2 Kings 16 FHB Father's Heart Bible™

16 ¹Remaliah laga chokra Pekah laga sautoro saal te, Jotham laga chokra Ahaz tu Judah laga raja hoise. ²Ahaz raja howa homoi te tar umor bis saal thakise; tai Jerusalem te solo saal raj korise. Tar purbo-pita David nisena nohoi, tai laga Isor amar Pitri laga suku age te ki thik ase, eitu tai kora nai. ³Ulta, tai Israel laga raja khan laga rasta piche korise, tai laga chokra ke bhi jui te paar kori dise, amar Pitri pora Israel age pora kheda diya desh khan laga ghin lagikena kaam khan nokol korise. ^a a v3 Ekta bacha ke “jui te paar kori diya” laga motlob holo hei bacha ke jui laga lela te ekta murti-puja laga dévta nimite bolidan kora — eneka ekta bhoyanak kaam ji amar Pitri pora ninda korise. ⁴Tai uncha jaga khan te, pahar khan te, aru sob phailikena thaka gash khan laga nichete bolidan dise aru dhup julai dise.

⁵Tetiya Aram laga raja Rezin aru Israel laga raja, Remaliah laga chokra Pekah, lorai nimite Jerusalem te ahhise; tarkhan pora Ahaz ke gherikena rakhise, kintu tar ke harai dibo para nai. ⁶Hei homoi te Aram laga raja Rezin pora Elath ke Aram nimite wapas loise, ta pora Judah manuh khan ke kheda dise, aru Edom manuh khan ahhikena hei homoi pora ta te thaki ase. ⁷Ahaz pora Assyria laga raja Tiglath-Pileser logote khobor-bahok khan pathaise, aru koise, “Moi apuni laga noukar aru chokra ase. Aram laga raja aru Israel laga raja, kun pora moike maari ase, taikhan pora moike bachai lobole ahhibi.” ⁸Ahaz pora amar Pitri laga ghor te aru raja laga bhandar ghor khan te pa-a chandi aru suna loise, aru eitu khan ke uphar hisab te Assyria laga raja logote pathai dise. ⁹Assyria laga raja pora tar kotha mani loise. Tai Damascus ke maari kene dhori loise, ta laga manuh khan ke Kir te bondhi kori kene pathai dise, aru Rezin ke morai dise.

¹⁰Raja Ahaz pora Assyria laga raja Tiglath-Pileser ke lok pabole Damascus te juwa homoi te, tai ta te bedi ekta dikhise. Etu nimite tai pujari Uriah logote etu laga design aru pura noksa, sob jinis thik thik korikena pathai dise. ¹¹Pujari Uriah pora raja Ahaz pora Damascus pora pathai diya nisena thik eneka bedi tu bonaise, aru raja Ahaz wapas aha age te etu kaam khotom korise. ¹²Raja Damascus pora wapas ahhikena bedi tu dikhise, aru tai usorte ahhikena etu uporte uthise. ¹³Tai nijor laga jui-te julai diya bolidan aru anaj bolidan julai dise, nijor laga pani bolidan dhalise, aru nijor laga shanti bolidan laga khoon bedi uporte sitikai dise. ¹⁴Amar Pitri age te thaka pitol laga bedi tu—ji notun bedi aru amar Pitri laga ghor majot te thakise—ghor laga age pora loikena notun bedi laga uttor phale rakhise. ¹⁵Raja Ahaz pora pujari Uriah ke hukum dise, “Dangor bedi uporte phojur laga jui-bolidan, saam laga anaj bolidan, raja laga jui-bolidan aru anaj bolidan, aru desh laga sob manuh khan laga: taikhan laga jui-bolidan, anaj bolidan, aru pani bolidan julai dibi. Jui-bolidan aru bolidan khan laga sob khoon etu uporte sitikai dibi. Kintu pitol laga bedi tu moi nimite ase, ji pora moi salah lobo.” ¹⁶Aru pujari Uriah pora raja Ahaz pora hukum diya nisena sob kiba korise.

¹⁷Raja Ahaz pora chalai bole para khamba khan pora panel khan kati dise aru taikhan laga basin khan hatai dise. Tai pitol laga Samundar tu etu nichete thaka pitol laga goru khan pora nichete namai loise aru etu ke pathor laga bunyaad uporte rakhise. ¹⁸Assyria laga raja nimite, tai ghor te bona Bisram din laga dhaki diya rasta, aru raja laga bahar phale ghusa dorja, amar Pitri laga ghor pora hatai dise. ¹⁹Ahaz laga bachi juwa kaam khan, tai ki korise, eitu khan Judah laga raja khan laga Itihas laga Kitab te likha nai naki? ²⁰Ahaz tar purbo-pita khan logote aram loise, aru taikhan logote David laga Sheher te kobor dise; tar chokra Hezekiah tar jagate raj korise.