2 Wungnaobing 15

15 ¹Israelwui awunga Jeroboamna mungda maga̱da kashine kum, Judahwui awunga Amaziahwui nao Azariahna mungphoka. ²Ana mungkaphok tharan a zingkum tharāda tharuk kāshunghairasai, kala Jerusalemli zingkum hangphangada khani munga. Ava̱va̱wui ming Jecoliah hoi, Jerusalemlāna. ³Avāva̱ Amaziahna kasā thāda ana ithumwui Avāwui mangāli khamashung otmāng sai. ⁴Chithālala kajujuiwui apambing masākhaimihaithuda; mibingna chili pha̱kaphayā sāda nganamkaphā otyur riktāchinga. ⁵Ithumwui Avāna awungali sāhaowa, chiwui vang a kathi eina tangda phārrei kazai ngasāhaowa; kala khangatei shim akhali pamda leihaowa. Awungawui naomayara Jothamna shim chi khayangda ngalei mibingli khamung sāhaowa. ⁶Azariahwui kasāsā kala khangatatei saikora Judah Awungabingwui Thotrinchān Lairikli makapiserhaimala? ⁷Azariah avāva̱ ngarāli ngasoda thihaowa, kala Davidwui keinungli avāva̱ ngarāli ngasoda chifahaowa; kala anaomayara Jothamna awui mahut thuishina.

Zechariahna Israelli Kasha̱kha Munga

⁸Judahwui awunga Azariah mungda kum thumrāda kachishata chili, Jeroboamwui nao Zechariahna Samariali Israelli mungphoka, kala kachāng tharuk munga. ⁹Avāva̱ ngarāna kasā thāda ithumwui Avāwui mikyanli ana makaphā ot chi sai. Israelli morei sākhangasak Nebatwui nao Jeroboamwui morei kasā chiwui eina mangareithuimana. ¹⁰Jabeshwui nao Shallumna ali ngathumda mithit khalen sāda, mibingwui mangāli ngaphitta sāthathaowa, kala awui mahut thuishina. ¹¹Zechariahwui kasāsā kateibing Israel Awungabingwui Thotrinchān Lairikli kapiserhaida lei.

¹²Hi ithumwui Avāna Jehuli hāngkahai tuina: "Nanaomayarabing thot mati eina tangda Israelwui wungpamkhongli pamra." Kala chithāda shokkahaina.

Shallumna Israelli Kachāng Akha Munga

¹³Judahwui Uzziahna mungda thumrāda kachiko kumli Jabeshwui nao Shallumna mungphoka; kala Samariali kachāng akha munga. ¹⁴Gadiwui nao Menahemna Tirzahwui eina Samariali vāda apam chili Jabeshwui nao Shallumli ngaphitta sāthathaowa, kala awui mahut thuishina. ¹⁵Shallumwui kasāsā kateibing, kala ana sāhaikasā mithit khalen chi Israel Awungabingwui Thotrinchān Lairikli kapiserhaida lei.

¹⁶Atam chili Tiphsahwui mibingna Menahemli khāmong mashomiwui vang, ana Tirzahwui eina thuilaga Tiphsah kala chiwui alungli khalei saikora kala chiwui leiret ngaphitta shimān ngasaka; chi shimān ngasakta chiwui naokhavai sha̱naobing saikorali wuk rāmkhaimi.

Menahemna Israelli Munga

¹⁷Judahwui awunga Azariahna mungda thumrāda kachiko kumli Gadiwui nao Menahemna Israelwui awunga ngasāda Samariali zingkum tharā munga. ¹⁸Ithumwui Avāwui mikyanli ana makaphā otmāng sai. Awui mirin peida Israelli morei sākhangasak, Nebatwui naomayara Jeroboamwui morei kasā saikora chiwui eina mangareithuimana. ¹⁹Assyriawui awunga Pulna ngalei chili rāngararhaowa. Pulna ali makānda awui wungram ngatarmei singtit khavai Menahemna ali lupāsā ton thumrāda chishat shakha mi. ²⁰Assyriawui awungali mi khavai Menahemna Israelwui kashānga mibing saikorawui eina lupā chi ngashaikhui; mi kachiva̱na lupāsā pound akha shakha mi. Chieina Assyriawui awunga latunga, kala ngalei chili mapamsangla. ²¹Menahemwui otsakbing, ana kasā saikora Israel Awungabingwui Thotrinchān Lairikli makapiserhaimala? ²²Menahemna avāva̱ ngarāli ngasoda thihaowa, kala anaomayara Pekahiahna awui mahut thuishina.

Pekahiahna Israelli Munga

²³Judahwui awunga Azariahna mungda hangkaphangā kumli Menahemwui nao Pekahiahna Samariali Israelwui awunga sāda mungphoka, kala zingkum khani munga. ²⁴Ithumwui Avāwui mikyanli ana makaphā otmāng sai. Israelli morei sākhangasak, Nebatwui naomayara Jeroboamwui morei kasā saikora chiwui eina mangareithuimana. ²⁵Awui kathāna Remaliahwui nao Pekahna Argob, Ariah kala Gileadnaobing hangphangāli ngasoda ali ngathumda Samariali awungawui shimwui keinungmānglila ali yuikhui. Ana ali sāthata, kala awui mahut thuishina. ²⁶Pekahiahwui otsakbing, ana kasā saikora Israel Awungabingwui Thotrinchān Lairikli kapiserhaida lei.

Pekahna Israelli Munga

²⁷Judahwui awunga Azariahna mungda hangphangāda kakhane kumli Remaliahwui nao Pekahna Samariali Israelwui awunga sāda mungphoka, kala zingkum maga̱ munga. ²⁸Ithumwui Avāwui mikyanli ana makaphā otmāng sai. Israelli morei sākhangasak, Nebatwui naomayara Jeroboamwui morei kasā saikora chiwui eina mangareithuimana. ²⁹Israelwui awunga Pekahna munglakha Assyriawui awunga Tiglath-pileser chi rāda Ijon, Abel-beth-maacah, Jan-oah, Kedesh, Hazor, Gilead kala Galilee, Naphtaliwui ngalei zanglaga khuihaowa; kala chiwui mibingli Assyriali tukthuihaowa. ³⁰Chiwui thili Elahwui nao Hosheana Remaliahwui nao Pekahli ngathumda, ali yuikhuida sāthata, kala Uzziahwui nao Jothamli mungda khamaga̱ kum awui mahut thuishina. ³¹Pekahwui otsakbing, ana kasā saikora Israel Awungabingwui Thotrinchān Lairikli kapiserhaida lei.

Jothamna Judahli Munga

³²Israelwui awunga Remaliahwui nao Pekahna mungda kum kakhaneli, Uzziahwui nao Jothamna Judahli mungphoka. ³³Ana mungkaphok tharan a zingkum maga̱da phangā kāshunghairasai, kala Jerusalemli zingkum tharāda tharuk munga. Ava̱va̱wui ming Jerusha hoi, Zadokwui naongalāva̱na. ³⁴Avāva̱ Uzziahna kasā thāda ithumwui Avāwui mikyanli ana khamashung ot sai. ³⁵Chithālala kajujuiwui apambing masākhaimihaithuda; mibingna chili pha̱kaphayā sāda nganamkaphā otyur riktāchinga. Ithumwui Avāwui shim atowui ngavei ana sakai. ³⁶Jothamwui kasā khavā, ana kasāsā saikora, Judah Awungabingwui Thotrinchān Lairikli makapiserhaimala? ³⁷Chi atamli ithumwui Avāna Syriawui awunga Rezin eina Remaliahwui nao Pekahli Judahli rai ngararda chiphunphoka. ³⁸Jotham thikahai eina avāva̱ ngarāli ngasoda avāva̱ Davidwui keinungli chifahaowa; kala anaomayara Ahazna awui mahut thuishina.