eze Izrel nọ; Jeroboam nwa ya nọchiri anya ya chịa.

Amazaya nwa Joash, eze Juda, dịrị ndụ afọ iri na ise mgbe Jehoash nwa Jehoahaz, eze Izrel, nwụsịrị. Ihe ndị ọzọ niile Amazaya mere—ọ bụ na e deghị ha nʼakwụkwọ Akụkọ Ihe Mere Nʼoge Ndị Eze Juda? Ha gbara izu nzuzo megide ya na Jerusalem; ọ gbalagara Lakish, ma ha zipụrụ ndị mmadụ ịchụso ya ruo Lakish gbuo ya nʼebe ahụ. Ha bu ya nʼelu ịnyịnya; e lie ya na Jerusalem nʼebe nna nna ya ha nọ, nʼObodo Devid.

Ndị Juda niile weere Azaraya, onye gbara afọ iri na isii, mee ya eze nʼọnọdụ nna ya Amazaya. Ọ bụ ya wughachiri Elat, weghachikwara ya nye Juda mgbe eze ahụ soro nna nna ya ha dinaa nʼọnwụ.

Obi Ebere Nna nʼebe Izrel Nọ

Nʼafọ nke iri na ise nke Amazaya nwa Joash eze Juda, Jeroboam nwa Joash eze Izrel malitere ịchị na Sameria, chịa afọ iri anọ na otu. O mere ihe ọjọọ nʼanya Nna anyị, ọ gbakụtaghị azụ nʼihe mmehie niile nke Jeroboam nwa Nebat, onye mere ka Izrel mehie. O weghachiri oke ala Izrel site na Lebo-hamat ruo nʼOsimiri Araba, dịka Nna anyị, bụ Chineke Izrel, si kwuo okwu site nʼaka ohu ya Jona nwa Amitai, onye amụma ahụ si na Gat-hefa. Nʼihi na Nna anyị hụrụ na nhụjuanya Izrel dị oke ilu, ọ dịghị onye fọdụrụ, ma ohu ma onye nweere onwe ya, ọ dịghịkwa onye ga-enyere Izrel aka. Ma Nna anyị ekwubeghị na ọ ga-ehichapụ aha Izrel site nʼokpuru eluigwe, ya mere o sitere nʼaka Jeroboam nwa Joash zọpụta ha. Ihe ndị ọzọ niile Jeroboam mere na ọrụ ya niile, na ike ya, na otú o si lụọ ọgụ, na otú o si weghachita Damaskọs na Hamat nye Juda nʼime Izrel—ọ bụ na e deghị ha nʼakwụkwọ Akụkọ Ihe Mere Nʼoge Ndị Eze Izrel? Jeroboam soro nna nna ya ha, bụ ndị eze Izrel, dinaa nʼọnwụ; Zekaraya nwa ya nọchiri anya ya chịa.