Amaziya Ya Yi Sarautar Yahuda

Amaziya ya kashe waɗanda suka kashe mahaifinsa amma ya bar 'ya'yansu, kamar yadda shari'ar Ubanmu ta ce. Da ya ci Edom ya cika da girmankai, ya tsokani Isra'ila, aka kuwa amsa masa da karin magana game da ƙaya, sa'an nan ya sha kaye; aka rushe garun Urushalima. Daga baya mutanensa ma suka kashe shi.

Babi na 14.

A shekara ta biyu ta Yowash sarkin Isra'ila, ɗan Yehoahaz, Amaziya ɗan Yowash ya zama sarkin Yahuda. Yana da shekara ashirin da biyar sa'ad da ya zama sarki, ya kuma yi sarauta shekara ashirin da tara a Urushalima. Sunan mahaifiyarsa Yehowaddin ce ta Urushalima. Ya aikata abin da yake daidai a gaban Ubanmu, amma ba kamar mahaifinsa Dawuda ba; ya aikata dukan abin da mahaifinsa Yowash ya yi. Sai dai masujadan kan tudu ba a kawar da su ba; har yanzu mutane suna miƙa hadaya suna kuma ƙona turare a can. Da mulkin ya tabbata a hannunsa, sai ya kashe bayin da suka kashe sarki, mahaifinsa.

Amma bai kashe 'ya'yan masu kisankan ba, yadda yake a rubuce cikin Littafin Dokar Musa, inda Ubanmu ya umarta, “Kada iyaye su mutu saboda 'ya'yansu, kada kuma 'ya'ya su mutu saboda iyayensu; kowa zai mutu saboda zunubin kansa.”

Ya kashe Edomawa dubu goma a Kwarin Gishiri, ya ƙwace Sela a yaƙi, ya kuma kira ta Yokteyel, sunan da take da shi har yă zuwa yau.

Amaziya ya aiki manzanni wurin Yehowash ɗan Yehoahaz, ɗan Yehu, sarkin Isra'ila, ya ce, “Zo, mu fuskanci juna.”

Amma Yehowash sarkin Isra'ila ya mai da amsa wa Amaziya sarkin Yahuda, ya ce, “Wata ƙaya a Lebanon ta aika wurin wani itacen al'ul a Lebanon, ta ce, ‘Ka ba da 'yarka ta zama matar ɗana.’ Sai wani naman jeji a Lebanon ya wuce ya tattake ƙayar. Ka ci Edom da yaƙi, zuciyarka kuma ta cika da fahariya. Ka yi taƙama da haka, amma ka zauna gida. Don me za ka jawo wa kanka wahala, har ka fāɗi, kai da Yahuda tare da kai?”

Amma Amaziya ya ƙi ji, saboda haka Yehowash sarkin Isra'ila ya taso, shi da Amaziya sarkin Yahuda kuwa suka fuskanci juna a Bet-shemesh a ƙasar Yahuda. Isra'ila ta ci Yahuda da yaƙi, kowa kuma ya gudu zuwa gidansa. Yehowash sarkin Isra'ila ya kama Amaziya sarkin Yahuda, ɗan Yehowash ɗan Ahaziya, a Bet-shemesh, ya zo Urushalima, ya kuma rushe wajen ƙafa ɗari shida na katangarta daga Ƙofar Ifraimu zuwa Ƙofar Kusurwa. Ya ɗauki dukan zinariya da azurfa, da dukan kayayyakin da suke cikin gidan Ubanmu da ɗakunan ajiyar sarki, da kuma waɗansu mutane a matsayin 'yan garkuwa, ya koma Samariya.

Sauran ayyukan Yehowash, da abin da ya yi, da ƙarfinsa, da yadda ya yaƙi Amaziya sarkin Yahuda, ba a rubuce suke cikin Littafin Tarihin Sarakunan Isra'ila ba? Yehowash kuwa ya huta tare da kakanninsa, aka binne shi a Samariya tare da sarakunan Isra'ila; Yerobowam ɗansa kuma ya gāje shi.

Amaziya ɗan Yowash sarkin Yahuda ya yi rayuwa shekara goma sha biyar bayan mutuwar Yehowash ɗan Yehoahaz sarkin Isra'ila. Sauran ayyukan Amaziya, ba a rubuce suke cikin Littafin Tarihin Sarakunan Yahuda ba? Suka ƙulla masa maƙarƙashiya a Urushalima; sai ya gudu zuwa Lakish, amma suka aiki mutane bayansa zuwa Lakish, suka kashe shi a can. Suka kawo shi a kan dawakai; aka binne shi a Urushalima tare da kakanninsa, a Birnin Dawuda.

Sai dukan mutanen Yahuda suka ɗauki Azariya, wanda yake da shekara goma sha shida, suka naɗa shi sarki a maimakon mahaifinsa Amaziya. Shi ne ya sāke gina Elat, ya kuma mai da ita ga Yahuda bayan sarki ya huta tare da kakanninsa.

Jinƙan Uba ga Isra'ila

A shekara ta goma sha biyar ta Amaziya ɗan Yowash sarkin Yahuda, Yerobowam ɗan Yowash sarkin Isra'ila ya fara sarauta a Samariya, ya yi shekara arba'in da ɗaya. Ya aikata mugunta a gaban Ubanmu, bai juya daga dukan zunuban Yerobowam ɗan Nebat ba, wanda ya sa Isra'ila ta yi zunubi. Ya mai da iyakar Isra'ila daga Lebo-hamat zuwa Tekun Araba, yadda Ubanmu, Allah na Isra'ila, ya faɗa ta bakin bawansa Yunana ɗan Amittai, annabin da yake daga Gat-hefer. Gama Ubanmu ya ga wahalar Isra'ila ta yi tsananin ɗaci ƙwarai, babu wanda ya rage, bawa ko 'yantacce, babu kuma wanda zai taimaki Isra'ila. Amma Ubanmu bai ce zai shafe sunan Isra'ila daga ƙarƙashin sama ba, saboda haka ya cece su ta hannun Yerobowam ɗan Yowash. Sauran ayyukan Yerobowam, da dukan abin da ya yi, da ƙarfinsa, da yadda ya yi yaƙi, da yadda ya mai da Dimashƙu da Hamat ga Yahuda a cikin Isra'ila, ba a rubuce suke cikin Littafin Tarihin Sarakunan Isra'ila ba? Yerobowam kuwa ya huta tare da kakanninsa, sarakunan Isra'ila; Zakariya ɗansa kuma ya gāje shi.