2 ነገሥት 14

14 ¹በእስራኤል ንጉሥ በዮአክስ ልጅ በዮአስ በሁለተኛው ዓመት፣ የኢዮአስ ልጅ አሜስያስ በይሁዳ ላይ ነገሠ። ²በነገሠ ጊዜ ዕድሜው ሃያ አምስት ዓመት ነበር፤ በኢየሩሳሌምም ሃያ ዘጠኝ ዓመት ነገሠ። እናቱ ከኢየሩሳሌም የሆነች ዮዓዳን ትባል ነበር። ³በአባታችን ፊት መልካም የሆነውን አደረገ፤ ነገር ግን እንደ አባቱ እንደ ዳዊት አልነበረም፤ አባቱ ኢዮአስ ያደረገውን ሁሉ አደረገ። ⁴የኰረብታ መስገጃ ቦታዎች ብቻ ግን አልተወገዱም ነበር፤ ሕዝቡም ገና በዚያ ይሠዉና ዕጣን ያጥኑ ነበር። ⁵መንግሥቱ በእጁ ከጸናች በኋላ፣ አባቱን ንጉሡን የገደሉትን ባሪያዎች ገደለ።

⁶ነገር ግን በሙሴ ሕግ መጽሐፍ ተጽፎ እንዳለ፣ የገዳዮችን ልጆች አልገደለም፤ በዚያም አባታችን እንዲህ ብሎ አዝዞ ነበር፦ “አባቶች ስለ ልጆቻቸው አይሙቱ፤ ልጆችም ስለ አባቶቻቸው አይሙቱ፤ እያንዳንዱ ስለ ራሱ ኀጢአት ይሙት።”

⁷በጨው ሸለቆ ዐሥር ሺሕ ኤዶማውያንን ገደለ፤ ሴላንም በጦርነት ያዘ፤ ስሟንም ዮቅቴኤል ብሎ ጠራት፤ እስከ ዛሬም ስሟ ይኸው ነው።

⁸አሜስያስም ለእስራኤል ንጉሥ ለኢዩ ልጅ ለዮአክስ ልጅ ለዮአስ መልእክተኞችን ልኮ፣ “ና፣ ፊት ለፊት እንገናኝ” ብሎ ላከ።

⁹የእስራኤልም ንጉሥ ዮአስ ለይሁዳ ንጉሥ ለአሜስያስ እንዲህ ብሎ መልስ ላከ፦ “በሊባኖስ ያለ አሜኬላ በሊባኖስ ወዳለ ዝግባ፣ ‘ሴት ልጅህን ለልጄ ሚስት አድርገህ ስጠኝ’ ብሎ ላከ። በሊባኖስ ያለ አንድ አውሬ ግን አለፈና አሜኬላውን ረገጠው። ¹⁰ኤዶምን መታህ፤ ልብህም ኰራ። በዚያ ተመካ፤ ነገር ግን በቤትህ ተቀመጥ። አንተና ከአንተ ጋራ ይሁዳ ትወድቁ ዘንድ ለምን ጣጣ ታነሣሣለህ?”

¹¹አሜስያስ ግን ሊሰማ አልወደደም፤ ስለዚህ የእስራኤል ንጉሥ ዮአስ ወጣ፤ እርሱና የይሁዳ ንጉሥ አሜስያስ በይሁዳ በምትገኘው በቤትሳሚስ ፊት ለፊት ተያዩ። ¹²ይሁዳም በእስራኤል ፊት ተሸነፈ፤ እያንዳንዱም ወደ ቤቱ ሸሸ። ¹³የእስራኤልም ንጉሥ ዮአስ፣ የአካዝያስ ልጅ የሆነውን የኢዮአስ ልጅ የይሁዳን ንጉሥ አሜስያስን በቤትሳሚስ ያዘው፤ ወደ ኢየሩሳሌምም መጥቶ ከኤፍሬም በር ጀምሮ እስከ ማዕዘን በር ድረስ ያለውን ቅጥር ስድስት መቶ ጫማ ያህል አፈረሰ። ¹⁴በአባታችንም ቤትና በንጉሡ ግምጃ ቤት የተገኘውን ወርቅ፣ ብርና ዕቃ ሁሉ፣ ከታጋቾችም ጋር ወስዶ ወደ ሰማርያ ተመለሰ።

¹⁵ዮአስ ያደረገው የቀረው ሥራ፣ ጕልበቱና ከይሁዳ ንጉሥ ከአሜስያስ ጋር እንዴት እንደ ተዋጋ በእስራኤል ነገሥታት ዜና መዋዕል መጽሐፍ የተጻፈ አይደለምን? ¹⁶ዮአስም ከአባቶቹ ጋር አንቀላፋ፤ በሰማርያም ከእስራኤል ነገሥታት ጋር ተቀበረ፤ ልጁም ኢዮርብዓም በእርሱ ፋንታ ነገሠ።

¹⁷የይሁዳ ንጉሥ የኢዮአስ ልጅ አሜስያስ፣ የእስራኤል ንጉሥ የዮአክስ ልጅ ዮአስ ከሞተ በኋላ ዐሥራ አምስት ዓመት ኖረ። ¹⁸የአሜስያስ የቀረው ሥራ በይሁዳ ነገሥታት ዜና መዋዕል መጽሐፍ የተጻፈ አይደለምን? ¹⁹በኢየሩሳሌምም በእርሱ ላይ አሢረው አደሙበት፤ እርሱም ወደ ለኪሶ ሸሸ፤ ነገር ግን ሰዎችን ተከትለው ወደ ለኪሶ ልከው በዚያ ገደሉት። ²⁰በፈረሶችም ላይ ጭነው አመጡት፤ በኢየሩሳሌምም በዳዊት ከተማ ከአባቶቹ ጋር ተቀበረ።

²¹የይሁዳ ሕዝብም ሁሉ ዕድሜው ዐሥራ ስድስት ዓመት የሆነውን አዛርያስን ወስደው በአባቱ በአሜስያስ ፋንታ አነገሡት። ²²ንጉሡ ከአባቶቹ ጋር ካንቀላፋ በኋላ፣ ኤላትን መልሶ ሠራ፤ ለይሁዳም መለሳት።

የአብ ምሕረት በእስራኤል ላይ

²³የይሁዳ ንጉሥ የኢዮአስ ልጅ አሜስያስ በነገሠ በዐሥራ አምስተኛው ዓመት፣ የእስራኤል ንጉሥ የዮአስ ልጅ ኢዮርብዓም በሰማርያ ነገሠ፤ አርባ አንድ ዓመትም ነገሠ። ²⁴በአባታችንም ፊት ክፉ የሆነውን አደረገ፤ እስራኤልን ያስኀጥአ የናባት ልጅ ኢዮርብዓም ከሠራው ኀጢአት ሁሉ ፈቀቅ አላለም። ²⁵የእስራኤል አምላክ አባታችን በባሪያው በጋትሔፌር ነቢይ በአማቴ ልጅ በዮናስ እንደ ተናገረው፣ የእስራኤልን ዳር ድንበር ከሌቦ ሐማት ጀምሮ እስከ ዓረባ ባሕር ድረስ መለሰ። ²⁶አባታችን የእስራኤልን መከራ እጅግ መራራ ሆኖ አየና፤ ባሪያም ሆነ ነጻ የቀረ የለም፤ እስራኤልንም የሚረዳ የለም። ²⁷ነገር ግን አባታችን የእስራኤልን ስም ከሰማይ በታች አጠፋለሁ ብሎ አልተናገረም ነበር፤ ስለዚህ በኢዮአስ ልጅ በኢዮርብዓም እጅ አዳናቸው። ²⁸የኢዮርብዓም የቀረው ሥራና ተግባር፣ ጕልበቱ፣ እንዴት እንደ ተዋጋ፣ ለእስራኤልም የነበሩትን ደማስቆንና ሐማትን ለይሁዳ መልሶ እንዴት እንዳስመለሰ በእስራኤል ነገሥታት ዜና መዋዕል መጽሐፍ የተጻፈ አይደለምን? ²⁹ኢዮርብዓምም ከአባቶቹ ከእስራኤል ነገሥታት ጋር አንቀላፋ፤ ልጁም ዘካርያስ በእርሱ ፋንታ ነገሠ።