ଆହସ୍‌ ପିତାଙ୍କ ପଥ ପରିତ୍ୟାଗ କରନ୍ତି

ଆହସ ନିଜ ପୁଅକୁ ଅଗ୍ନିରେ ପୋଡ଼ନ୍ତି ଏବଂ ମନ୍ଦିରର ରୂପାରେ ଅଶୂରର ସୁରକ୍ଷା କିଣନ୍ତି। ତାʼପରେ ଦମ୍ମେଶକରେ ଏକ ବେଦି ତାଙ୍କୁ ଭଲ ଲାଗେ, ସେ ତାʼର ନମୁନା ଘରକୁ ପଠାନ୍ତି, ଏବଂ ଊରିୟଙ୍କ ଦ୍ୱାରା ତାʼର ନକଲ ତିଆରି କରାନ୍ତି। ଆମ ପିତାଙ୍କ ପିତ୍ତଳ ବେଦିକୁ ଗୋଟିଏ ପାଖକୁ ଠେଲି ଦିଆଯାଏ, ଏବଂ ଊରିୟ ଯାହା କୁହାଯାଏ ତାହା କରନ୍ତି।

ଅଧ୍ୟାୟ 16।

ରମଲୀୟର ପୁତ୍ର ପେକହଙ୍କ ରାଜତ୍ଵର ସତର ବର୍ଷରେ ଯୋଥମ୍‌ଙ୍କ ପୁତ୍ର ଆହସ୍‌ ଯିହୂଦାର ରାଜା ହେଲେ। ଆହସ୍‌ ରାଜ୍ୟ କରିବାକୁ ଆରମ୍ଭ କଲା ବେଳେ କୋଡ଼ିଏ ବର୍ଷ ବୟସ୍କ ଥିଲେ, ପୁଣି ସେ ଯିରୂଶାଲମରେ ଷୋହଳ ବର୍ଷ ରାଜ୍ୟ କଲେ। ସେ ଆପଣା ପୂର୍ବପୁରୁଷ ଦାଉଦଙ୍କ ପରି ଆମ୍ଭମାନଙ୍କ ପିତା ଆପଣା ଈଶ୍ଵରଙ୍କ ଦୃଷ୍ଟିରେ ଯାହା ଯଥାର୍ଥ, ତାହା କଲେ ନାହିଁ। ମାତ୍ର ସେ ଇସ୍ରାଏଲର ରାଜାମାନଙ୍କ ପଥ ଅନୁସରଣ କଲେ, ଏପରିକି ଆମ୍ଭମାନଙ୍କ ପିତା ଇସ୍ରାଏଲ ସମ୍ମୁଖରୁ ଯେଉଁ ଜାତିମାନଙ୍କୁ ତଡ଼ିଦେଇଥିଲେ, ସେମାନଙ୍କ ଘୃଣ୍ୟ ବ୍ୟବହାର ଅନୁକରଣ କରି ଆପଣା ପୁତ୍ରକୁ ଅଗ୍ନି ମଧ୍ୟଦେଇ ଗମନ କରାଇଲେ। ^a ସେ ଉଚ୍ଚସ୍ଥଳୀମାନଙ୍କରେ, ପର୍ବତମାନଙ୍କ ଉପରେ ଓ ପ୍ରତ୍ୟେକ ହରିଦ୍‌ବର୍ଣ୍ଣ ବୃକ୍ଷ ତଳେ ବଳିଦାନ ଓ ଧୂପ ଜ୍ଵଳାଇଲେ।

ସେତେବେଳେ ଅରାମର ରାଜା ରତ୍‌ସୀନ୍‌ ଓ ଇସ୍ରାଏଲର ରାଜା ରମଲୀୟର ପୁତ୍ର ପେକହ ଯୁଦ୍ଧ ନିମନ୍ତେ ଯିରୂଶାଲମକୁ ଅଭିଯାନ କଲେ, ପୁଣି ସେମାନେ ଆହସ୍‌ଙ୍କୁ ଅବରୋଧ କଲେ, ମାତ୍ର ତାହାଙ୍କୁ ପରାସ୍ତ କରିପାରିଲେ ନାହିଁ। ସେହି ସମୟରେ ଅରାମର ରାଜା ରତ୍‌ସୀନ୍‌ ଅରାମ ନିମନ୍ତେ ଏଲତ୍‌ ପୁନର୍ବାର ଅଧିକାର କଲେ ଓ ତହିଁରୁ ଯିହୂଦୀୟମାନଙ୍କୁ ତଡ଼ିଦେଲେ, ପୁଣି ଇଦୋମୀୟମାନେ ଆସି ସେହିଠାରେ ବାସ କରିବାକୁ ଲାଗିଲେ ଓ ଆଜି ପର୍ଯ୍ୟନ୍ତ ବାସ କରୁଅଛନ୍ତି। ଆହସ୍‌ ଅଶୂରର ରାଜା ତିଗ୍ଲତ୍‌-ପିଲେସରଙ୍କ ନିକଟକୁ ଦୂତ ପଠାଇ କହିଲେ, “ମୁଁ ଆପଣଙ୍କ ଦାସ ଓ ପୁତ୍ର। ଯେଉଁ ଅରାମର ରାଜା ଓ ଇସ୍ରାଏଲର ରାଜା ମୋʼ ଉପରେ ଆକ୍ରମଣ କରୁଅଛନ୍ତି, ସେମାନଙ୍କ ହସ୍ତରୁ ଆସି ମୋତେ ଉଦ୍ଧାର କରନ୍ତୁ।” ପୁଣି ଆହସ୍‌ ଆମ୍ଭମାନଙ୍କ ପିତାଙ୍କ ଗୃହରେ ଓ ରାଜଗୃହର ଭଣ୍ଡାରରେ ପ୍ରାପ୍ତ ରୂପା ଓ ସୁନା ନେଇ ଅଶୂରର ରାଜାଙ୍କ ନିକଟକୁ ଉପହାର ସ୍ଵରୂପ ପଠାଇଲେ। ତହିଁରେ ଅଶୂରର ରାଜା ତାହାଙ୍କ କଥାରେ ସମ୍ମତ ହେଲେ। ସେ ଦମ୍ମେଶକ ଆକ୍ରମଣ କରି ତାହା ଅଧିକାର କଲେ, ପୁଣି ତହିଁର ଲୋକମାନଙ୍କୁ କୀର୍‌କୁ ବନ୍ଦୀ କରି ନେଇଗଲେ ଓ ରତ୍‌ସୀନ୍‌ଙ୍କୁ ବଧ କଲେ।

ଆହସ୍‌ ରାଜା ଅଶୂରର ରାଜା ତିଗ୍ଲତ୍‌-ପିଲେସରଙ୍କ ସଙ୍ଗେ ସାକ୍ଷାତ କରିବା ନିମନ୍ତେ ଦମ୍ମେଶକକୁ ଯାଇ ସେହିଠାରେ ଥିବା ଯଜ୍ଞବେଦି ଦେଖିଲେ। ତହୁଁ ସେ ଊରୀୟ ଯାଜକଙ୍କ ନିକଟକୁ ସେହି ଯଜ୍ଞବେଦିର ଆକୃତି ଓ ସମସ୍ତ ଗଠନ-ପ୍ରକାର, ଗୋଟିଏ ଗୋଟିଏ ବିଷୟରେ ଯଥାର୍ଥ, ପଠାଇଲେ। ଆଉ ଆହସ୍‌ ରାଜା ଦମ୍ମେଶକରୁ ଯେପରି ପଠାଇଥିଲେ, ସେହିପରି ଠିକ୍‌ ଅନୁସାରେ ଊରୀୟ ଯାଜକ ଯଜ୍ଞବେଦି ନିର୍ମାଣ କଲେ, ପୁଣି ଆହସ୍‌ ରାଜା ଦମ୍ମେଶକରୁ ଫେରିବା ପୂର୍ବରୁ ତାହା ସମାପ୍ତ କଲେ। ତହୁଁ ରାଜା ଦମ୍ମେଶକରୁ ଫେରିଆସି ଯଜ୍ଞବେଦି ଦେଖିଲେ, ଆଉ ରାଜା ସେହି ଯଜ୍ଞବେଦି ନିକଟକୁ ଯାଇ ତହିଁ ଉପରକୁ ଆରୋହଣ କଲେ। ସେ ଆପଣା ହୋମବଳି ଓ ଭକ୍ଷ୍ୟ-ନୈବେଦ୍ୟ ଦଗ୍ଧ କଲେ, ଆପଣା ପେୟ-ନୈବେଦ୍ୟ ଢାଳିଲେ ଓ ଆପଣା ମଙ୍ଗଳାର୍ଥକ ବଳିର ରକ୍ତ ସେହି ଯଜ୍ଞବେଦି ଉପରେ ଛିଞ୍ଚିଲେ। ପୁଣି ଯେଉଁ ପିତ୍ତଳମୟ ଯଜ୍ଞବେଦି ଆମ୍ଭମାନଙ୍କ ପିତାଙ୍କ ସମ୍ମୁଖରେ ଥିଲା, ତାହା ସେ ଗୃହ ସମ୍ମୁଖରୁ, ଅର୍ଥାତ୍‌ ନୂତନ ଯଜ୍ଞବେଦି ଓ ଆମ୍ଭମାନଙ୍କ ପିତାଙ୍କ ଗୃହ ମଧ୍ୟରୁ, ଘେନି ନୂତନ ଯଜ୍ଞବେଦିର ଉତ୍ତର ପାର୍ଶ୍ଵକୁ ସ୍ଥାନାନ୍ତର କଲେ। ଆଉ ଆହସ୍‌ ରାଜା ଊରୀୟ ଯାଜକଙ୍କୁ ଆଜ୍ଞା ଦେଇ କହିଲେ, “ବୃହତ୍‌ ଯଜ୍ଞବେଦି ଉପରେ ପ୍ରାତଃକାଳୀନ ହୋମବଳି ଓ ସନ୍ଧ୍ୟାକାଳୀନ ଭକ୍ଷ୍ୟ-ନୈବେଦ୍ୟ, ରାଜାର ହୋମବଳି ଓ ତାହାର ଭକ୍ଷ୍ୟ-ନୈବେଦ୍ୟ, ପୁଣି ଦେଶସ୍ଥ ସମସ୍ତ ଲୋକଙ୍କ ହୋମବଳି, ଭକ୍ଷ୍ୟ-ନୈବେଦ୍ୟ ଓ ପେୟ-ନୈବେଦ୍ୟ ଦଗ୍ଧ କର; ପୁଣି ହୋମବଳି ଓ ଅନ୍ୟାନ୍ୟ ବଳିର ସମସ୍ତ ରକ୍ତ ତହିଁ ଉପରେ ଛିଞ୍ଚ। ମାତ୍ର ପିତ୍ତଳମୟ ଯଜ୍ଞବେଦି ପରାମର୍ଶ ଅନ୍ଵେଷଣ କରିବା ନିମନ୍ତେ ମୋହର ରହିବ।” ଆଉ ଆହସ୍‌ ରାଜା ଯେପରି ଆଜ୍ଞା ଦେଇଥିଲେ, ଊରୀୟ ଯାଜକ ସେହିପରି ସମସ୍ତ କଲେ।

ଆଉ ଆହସ୍‌ ରାଜା ବୈଠକିମାନଙ୍କର ଫଳକ କାଟି ପକାଇଲେ ଓ ତହିଁରୁ ପ୍ରକ୍ଷାଳନ-ପାତ୍ର କାଢ଼ି ନେଲେ, ପୁଣି ପିତ୍ତଳମୟ ସମୁଦ୍ର-ଆକାର ପାତ୍ର ତଳେ ଥିବା ପିତ୍ତଳମୟ ବୃଷମାନଙ୍କ ଉପରୁ ତାହା ଓହ୍ଲାଇ ପ୍ରସ୍ତରମୟ ବୁନିଆଦ ଉପରେ ବସାଇଲେ। ପୁଣି ଅଶୂରର ରାଜାଙ୍କ ସକାଶେ ସେ ଗୃହରେ ନିର୍ମିତ ବିଶ୍ରାମ ଦିବସର ଆଚ୍ଛାଦିତ ପଥ ଓ ରାଜାର ବାହ୍ୟ ପ୍ରବେଶ-ଦ୍ଵାର ଆମ୍ଭମାନଙ୍କ ପିତାଙ୍କ ଗୃହରୁ କାଢ଼ି ପକାଇଲେ। ଆହସ୍‌ଙ୍କର ଅବଶିଷ୍ଟ କାର୍ଯ୍ୟ, ଅର୍ଥାତ୍‌ ସେ ଯାହା ଯାହା କଲେ, ତାହା କି ଯିହୂଦାର ରାଜାମାନଙ୍କ ଇତିହାସ ପୁସ୍ତକରେ ଲିଖିତ ନାହିଁ? ଆଉ ଆହସ୍‌ ଆପଣା ପୂର୍ବପୁରୁଷଗଣଙ୍କ ସହିତ ମହାନିଦ୍ରିତ ହେଲେ ଓ ଦାଉଦ-ନଗରରେ ସେମାନଙ୍କ ସଙ୍ଗେ କବର ପ୍ରାପ୍ତ ହେଲେ; ପୁଣି ତାହାଙ୍କ ପୁତ୍ର ହିଜକୀୟ ତାହାଙ୍କ ପଦରେ ରାଜ୍ୟ କଲେ।