Azariaei Jihuda Thüka Songdakda

Jihudabü Azariaei po anjinsemto nyi songdakkei, im baubü yeian janyinbü chema onan kikei; kho leilanga Israela jihsi cheei Choba anngao songdakan, aoyou kho haoen jeibou müteibü haitikei. Assiriaei khüm longkola khangan, sangnyu kaodak yaangbü shuong leian sattikei.

Chapter 15.

Israelbü Choba Jeroboam, songdak po saoto nyet boubüa, Jihudabü Choba Amazia shou Azariaei songdakla khangkei. Hao songdakla khangjinei po anthüklak kikei, hoba Jerusalema po anjinsemto nyi songdakkei. Haonyu Jerusalembü Jekolia nyenbü kikei. Haobou Amaziaei kümbü tegü, seneibü Bou thedanga ai janbü ki kho haoei kümbei. Lausikei shongh lemshang sungan üpbo kikei; kho leilanga mütshuongei tokei lem lembei, hoba jen juokkei. Seneibü Bouei Choba to ngümbei, kheijinei hao haibü chalou sühko im baubü kikei, hoba hao janyinbü chem to onko kikei. Choba shou Jothamei chempen thüka khukabou kikei, hoba kaonyeka kibü mütshuong to songdakkei. Tou Azariaeibü joubü kümsilei hoba haoei kümbü pendou Jihudabü Choba shuong Lüngbüdobü lea doan aki lo? Hobaje Azaria haoeibü bousi shuong yoa yepbei, hoba Dawid sangnyua haoeibü bousi shuong yoa khünkei, hoba hao shou Jothamei hao jeiko songdakkei.

Zekhariaei Israela Songdakda

Jihudabü Choba Azaria, songdak po khujinto set boubüa, Jeroboam shou Zekhariaei Samariaa Israel thüka lit lak songdakkei. Haoei haoeibü bousi shuongei kümbü tegü, seneibü Bou thedanga ai amai kho kümbei; hoba Nebat shou Jeroboameibü shabü ka haoei asepei, laobou haoei Israel la shabü shontikei. Jabesh shou Shalumei hao khulimbo huon takkei, hoba mütshuong thedanga hao to ngüman haitikei, hoba hao jeiko songdakkei. Tou Zekhariaeibü joubü kümsilei Israelbü Choba shuong Lüngbüdobü lea doan kia.

Ho kho seneibü Bouei Jehu to laubü ngüh kikei, “Kaibü shousi shuong leiboubü meten sühko Israel Choba setshanga setlabü.” Hoba kho tegü haüthükkei.

Shalumei Israela Lit Che Songdakda

Jihudabü Choba Uzia, songdak po khujinto gü boubüa, Jabesh shou Shalumei songdakla khangkei, hoba Samariaa lit che songdakkei. Gadi shou Menahemei Tirza ka Samaria to angkei, hoba khünei Jabesh shou Shalum to ngüman haitikei, hoba hao jeiko songdakkei. Tou Shalumeibü joubü kümsilei hoba haoei kümbü huontak Israelbü Choba shuong Lüngbüdobü lea doan kia.

Kho jihsiphaia Menahemei Tirza ka jaüan Tifsa hoba khünei kibü pendou hoba khoeibü leilang leilukei, aishanga haoenei hao la koukhün athonei; haoei kho leilukei, hoba khübü mangakongko apbü yaksa pendou to shipan apbukei.

Menahemei Israel Thüka Songdakda

Jihudabü Choba Azaria, songdak po khujinto gü boubüa, Gadi shou Menahemei Israel thüka songdakla khangkei, hoba Samariaa po an songdakkei. Haoei seneibü Bou thedanga ai amai kho kümbei. Haoeibü salang sünga haoei Israel la shabü shontibü Nebateibü shou Jeroboameibü shabü ka asepei. Hobaje Assiriabü Choba Pulei kao khulimbo loukei, hoba Menahemei, jembü sangle hau kingaitila Pulei hao to thuila shanga, Pul la chandinam seret khujinto set kukei. Menahemei Assiriabü Choba la kula shanga, ho nam Israel ka, aei keian müt pendou ka, müt weko chandinam atbü penyi loukei. Hibü Assiriabü Choba lambo sepeinyu ngaikei, hoba kao ka akitei. Tou Menahemeibü joubü kümsilei hoba haoei kümbü pendou Israelbü Choba shuong Lüngbüdobü lea doan aki lo? Hibü Menahem haoeibü bousi shuong yoa yepbei, hoba hao shou Pekahiaei hao jeiko songdakkei.

Pekahia Israel Thüka Songdakda

Jihudabü Choba Azaria po anjinsem boubüa Menahemeibü shou Pekahiaei Samariaa Israel thüka songdakla khangkei, hoba po nyi songdakkei. Haoei seneibü Bou thedanga ai amai kho kümbei. Haoei Israel la shabü shontibü Nebateibü shou Jeroboameibü shabü ka asepei. Hobaje haoeibü ikjaibou Remaliaeibü shou Pekahei hao khulimbo kümbei, hoba Argob, Arie hoba Gileadbü anjinsem yoa, Samariaa Choba chem jungto hao shikei. Haoei hao haitikei hoba hao jeiko songdakkei. Tou Pekahiaeibü joubü kümsilei hoba haoei kümbü pendou kho Israelbü Choba shuongbü Lüngbüdo Lea doan kia.

Pekah Israel Thüka Songdakda

Jihudabü Choba Azaria po anjinsemto nyi boubüa Remaliaeibü shou Pekahei Samariaa Israel thüka songdakla khangkei, hoba po saoche songdakkei. Haoei seneibü Bou thedanga ai amai kho kümbei. Haoei Israel la shabü shontibü Nebateibü shou Jeroboameibü shabü ka asepei. Israelbü Choba Pekaheibü chaloua Assiriabü Choba Tiglat-pileserei louan Ijon, Abel Beth Maaka, Janoa, Kedesh, Hazor, Gilead hoba Galil—Naftali kao pendou—leilukukei, hoba khübü mütshuong Assiria to leian haukei. Kheijinei Elaeibü shou Hosheaei Remaliaeibü shou Pekah khulimbo kümbei, hoba hao shikei, hao haitikei hoba hao jeiko songdakkei, kho Uziaeibü shou Jotham po saoche boubüa kikei. Tou Pekaheibü joubü kümsilei hoba haoei kümbü pendou kho Israelbü Choba shuongbü Lüngbüdo Lea doan kia.

Jotham Jihuda Thüka Songdakda

Israelbü Choba Remaliaeibü shou Pekah, songdak po nyi boubüa Uziaeibü shou Jothamei Jihuda thüka songdakla khangkei. Haoei ladang songdakla khangkei hao po saoto ngao kikei, hoba haoei Jerusalema po anthüklak songdakkei. Hoba haoeibü nyu Zadokeibü nouyangshou Jerusa nyenbü kikei. Haoei seneibü Bou thedanga tükde kho kümbei, haobou Uzia kümbü tegü. Lausikei shongh lemshang kho üpbo kikei, hoba kho leilanga mütshuongei tokei lem lembei, hoba jen juokkei. Haoei seneibü Bou chem thük bakhün kümbei. Jothameibü joubü kümsilei hoba haoei kümbü pendou Jihudabü Choba shuong Lüngbüdobü lea doan aki lo? Kho chalou shuonga seneibü Bouei Arambü Choba Rezin hoba Remalia shou Pekah Jihuda khulimbo hautila khangkei. Hobaje Jotham haoeibü bousi shuong yoa yepbei, hoba haoeibü bousi shuong yoa haobou Dawid sangnyua khünkei, hoba hao jeiko hao shou Ahazei songdakkei.