2 ነገሥት 15

15 ¹የእስራኤል ንጉሥ ኢዮርብዓም በነገሠ በሃያ ሰባተኛው ዓመት፣ የይሁዳ ንጉሥ የአሜስያስ ልጅ አዛርያስ ነገሠ። ²በነገሠ ጊዜ ዐሥራ ስድስት ዓመቱ ነበር፤ በኢየሩሳሌምም አምሳ ሁለት ዓመት ነገሠ። እናቱም ኢየሩሳሌማዊት ይኮልያ ትባል ነበር። ³አባቱ አሜስያስ እንዳደረገው፣ እርሱም በአባታችን ፊት መልካም የሆነውን አደረገ። ⁴የኮረብታ መስገጃዎች ግን አልጠፉም፤ ሕዝቡም እስከ አሁን በዚያ ይሠዋና ዕጣን ያጥኑ ነበር። ⁵አባታችንም ንጉሡን መታው፤ እስከ ሞተበት ቀንም ድረስ የቈዳ በሽታ ይዞት ተለይቶ በሚኖርበት ቤት ኖረ። የንጉሡም ልጅ ኢዮአታም ቤተ መንግሥቱን ይመራ፣ የአገሩንም ሕዝብ ያስተዳድር ነበር። ⁶የቀረው የአዛርያስ ታሪክ፣ ያደረገውም ሁሉ በይሁዳ ነገሥታት ዜና መዋዕል መጽሐፍ ተጽፎ የለምን? ⁷አዛርያስም ከአባቶቹ ጋራ አንቀላፋ፤ በዳዊት ከተማም ከእነርሱ ጋራ ተቀበረ፤ ልጁም ኢዮአታም በእግሩ ተተክቶ ነገሠ።

የዘካርያስ አጭር ንግሥና በእስራኤል

⁸የይሁዳ ንጉሥ አዛርያስ በነገሠ በሠላሳ ስምንተኛው ዓመት፣ የኢዮርብዓም ልጅ ዘካርያስ በሰማርያ በእስራኤል ላይ ስድስት ወር ነገሠ። ⁹አባቶቹ እንዳደረጉት፣ እርሱም በአባታችን ፊት ክፉ የሆነውን አደረገ። እስራኤልን ኀጢአት ያሠራውን የናባጥ ልጅ የኢዮርብዓምን ኀጢአት አልተወም። ¹⁰የያቤስ ልጅ ሰሎም በእርሱ ላይ አደመ፤ በሕዝቡም ፊት መትቶ ገደለው፤ በእግሩም ተተክቶ ነገሠ። ¹¹የቀረው የዘካርያስ ታሪክ በእስራኤል ነገሥታት ዜና መዋዕል መጽሐፍ ተጽፎአል።

¹²ይህም አባታችን ኢዩን፣ “ልጆችህ እስከ አራተኛው ትውልድ ድረስ በእስራኤል ዙፋን ላይ ይቀመጣሉ” ብሎ የተናገረው ቃል ነበር። እንዲሁም ሆነ።

የሰሎም የአንድ ወር ንግሥና በእስራኤል

¹³የይሁዳ ንጉሥ ዖዝያን በነገሠ በሠላሳ ዘጠነኛው ዓመት የያቤስ ልጅ ሰሎም ነገሠ፤ በሰማርያም አንድ ወር ነገሠ። ¹⁴የጋዲ ልጅ ምናሔም ከቴርሳ ወደ ሰማርያ ወጣ፤ በዚያም የያቤስን ልጅ ሰሎምን መትቶ ገደለው፤ በእግሩም ተተክቶ ነገሠ። ¹⁵የቀረው የሰሎም ታሪክ፣ ያደረገውም አድማ በእስራኤል ነገሥታት ዜና መዋዕል መጽሐፍ ተጽፎአል።

¹⁶በዚያን ጊዜ ምናሔም ከቴርሳ ጀምሮ ቲፍሳንና በውስጥዋ ያሉትን ሁሉ፣ አገሯንም አጠፋ፤ ደጃፉን ስላልከፈቱለት አጠፋት፤ የፀነሱትንም ሴቶች ሁሉ ሆድ ቀደደ።

ምናሔም በእስራኤል ላይ ነገሠ

¹⁷የይሁዳ ንጉሥ አዛርያስ በነገሠ በሠላሳ ዘጠነኛው ዓመት የጋዲ ልጅ ምናሔም በእስራኤል ላይ ነገሠ፤ በሰማርያም ዐሥር ዓመት ነገሠ። ¹⁸በአባታችን ፊት ክፉ የሆነውን አደረገ። በዘመኑም ሁሉ እስራኤልን ኀጢአት ያሠራውን የናባጥ ልጅ የኢዮርብዓምን ኀጢአት ከቶ አልተወም። ¹⁹የአሦር ንጉሥ ፉል በአገሩ ላይ መጣ፤ ምናሔምም መንግሥቱን በእጁ ለማጽናት ፉል እንዲደግፈው ሲል ሠላሳ ስምንት ቶን ያህል ብር ሰጠው። ²⁰ምናሔምም ለአሦር ንጉሥ ይሰጥ ዘንድ ይህን ገንዘብ ከእስራኤል፣ ከሀብታሞቹም ሰዎች ሁሉ፣ ከእያንዳንዱ አንድ ነጥብ ሁለት ፓውንድ ያህል ብር አስገበረ። ስለዚህ የአሦር ንጉሥ ተመለሰ፤ በአገሩም አልቈየም። ²¹የቀረው የምናሔም ታሪክ፣ ያደረገውም ሁሉ በእስራኤል ነገሥታት ዜና መዋዕል መጽሐፍ ተጽፎ የለምን? ²²ምናሔምም ከአባቶቹ ጋራ አንቀላፋ፤ ልጁም ፋቅያስ በእግሩ ተተክቶ ነገሠ።

ፋቅያስ በእስራኤል ላይ ነገሠ

²³የይሁዳ ንጉሥ አዛርያስ በነገሠ በአምሳኛው ዓመት የምናሔም ልጅ ፋቅያስ በሰማርያ በእስራኤል ላይ መንገሥ ጀመረ፤ ሁለት ዓመትም ነገሠ። ²⁴በአባታችን ፊት ክፉ የሆነውን አደረገ። እስራኤልን ኀጢአት ያሠራውን የናባጥ ልጅ የኢዮርብዓምን ኀጢአት አልተወም። ²⁵የእርሱ አዛዥ የሆነው የረማልያ ልጅ ፋቁሕ በእርሱ ላይ አደመ፤ ከአርጎብና ከአርዮስ፣ ከአምሳ ገለዓዳውያንም ጋራ በሰማርያ በንጉሡ ቤት ምሽግ ውስጥ መታው። ገደለውም፤ በእግሩም ተተክቶ ነገሠ። ²⁶የቀረው የፋቅያስ ታሪክ፣ ያደረገውም ሁሉ በእስራኤል ነገሥታት ዜና መዋዕል መጽሐፍ ተጽፎአል።

ፋቁሕ በእስራኤል ላይ ነገሠ

²⁷የይሁዳ ንጉሥ አዛርያስ በነገሠ በአምሳ ሁለተኛው ዓመት የረማልያ ልጅ ፋቁሕ በሰማርያ በእስራኤል ላይ መንገሥ ጀመረ፤ ሃያ ዓመትም ነገሠ። ²⁸በአባታችን ፊት ክፉ የሆነውን አደረገ። እስራኤልን ኀጢአት ያሠራውን የናባጥ ልጅ የኢዮርብዓምን ኀጢአት አልተወም። ²⁹ፋቁሕ በእስራኤል ላይ በነገሠ ጊዜ፣ የአሦር ንጉሥ ቴልጌልቴልፌልሶር መጣ፤ ኢዮንን፣ አቤል ቤትማዓካን፣ ኢያኖሕን፣ ቄዴስን፣ ሐጾርን፣ ገለዓድንና ገሊላን፣ የንፍታሌምንም ምድር ሁሉ ወሰደ፤ ሕዝቡንም ወደ አሦር አፈለሰ። ³⁰ከዚያም የኤላ ልጅ ሆሴዕ በረማልያ ልጅ በፋቁሕ ላይ አደመ፤ መትቶ ገደለው፤ የዖዝያን ልጅ ኢዮአታም በነገሠ በሃያኛው ዓመት በእግሩ ተተክቶ ነገሠ። ³¹የቀረው የፋቁሕ ታሪክ፣ ያደረገውም ሁሉ በእስራኤል ነገሥታት ዜና መዋዕል መጽሐፍ ተጽፎአል።

ኢዮአታም በይሁዳ ላይ ነገሠ

³²የእስራኤል ንጉሥ የረማልያ ልጅ ፋቁሕ በነገሠ በሁለተኛው ዓመት የዖዝያን ልጅ ኢዮአታም በይሁዳ ላይ መንገሥ ጀመረ። ³³በነገሠ ጊዜ ሃያ አምስት ዓመቱ ነበር፤ በኢየሩሳሌምም ዐሥራ ስድስት ዓመት ነገሠ። እናቱም የሳዶቅ ልጅ ይሩሳ ትባል ነበር። ³⁴አባቱ ዖዝያን እንዳደረገው፣ እርሱም በአባታችን ፊት መልካም የሆነውን አደረገ። ³⁵የኮረብታ መስገጃዎች ግን አልጠፉም፤ ሕዝቡም እስከ አሁን በዚያ ይሠዋና ዕጣን ያጥኑ ነበር። እርሱም የአባታችንን ቤት የላይኛውን በር ሠራ። ³⁶የቀረው የኢዮአታም ታሪክ፣ ያደረገውም ሁሉ በይሁዳ ነገሥታት ዜና መዋዕል መጽሐፍ ተጽፎ የለምን? ³⁷በዚያ ዘመን አባታችን የሶርያን ንጉሥ ራሲንንና የረማልያን ልጅ ፋቁሕን በይሁዳ ላይ መላክ ጀመረ። ³⁸ኢዮአታምም ከአባቶቹ ጋራ አንቀላፋ፤ በአባቱ በዳዊት ከተማም ከአባቶቹ ጋራ ተቀበረ፤ ልጁም አካዝ በእግሩ ተተክቶ ነገሠ።