Ahaz ya Bar Hanyar Uba

Ahaz ya ƙone ɗansa a wuta, ya kuma sayi kāriyar Assuriya da azurfar haikali. Sa'an nan ya ga wani bagade a Dimashƙu da ya ƙayatar da shi, ya aiko da zanensa gida, ya sa Uriya ya gina kamarsa. Aka ture bagaden tagulla na Ubanmu gefe, Uriya kuwa ya yi yadda aka faɗa masa.

Babi na 16.

A shekara ta goma sha bakwai ta sarautar Feka ɗan Remaliya, Ahaz ɗan Yotam ya zama sarkin Yahuda. Ahaz yana da shekara ashirin sa'ad da ya zama sarki, ya kuma yi sarauta shekara goma sha shida a Urushalima. Bai yi abin da yake daidai a gaban Ubanmu Allahnsa ba, ba kamar kakansa Dawuda ba. Maimakon haka sai ya bi hanyar sarakunan Isra'ila, har ma ya sa ɗansa ya ratsa cikin wuta, yana koyi da ayyukan banƙyama na al'umman da Ubanmu ya kori daga gaban Isra'ila. ^a Ya miƙa hadayu ya kuma ƙona turare a kan masujadan tudu, da kan tuddai, da kuma ƙarƙashin kowace itaciya mai inuwa.

Sa'an nan Rezin sarkin Aram da Feka ɗan Remaliya sarkin Isra'ila suka haura zuwa Urushalima don yaƙi, suka kewaye Ahaz amma ba su iya rinjayarsa ba. A wannan lokaci Rezin sarkin Aram ya maido da Elat ga Aram, ya kori mutanen Yahuda daga ciki, Edomawa kuwa suka zo suka zauna a can har yă zuwa yau. Ahaz ya aiki manzanni wurin Tiglat-Fileser sarkin Assuriya, ya ce, “Ni bawanka ne da kuma ɗanka. Ka zo ka cece ni daga hannun sarkin Aram da sarkin Isra'ila, waɗanda suke kaina da yaƙi.” Ahaz ya ɗauki azurfa da zinariya da aka samu a cikin gidan Ubanmu da kuma ma'ajin sarki, ya aika da su kyauta ga sarkin Assuriya. Sarkin Assuriya kuwa ya yarda. Ya kai wa Damaskus hari, ya ci ta, ya kai mutanenta zaman bauta a Kir, ya kuma kashe Rezin.

Da Sarki Ahaz ya tafi Damaskus don yă gamu da Tiglat-Fileser sarkin Assuriya, sai ya ga bagaden da yake can. Sai ya aika wa Uriya firist zanen bagaden da cikakken fasalinsa, daidai a kowane bangare. Uriya firist ya gina bagaden daidai yadda Sarki Ahaz ya aika daga Damaskus, ya kuma gama shi kafin Sarki Ahaz yă dawo. Da sarki ya dawo daga Damaskus ya ga bagaden, sai ya kusace shi ya hau kansa. Ya ƙone hadayarsa ta ƙonawa da hadayarsa ta gari, ya zuba hadayarsa ta sha, ya kuma yafa jinin hadayunsa na salama a kan bagaden. Ya kuma kawar da bagaden tagulla da yake gaban Ubanmu daga gaban gidan — tsakanin sabon bagaden da gidan Ubanmu — ya ajiye shi a gefen arewa na sabon bagaden. Sarki Ahaz ya umarci Uriya firist, ya ce, “A kan babban bagaden ka ƙone hadaya ta ƙonawa ta safiya, da hadaya ta gari ta yamma, da hadaya ta ƙonawa da ta gari na sarki, da kuma ta dukan mutanen ƙasar: hadayunsu na ƙonawa, da na gari, da na sha. Ka yafa dukan jinin hadayu na ƙonawa da sauran hadayu a kansa. Amma bagaden tagulla zai zama nawa don in nemi shiryarwa da shi.” Uriya firist kuwa ya yi kome daidai yadda Sarki Ahaz ya umarta.

Sarki Ahaz ya katse fayafayan da suke a kan matattarun masu motsi, ya kuma cire kwanoninsu. Ya saukar da babban kwanon tagulla da ake kira Teku daga kan bijiman tagulla da suke ɗauke da shi, ya ajiye shi a kan tushe na dutse. Saboda sarkin Assuriya, ya cire rufaffiyar hanyar Asabar da aka gina a cikin gidan, da kuma ƙofar shiga ta waje ta sarki, daga gidan Ubanmu. Ashe, sauran ayyukan Ahaz, da abubuwan da ya yi, ba a rubuce suke a cikin Littafin Tarihin Sarakunan Yahuda ba? Ahaz ya huta tare da kakanninsa, aka binne shi tare da su a Birnin Dawuda, ɗansa Hezekiya kuwa ya gāji sarauta a madadinsa.