Ahazna Avāwui shongfa nothahaowa
Ahazna awui khalatta naomayarali mei peili ngaruivāsakta, kala kathara shimwui lupā eina Assyriawui ngatangkhami chi yorkhuiya. Chiwui thili ana Damascusli ningkashi hanphut akha theilaga, azak chi chihovāda, Uriahli chi thāda sāsak ngasaka. Ithumwui Avāwui pithrai hanphut chi ngatei pamli sanghaowa, kala Uriahna ali kaso kahai thāda sai.
16 1Remaliahwui nao Pekahna mungda tharāda kashine kumli Jothamwui nao Ahazna Judahwui awunga mungphoka. 2Ahazna mungkaphok tharan zingkum maga̱ kāshunghairasai; kala Jerusalemli zingkum tharāda tharuk munga. Avāva̱ Davidna kasā thāda maningla ithumwui Avā awui Varewui mangāli khamashung otmāng masai. 3Ana Israelwui awungabingwui shongfali zata, kala anaomayarali mei petli ngaruivāsakta, ithumwui Avāna Israelwui mangā eina kashamshoka yurbingwui sākasā ningkakachai otsakbing athishurda sai. a a v3 Naomayara akhali "mei peili ngaruivāsak" kaji hina, naomayara chi meiwonli vare khangatei akhali pha̱phayā kaji ara — hi ithumwui Avāna ningkakachai kahai, matakhak khavai ot akhana. 4Kajujuiwui apambingli, phungrābingli, kala thingrong khangapān saikorawui azingli ana pha̱kaphayā ot kala nganamkaphā riktai.
5Chiwui thili Aramwui awunga Rezin eina Israelwui awunga Remaliahwui nao Pekahna rai sākhavai Jerusalemli vai; anina Ahazli kuinamhaida kha ali mayuirarthuwa. 6Atam chitharan Aramwui awunga Rezinna Aramwui vang Elath khuiluishita, Judahnaobingli chiwui eina kashamshoka, kala Edomnaobingna rāda arui eina tangda chili chipamhaira. 7Ahazna Assyriawui awunga Tiglath-pileserli mathunbing chihovāda hānga, "Ina nawui rao kala naona. Ili ngararbing Aramwui awunga kala Israelwui awungawui pāng eina rāda ili ngatangmilu." 8Ahazna ithumwui Avāwui shimli khalei kala awungawui lanshimli khalei lupāsā kala sinā khuilaga Assyriawui awungali khami khavai chihovā. 9Assyriawui awungana chithada sai. Ana Damascusli ngararda khui, chiwui mibingli Kirli tukvāhaowa, kala Rezin shaothata.
10Awunga Ahazna Assyriawui awunga Tiglath-pileserli samphang khavai Damascusli vālaga, apam chili hanphut theihaowa. Chiwui vang eina ana pāngmon Uriahli hanphutwui azak kala angarān saikora tākam eina chihovā. 11Pāngmon Uriahna awunga Ahazna Damascuswui eina chihovā kahai tākam eina hanphut sākhui; awunga Ahaz latunmamānda kuphaowa. 12Awungana Damascuswui eina latungda hanphut theihaowa; kala ana hanphut chili nganaida chiwuitungli je. 13Ana awui rikkatā kachigat kala tharāzāt kachigat riktai, awui ra̱shak kachigat heishokta, kala awui pha̱kaphayā chigatwui ashee hanphutli yikrora. 14Ithumwui Avāwui mangāli khalei pithrai hanphut chila shimwui mangā eina, hanphut kadhar kala ithumwui Avāwui shimwui ngachai eina khuilaga hanphut kadharwui atungshong sanga. 15Awunga Ahazna pāngmon Uriahli kasoi, "Hanphut kahaka chiwuitungli ngathorwui rikkatā kachigat, ngazinwui tharāzāt kachigat, awungawui rikkatā kachigat kala tharāzāt kachigat, kala ngalei mibing saikorawui rikkatā, tharāzāt kala ra̱shak kachigat riktālu. Rikkatā kachigat kala pha̱kaphayā saikorawui ashee chi chiwuitungli yikrorserlu. Kha pithrai hanphut chi ina chinkhami phai khavai iwuina." 16Kala pāngmon Uriahna awunga Ahazna kaso kahai saikora tākam eina sai.
17Awunga Ahazna aphei ava̱va̱wui akongnā katattāhaida, athumwui khongsai khuiserhaowa. Kala rungkhavai azingli khalei pithrai mukvābingwui eina pithrai ra̱khong chi tā ngasakta, ngalungwui aphungali sanga. 18Assyriawui awungawui vang eina, ana shimli sākahai Sabbath khalui apong, kala awungawui ayār zangkhavai chi, ithumwui Avāwui shimwui eina khuithuimihaowa. 19Ahazwui kasā khavā ana kasāsā saikora Judah Awungabingwui Thotrinchān Lairikli makapiserhaimala? 20Ahaz thikahai eina avāva̱ ngarāli ngasoda Davidwui keinungli chifahaowa; kala anaomayara Hezekiahna awui mahut thuishina.
