Akaz Vire Do bay Chemen Papa a

Akaz boule pwòp pitit gason l nan dife epi li achte pwoteksyon Lasiri ak ajan tanp lan. Apre sa li wè yon lotèl lavil Damas li renmen, li voye modèl la lakay, epi li fè Ouri bati yon kopi. Yo pouse lotèl an kwiv Papa nou an sou kote, e Ouri fè sa yo di l fè.

Chapit 16.

Nan disètyèm ane rèy Peka, pitit Remalya a, Akaz, pitit Jotam, vin wa peyi Jida. Akaz te gen ventan lè li vin wa; li gouvènen sèzan lavil Jerizalèm. Li pa t' fè sa ki dwat nan je Papa nou, Bondye li a, jan David, zansèt li a, te fè. Okontrè, li te swiv chemen wa peyi Izrayèl yo, li menm rive fè pitit gason l' pase nan dife, dapre move pratik degoutan nasyon Papa nou te mete deyò devan pèp Izrayèl la. ^a Li te ofri bèt pou yo touye epi li te boule lansan sou tèt mòn yo, sou ti mòn yo, ak anba tout gwo pyebwa.

Lè sa a, Rezen, wa peyi Aram, ak Peka, pitit Remalya, wa peyi Izrayèl, moute al fè lagè sou lavil Jerizalèm. Yo sènen Akaz, men yo pa t' kapab bat li. Lè sa a, Rezen, wa peyi Aram, reprann lavil Elat pou peyi Aram, li mete moun Jida yo deyò, epi moun Edon yo vin rete la depi lè sa a. Akaz voye mesaje bay Tiglat-Pilesè, wa peyi Lasiri, pou di l': “Mwen se sèvitè ou ak pitit ou. Vin delivre m' anba men wa peyi Aram ak wa peyi Izrayèl ki leve dèyè m'.” Akaz pran ajan ak lò li te jwenn nan kay Papa nou ak nan depo richès wa a, li voye yo kado bay wa peyi Lasiri a. Wa peyi Lasiri a koute l'. Li atake lavil Damas, li pran l', li depòte moun li yo lavil Kir, epi li touye Rezen.

Lè wa Akaz al lavil Damas pou l' kontre ak Tiglat-Pilesè, wa peyi Lasiri a, li wè lotèl ki te la a. Se konsa li voye bay Ouri, prèt la, plan lotèl la ak tout modèl li, egzak nan tout ti detay. Ouri, prèt la, bati lotèl la egzakteman jan wa Akaz te voye di depi lavil Damas, li fini avè l' anvan wa Akaz tounen. Lè wa a tounen soti Damas, li wè lotèl la, li pwoche bò kote l', li moute sou li. Li boule ofrann li te gen pou boule nèt la ak ofrann grenn jaden an, li vide ofrann diven an, epi li voye san ofrann pou di mèsi yo sou lotèl la. Li deplase lotèl kwiv ki te devan Papa nou an, li wete l' sou devan kay la — ant nouvo lotèl la ak kay Papa nou an — li mete l' sou bò nò nouvo lotèl la. Wa Akaz bay Ouri, prèt la, lòd sa a: “Sou gwo lotèl la, w'a boule ofrann pou boule nèt chak maten an, ofrann grenn jaden chak aswè a, ofrann pou boule nèt ak ofrann grenn jaden wa a, ansanm ak ofrann tout pèp peyi a: ofrann pou boule nèt yo, ofrann grenn jaden yo ak ofrann diven yo. W'a voye tout san ofrann pou boule nèt yo ak lòt bèt yo touye yo sou li. Men, lotèl kwiv la, se pou mwen l' ye pou m' chèche konnen sa Bondye vle.” Ouri, prèt la, fè tout bagay jan wa Akaz te ba li lòd la.

Wa Akaz koupe wete panno ki te sou ti charyo woulib yo, li wete basen yo tou. Li desann gwo basen kwiv yo rele Lanmè a sou do towo kwiv ki te anba l' yo, li mete l' sou yon pye wòch. Poutèt wa peyi Lasiri a, li wete chemen kouvri pou jou repo a yo te bati anndan kay la, ak pòt deyò kote wa a konn antre a, li wete yo nan kay Papa nou an. Tout rès istwa Akaz la, tou sa li te fè, èske yo pa ekri nan liv Istwa wa peyi Jida yo? Akaz mouri, li al jwenn zansèt li yo, yo antere l' ansanm ak yo nan lavil David la. Se Ezekyas, pitit gason l', ki moute wa nan plas li.